រាជធានីភ្នំពេញ ៖ ក្រោយការចាកចេញរបស់ជនជាតិចិនមួយចំនួនធំពីប្រទេសកម្ពុជា ជាពិសេសជនជាតិចិនដែលប្រកបអាជីវកម្មល្បែងអនឡាញនោះ ធ្វើអោយប្រជាជនដែលទទួលផលពីវត្តមានជនជាតិមួយចំនួនបាត់បង់ប្រយោជន៍ និងរងផលប៉ះពាល់ដល់ដល់ប្រាក់ចំណូលជាពិសេសក្នុងខេត្តព្រះសីហនុ និងក្រុងប៉ោយប៉ែត ដែលវត្តមានជនជាតិច្រើនជាងគេ ។ ក៏ប៉ុន្តែអ្នកធ្វើការពាក់ព័ន្ធនឹងវិស័យអចលទ្រព្យបានបង្ហាញនូវសុទិដ្ឋិនិយមថា អ្នកវិនិយោគចិននឹងត្រឡប់មកកម្ពុជាវិញ។
លោកម៉ឹង លាងហ៊ន អគ្គនាយកក្រុមហ៊ុនអចលនទ្រព្យ Family Real Estate បានអោយដឹងថា វត្តមានជនជាតិចិននៅកម្ពុជា បានហុចផលជាច្រើនដល់ប្រជាពលរដ្ឋកម្ពុជាទាំងផ្ទាល់និងប្រយោល ជាពិសេសក្នុងតំបន់ដែលមានវត្តមានជនជាតិចិនមករស់នៅនិងរកស៊ី ក៏ប៉ុន្តែក្រោយពេលរាជរដ្ឋាភិបាលកម្ពុជា បានប្រកាសបិទល្បែងអនឡាញនៅកម្ពុជា ធ្វើអោយជនជាតិចិនដែលធ្វើអាជីវកម្មល្បែងអនឡាញបានចាកចេញពីកម្ពុជា ជាបន្តបន្ទាប់ទៅប្រទេសកំណើតវិញ និងទៅប្រទេសទី៣ដែលផ្ដល់អំណោយផលដល់ពួកគេ ។
លោកបានបន្តថា សកម្មភាពចេញចូលរបស់ជនជាតិចិននៅកម្ពុជាហាក់លឿនពេក ចូលលឿនហើយចេញវិញក៏លឿនដែរ ។ នៅពេលចិនចូលមកកម្ពុជាយ៉ាងគំហុក វាក៏បានធ្វើអោយតម្លៃជួលនិងលក់អចលនទ្រព្យនៅតំបន់ដែលសំបូរជនជាតិចិនក៏ឡើងខ្ពស់ ធ្វើអោយចិនមួយចំនួនមិនសប្បាយចិត្ត ហើយនៅពេលគោលនយោបាយថ្មីរបស់រដ្ឋាភិបាលកម្ពុជាចេញមកភ្លាមចិនមួយចំនួនធំក៏សម្រុកចេញទៅវិញភ្លាមដែរ និងបានធ្វើអោយតម្លៃជួលនិងទិញលក់អចលនទ្រព្យបានធ្លាក់ចុះបន្តិចវិញ ជាក់ស្ដែងតម្លៃជួលអគារបន្ទប់ស្នាក់នៅ នៅខេត្តព្រះសីហនុធ្លាក់ចុះគួរអោយកត់សម្គាល់ ។
លោកបន្តថា «ការចាកចេញរបស់ជនជាតិចិនពីកម្ពុជាមិនយូរទេ ពួកគេនឹងត្រលប់មកវិញ ដោយមកជាមួយនឹងវិនិយោគបន្ថែមទៀតលើអចលនទ្រព្យ និងវិស័យផ្សេងៗមិនមែនមកប្រកបអាជីវកម្មល្បែងដូចចិនដែលទើបចាកចេញនោះទេ ។ នៅពេលចិនសម្រុកត្រលប់មកវិញ ការវិនិយោគនឹងកើនឡើង ហើយស្ថានភាពវិស័យអចលនទ្រព្យនឹងកាន់តែល្អប្រសើរ » ។
លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ ការចាកចេញរបស់ចិនវាហាក់ដូចជាមិនប៉ះពាល់អ្វីទេ ដល់ការវិនិយោគក្នុងប្រទេសកម្ពុជា ព្រោះចិនដែលចេញពីកម្ពុជាជាចិនលេងល្បែង ។ ផ្ទុយទៅវិញចិនដែលជាអ្នកវិនិយោគនឹងមកជំនួសវិញនៅពេលអនាគត ដូច្នេះការវិនិយោគនានានៅកម្ពុជានាពេលខាងមុខនឹងកាន់តែមានច្រើនឡើង ហើយកម្ពុជាត្រូវត្រៀមខ្លួនទទួលយកវិនិយោគិនទាំងនោះដើម្បីសហការរាល់គម្រោងវិនិយោគផ្សេងៗជាច្រើនទៀត ។
ដោយឡែកលោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ CPL បានលើកឡើងថា អ្វីដែលអ្នកក្នុងស្រុកត្រូវធ្វើនោះ និងត្រៀមខ្លួនទទួលយកវិនិយោគិនបន្ថែមទៀតនោះគឺ ត្រូវបណ្ដុះធនធានមនុស្សជំនាញ លើវិស័យនេះបន្ថែម ហើយត្រូវពង្រឹងសមត្ថភាពធនធានមនុស្សជំនាញអចលនទ្រព្យអោយកាន់តែខ្លាំង ។ លោកបានបន្តថា «កម្ពុជាជាប្រទេសមួយដែលមានសក្ដានុពលវិនិយោគខ្ពស់លើវិស័យអចលនទ្រព្យ ហើយក្នុងតំបន់អាស៊ាននេះ មិនមានប្រទេសណាមានស្ថានភាពល្អប្រសើរដូចកម្ពុជាឡើយ ទាំងកត្តាធនធានធម្មជាតិ និងទីតាំង ក៏ដូចជាឱកាសនៃការវិនិយោគ » ។
សូមរំលឹកថា រាជរដ្ឋាភិបាលកម្ពុជា បច្ចុប្បន្ននេះ ក៏បាននិងកំពុងផ្សព្វផ្សាយពីការទាក់ទាញវិនិយោគិនចិនមកបណ្ដាក់ទុនវិនិយោគលើវិស័យផ្សេងៗជាច្រើន ខណៈកំណើនសេដ្ឋកិច្ចរបស់ចិនបាននិងកំពុងនាំមុខគេក្នុងតំបន់ផងដែរ ។ ក្រៅពីការវិនិយោគរបស់ចិន ទេសចរចិនមកទស្សនានៅតាមតំបន់ទេសចរណ៍ នានាក្នុងប្រទេសកម្ពុជាក៏ជាប់ចំណាត់ថ្នាក់ទី១ដែរ ហើយក្រសួងទេសចរណ៍កម្ពុជាក៏បានរៀបចំយុទ្ធសាស្ត្រទាក់ទាញទេសចរចិនមកបន្ថែមទៀតផងដែរ ព្រោះចិនជាទេសចរដែលចេញក្រៅប្រទេសទៅទស្សនានៅប្រទេសផ្សេង ច្រើនជាងគេលើលោក ហើយប្រទេសនានាក៏ចង់បានទេសចរចិនទៅលេងប្រទេសខ្លួនផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ