ខេត្តកណ្តាល ៖ សំណង់រឹងមួយកន្លែងបានបុកគ្រឹះសាងសង់នៅលើដីចំណីថ្នល់ជាតិលេខ១ ស្ថិតក្នុងភូមិជ័យឧត្តម ឃុំសំរោងធំ ស្រុកកៀនស្វាយ ខេត្តកណ្តាល សង្ស័យអត់ច្បាប់។
បើប្រភពព័ត៌មានបានឱ្យដឹងថា ម្ចាស់សំណង់នេះ គ្មានអ្នកណាស្គាល់ឈ្មោះឡើយ នៅឯរាជធានីភ្នំពេញ យូរៗទើបមកមើលម្តង ហើយគេបានដាក់ម៉ាស៊ីនបុកគ្រឹះប្រហែលជាង១ខែហើយ។ ឥឡូវចាប់ផ្តើមចងដែក គៀបពុម្ភចាក់ធ្នឹមបេតុង បំរុងឡើងសរសរបន្តទៀត។
ប្រភពដដែលបន្តទៀតថា មន្ត្រីជំនាញបានសិក្សាវាស់វែងដោះស្រាយផលប៉ះពាល់ចេញពី (អក្សពាក់កណ្តាលនៃថ្នល់ម្ខាង៣០ម៉ែត្រ) និងបានបោះបង្គោលថ្មទុកសម្រាប់គម្រោងពង្រីកថ្នល់បន្ថែម កុំឱ្យជួបការលំបាកក្នុងការដោះស្រាយផលប៉ះពាល់នៅថ្ងៃក្រោយ។ ប៉ុន្តែអាជ្ញាធរហាក់បីដូចជាមិនអើពើ ឬមានវិធានការណ៍ទប់ស្កាត់រាល់សំណង់អនាធិបតេយ្យលើដីចំណីថ្នល់នោះឡើយ ទុកឱ្យស្មុគស្មាញឈឺក្បាលវិលមុខដល់ប្រមុខរាជរដ្ឋាភិបាលនូវពេលចាប់ផ្តើមគម្រោងពង្រីកថ្នល់។
សកម្មភាពបុគ្គលម្នាក់រស់នៅរាជធានីយ៍ភ្នំពេញ មកបុកគ្រឹះបំរុងសង់សំណង់រឹងនៅលើដីចំណីថ្នល់ជាតិលេខ១ ទាំងស្រុងនេះ គឺគេដាក់ជាងមកធ្វើហាក់បីដូចជាលួចលាក់អញ្ចឹង ដោយធ្វើម្តងបន្តិច ម្តងបន្តិច ដើម្បីបំភ័ន្ធភ្នែកមហាជន សង្ស័យតែគ្មានច្បាប់ទម្លាប់នោះទេ។
ពាក់ព័ន្ធនឹងបញ្ហាខាងលើនេះ លោក ទេព ឈួន មេឃុំសំរោងធំបានប្រាប់ឱ្យដឹងតាមទូរស័ព្ទកាលពីថ្ងៃទី១៦ ខែធ្នូ ឆ្នាំ២០១៩ថា គឺគេសុំសាងសង់ត្រឹមឃុំ ប៉ុន្តែលោកមិនចាំឈ្មោះម្ចាស់ដីនោះទេ ទាល់តែបើកបញ្ជីមើល។
ចំណែកលោកកេត សុផល ប្រធានការិយាល័យសុរិយាដី បានឱ្យដឹងតាមទូរស័ព្ទនៅរសៀលថ្ងៃទី១៦ ខែធ្នូ ឆ្នាំ២០១៩នេះថា រូបលោកពុំទាន់បានដឹងទេ តែបើសង់នៅលើដីចំណីផ្លូវមែននោះ គឺគ្មានច្បាប់អនុញ្ញាតឡើយ តែចាំលោកចាត់ឱ្យមន្ត្រីក្រោមឱវាត ចុះទៅពិនិត្យមើលសិន៕ (កែសម្រួលដោយ ៖ បុប្ផា)
ចែករំលែកព័តមាននេះ