រាជធានីភ្នំពេញ ៖ អាជ្ញាធរខណ្ឌពោធិ៍សែនជ័យ រួមជាមួយអាជ្ញាធរសង្កាត់ចោមចៅទី១ ដឹកនាំដោយលោកអភិបាលរងខណ្ឌប៉ាង លីដា បានចុះទៅធ្វើការត្រួតពិនិត្យទីតាំងទំនាស់មួយកន្លែង ស្ថិតនៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ កាលពីវេលាម៉ោង១០ព្រឹកថ្ងៃទី១៦ ធ្នូ ឆ្នាំ២០១៩ ។ បន្ទាប់ពីទទួលពាក្យបណ្ដឹងរបស់ប្រជាពលរដ្ឋចំនួន៣៨គ្រួសារ ដែលបានប្ដឹងពីម្ចាស់ក្រុមហ៊ុនពុះដីឡូត៍មួយកន្លែង ដោយពួកគាត់ចោទប្រកាន់ថា អ្នករកសុីពុះដីឡូត៍នេះ បានហាមឃាត់លែងឲ្យពួកគាត់ប្រើប្រាស់ផ្លូវ និងផ្ដាច់ទឹក ព្រមទាំងគាបសង្កត់មិនឲ្យមានការលក់ដូរផ្ទះជាដើម។
ខណៈដែលពួកគាត់បានទិញដីឲ្យលុយគ្រប់ចំនួនទទួលបានប័ណ្ណកម្មសិទ្ធិត្រឹមត្រូវហើយនោះ ជាពិសេស ពួកគាត់បានសង់លំនៅឋានរស់នៅរយៈពេលច្រើនឆ្នាំមកហើយ បែរជាម្ចាស់ក្រុមហ៊ុនមួយនេះចោទប្រកាន់ថា ពួកគាត់ខ្ចីដីក្រុមហ៊ុនសង់ផ្ទះនៅទៅវិញ ព្រមទាំងគាបសង្កត់បង្ខំបង់ប្រាក់ឲ្យទៅក្រុមហ៊ុនចាប់ពី៣០០ទៅ៥០០ដុល្លារទើបអាចលក់ផ្ទះនោះបាន ។
ប្រជាពលរដ្ឋខាងលើបានឲ្យដឹងថា ក្រុមហ៊ុនពុះដីឡូត៍មួយនេះ មិនមានឈ្មោះឬស្លាកយីហោនោះឡើយ ដែលម្ចាស់ក្រុមហ៊ុននេះប្តីឈ្មោះហ៊ន ហេង មុខរបរជាយោធា ប៉ុន្តែអត់ដឹងថា មានឋានន្តរស័ក្តិប៉ុន្មាននិងមានតួនាទីអ្វីនៅអង្គភាពណាទេ មានប្រពន្ធឈ្មោះឈឿន សុវណ្ណារ៉ា ។ ក្រុមហ៊ុននេះ បានពុះដីឡូត៍ខាងលើ លក់នៅក្នុងឆ្នាំ២០១៤ ដោយបានអះអាងប្រាប់ពួកគាត់ដែលជាអតិថិជនថា ទីតាំងដីឡូត៍របស់ខ្លួនមានប្រព័ន្ធទឹក ប្រព័ន្ធភ្លើង មានទុកផ្លូវសម្រាប់ចេញចូលធំទូលាយ និងមានការផ្ទេរសិទ្ធិត្រឹមត្រូវផងដែរ ។
ដោយសារតែមើលឃើញពីស្ថានភាពជាក់ស្ដែង អាចរស់នៅបានបែបនេះ ទើបពួកគាត់ព្រមនាំគ្នាទិញយក លុះក្រោយពេលទិញរួចក្រុមហ៊ុនបានផ្ទេរសិទ្ធិឲ្យពួកគាត់នៅត្រឹមសង្កាត់ចោមចៅ ។ ដោយជំនាន់នោះមានការ ចុះហត្ថលេខាដឹងឮដោយលោកសុទ្ធ សាធ ចៅសង្កាត់ចោមចៅ បន្ទាប់មកពួកគាត់បានសាងសង់លំនៅដ្ឋានរស់នៅរហូតមកមកដល់សព្វថ្ងៃ មានរយៈពេល៦ឆ្នាំទៅហើយ។
ប្រភពខាងលើបានបញ្ជាក់បន្ថែមទៀតថា ដោយឡែករយៈពេល១ខែចុងក្រោយនេះស្រាប់តែមានរឿងហួសចិត្តកើតឡើងដោយម្ចាស់ក្រុមហ៊ុនពុះដីឡូត៌ខាងលើបានហាមឃាត់មិនឲ្យពួកគាត់ប្រើប្រាស់ផ្លូវនៅក្នុងប្លុកដីឡូត៌នោះឡើយ ។ព្រោះអ្នករកសុីពុះឡូត៌ខាងលើចង់យកផ្លូវនេះលក់ខណៈដីកាន់តែឡើងថ្លៃ។មិនតែប៉ុណ្ណោះថែមទាំងបានផ្ដាច់លែងឲ្យប្រើប្រាស់ទឹកតទៅទៀតឡើយ ជាងនេះទៀតក៏បានគាបសង្កត់មិនឲ្យពួកគាត់លក់ដូវផ្ទេរសិទ្ធិដីធ្លីនិងផ្ទះសម្បែងទេ ។
ព័ត៌មានពិស្តារមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ