ខេត្តកំពង់ចាម ៖ កន្លងមក កោះសន្តិភាពបានផ្សាយតាមពាក្យដំណាលពីចាស់ៗនូវអបិយជំនឿនានា ដោយបញ្ជាក់ថា វត្តកំពង់ត្រុំមានបារមីខ្លាំងពូកែណាស់ មន្ត្រីតូច-ធំទាំងឡាយដែលចូលវត្តកំពង់ត្រុំ បើមិនគោរព អុជធូបអោនលំទោនទេ ឬមានចរិតមិនល្អ…
ខេត្តកំពង់ចាម ៖ កន្លងមក កោះសន្តិភាពបានផ្សាយតាមពាក្យដំណាលពីចាស់ៗនូវអបិយជំនឿនានា ដោយបញ្ជាក់ថា វត្តកំពង់ត្រុំមានបារមីខ្លាំងពូកែណាស់ មន្ត្រីតូច-ធំទាំងឡាយដែលចូលវត្តកំពង់ត្រុំ បើមិនគោរព អុជធូបអោនលំទោនទេ ឬមានចរិតមិនល្អ នឹងត្រូវបារមីប្រកាន់អស់បុណ្យស័ក្តិក៏មាន ។ ព័ត៌មាននេះ ត្រូវបានព្រះចៅអធិការវត្តមានសង្ឃដីកាថា «មិនមានរឿងបែបនេះកើតមានទេ» ។
សូមបញ្ជាក់ថា វត្តសិរីសាគរ(កោះកំពង់ត្រុំ) ស្ថិតនៅភូមិកោះកំពង់ត្រុំ ឃុំកោះមិត្ត ស្រុកកំពង់សៀម ។ សព្វថ្ងៃនេះ តាមការសង្កេតដោយផ្ទាល់ មានសមិទ្ធផលជាច្រើន បានកកើតឡើងដោយសារតែមានការចូលរួមយ៉ាងផុលផុសពីសំណាក់ពុទ្ធបរិស័ទចំណុះជើងវត្ត ទាំងទីជិតទីឆ្ងាយ ។ ជាមួយនោះ នឹងត្រៀមបុណ្យកាន់អង្គនៅក្នុងពេលខាងមុខ មានវត្តមានឯកឧត្តមជាច្រើននាក់បានអញ្ជើញចូលរួមផងដែរ ។
កោះសន្តិភាពបានជួបផ្ទាល់ ជាមួយព្រះតេជគុណ ចន សុវណ្ណារ៉ុង ចៅអធិការវត្តកោះកំពង់ត្រុំ មានថេរដីកាឱ្យដឹង នាព្រឹកថ្ងៃទី១៣ ធ្នូ នេះថា កាលពីវេលាម៉ោង០៧យប់ថ្ងៃទី១១ ធ្នូ កន្លងមកទៅ ផេកកោះសន្តិភាពបានចុះផ្សាយតាមរយៈវីដេអូ60Buss ដោយលើកឡើងពីប្រវត្តិ «យាយទេព»ថា អ្នកតូចធំដែលបានមកធ្វើបុណ្យនៅវត្តនេះ ហើយពេលដែលត្រឡប់ទៅវិញនឹងធ្លាក់បុណ្យស័ក្តិនោះ គឺមិនមែនជាការពិតនោះឡើយ គឺមានតែឡើងយសស័ក្តិបន្ថែម ហើយប្រសិនបើមនុស្សមិនល្អមិនថាមកនេះនោះទេ តែងទទួលផលបានមកវិញដូចឱវាទរបស់ព្រះពុទ្ធ ដែលបានលើកឡើងថា «ធ្វើល្អបានល្អ ធ្វើអាក្រក់នឹងបានអាក្រក់» ដូច្នោះ ។
ព្រះចៅអធិការវត្តកោះកំពង់ត្រុំមានសង្ឃដីកាបន្តថា តាមដែលព្រះអង្គបានសួរនាំគណៈកម្មការវត្ត និងចាស់ទុំ មិនមានអ្នកណាលើកឡើងពីបារមីរបស់យាយទេព និងយាយម៉ៅនៅវត្តកោះកំពង់ត្រុំនេះទេ ។ ជាមួយនោះ នៅថ្ងៃទី១៣ ១៤ ១៥កើត ខែផល្គុន ឆ្នាំកុរឯកស័កពុទ្ធសករាជ២៥៦៣ ត្រូវនឹងថ្ងៃទី៦ ៧ ៨ មីនា ឆ្នាំ២០២០ នឹងមានរៀបចំបុណ្យកាន់អង្គពុទ្ធាភិសេក និងឆ្លងសមិទ្ធិនានា ហើយក៏សូមឱ្យពុទ្ធបរិស័ទចំណុះជើងវត្តជិតឆ្ងាយ មេត្តាចូលរួមឲ្យបានផលផុសទៅតាមសទ្ធាជ្រះថ្លារៀងៗខ្លួន ។
ចែករំលែកព័តមាននេះ