ឥទ្ធិពលដែលបង្កពីបម្រែបម្រួលបរិស្ថានកំពុងតែអាចមើលឃើញកាន់តែច្បាស់ឡើងពីមួយថ្ងៃទៅមួយថ្ងៃ ខណៈដែលម៉ាស៊ីនកាន់តែមានភាពឆ្លាតវៃទៅ និងការព្រួយបារម្ភពីសង្គ្រាមអាវុធនុយក្លេអ៊ែរនៅតែមានក្នុងចំណោមមនុស្សជាច្រើន ។ ដោយហេតុដូចនេះ មហាសេដ្ឋីជាច្រើនគិតថាថ្ងៃអវសាននៃពិភពលោកនឹងកើតមានឡើង ហើយពួកគេបានងាកទៅសាងសង់បន្ទប់ក្រោមដីសម្រាប់ត្រៀមខ្លួនទុកថ្ងៃនោះ ។ បន្ទប់ក្រោមដីទាំងនេះថែមទាំងមានលក់លើទីផ្សារ និងត្រូវបានសាងសង់ស្រេចជាដើមដោយក្រុមហ៊ុនមួយចំនួនដែលចាប់អារម្មណ៍នឹងការភ័យព្រួយរបស់មហាសេដ្ឋី ។
ក្រុមហ៊ុន Vivos Group នៅរដ្ឋ California សហរដ្ឋអាមេរិកកំពុងតែសាងសង់បណ្តាញបន្ទប់ក្រោមដីសកលមួយសម្រាប់មហាសេដ្ឋីដែលមានទ្រព្យស្តុកស្តម្ភ ។ បន្ទប់ក្រោមដីដែលមានភាពប្រណីតជាងគេគឺ Europa One ដែលនៅប្រទេសអាល្លឺម៉ង់ ។ បន្ទប់ក្រោមដីនេះធ្លាប់ជាឃ្លាំងទុកឧបករណ៍យោធារបស់ទាហានសូវៀតក្នុងកំឡុងពេលសង្គ្រាមត្រជាក់ ។ អ្នកដែលបានទិញបន្ទប់ក្រោមដីនឹងទទួលបានបុគ្គលិកចាំបម្រើពេញម៉ោង និងក្រុមសន្តិសុខមួយថែមទៀត ។
បន្ទប់ទាំងនេះត្រូវបានសាងសង់ឡើងដើម្បីការពារឥទ្ធិពលពីការផ្ទុះអាវុធនុយក្លេអ៊ែរក្នុងចម្ងាយជិត ការធ្លាក់យន្តហោះ ការរញ្ជួយផែនដី ទឹកជំនន់ ឬសង្គ្រាមនានាជាដើម ។ បន្ទប់នីមួយៗមានពីរជាន់ ដែលមានបន្ទប់គេងជាច្រើន និងបន្ទប់ភាពយន្តថែមទៀត ។ ក្រៅពីកន្លែងស្នាក់នៅហើយ បន្ទប់ក្រោមដីមានកន្លែងលក់ផលិតផល ឬសេវាកម្មផ្សេងៗដែរដូចជាផាប់ ព្រមទាំងវិហារយេស៊ូជាដើម ។ ពេលដែលថ្ងៃអវសាននៃពិភពលោកកើតមានឡើង មហាសេដ្ឋីដែលបានទិញបន្ទប់ទាំងនេះត្រូវធ្វើដំណើរតាមរថយន្ត ឬយន្តហោះមកកាន់ប្រទេសអាល្លឺម៉ង់ ។ បន្ទាប់មកក្រុមហ៊ុន Vivos នឹងនាំពួកគេទៅកាន់លំនៅដ្ឋានថ្មីរបស់ខ្លួនតាមរយៈឧទ្ធមភាគចក្រ ។
ទោះវាជាគំនិតល្អសម្រាប់ការពារខ្លួន និងក្រុមគ្រួសារនៅថ្ងៃអនាគតពិតមែនក្តី តម្លៃរបស់វាប្រហែលជាឧបសគ្គសម្រាប់មនុស្សទូទៅ ។ បន្ទប់ឯកជនបែបអាផាតមិនមានតម្លៃចាប់ពី ២.៥ លានដុល្លារឡើងទៅ ខណៈដែលបន្ទប់ដែលចែករំលែកជាមួយអ្នកដទៃគិតថ្លៃ ៤ម៉ឺនដុល្លារសម្រាប់មនុស្សម្នាក់ ៕ កែសម្រួលដោយ ៖ សុឃាក់
ចែករំលែកព័តមាននេះ