ការលើសជាតិស្ករក្នុងឈាមកើតឡើងនៅពេលដែលមានជាតិស្ករច្រើនខុសធម្មតាកំពុងតែចរាចរណ៍ក្នុងចរន្តឈាម។ វាអាចធ្វើឲ្យខូចខាតដល់សរសៃប្រសាទ សរសៃឈាម និងសរីរាង្គជាច្រើនថែមទៀត។ករណីដែលទុកចោលយូរ ការលើសជាតិស្ករក្នុងឈាមខ្ពស់អាចបណ្តាលឲ្យកើតជំងឺបេះដូង ដាច់សរសៃឈាមខួរក្បាល ខ្វាក់ភ្នែក ខូចសរសៃប្រសាទ ជំងឺសរសៃប្រសាទ លិង្គមិនឡើងរឹង បញ្ហាពោះវៀនដូចជារាករូស ឬទល់លាមករ៉ាំរ៉ៃជាដើម។
ប្រភេទនៃការលើសជាតិស្ករក្នុងឈាម ៖
១-ការលើសជាតិស្ករក្នុងឈាមពេលមិនញ៉ាំអ្វីសោះ ៨ម៉ោង៖ កើតឡើងនៅពេលជាតិស្ករលើសពី ១៣០mg/dL ឡើងទៅ។
២- ការលើសជាតិស្ករក្នុងឈាមក្រោយញ៉ាំអីហើយ៖ កើតឡើងនៅពេលជាតិស្ករក្នុងឈាមលើសចាប់ពី ១៨០mg/dL ឡើងទៅ។
អាការៈដែលបញ្ជាក់ថាកំពុងតែលើសជាតិស្ករក្នុងឈាម ៖
១-ស្រេកទឹកខ្លាំង ឃ្លានខ្លាំង ឈឺពោះ និងស្រកទម្ងន់
២- ស្ងួតមាត់ និងស្ងួតស្បែក
៣- ជាតិស្ករក្នុងទឹកនោមមានខ្ពស់
៤- ឈឺក្បាល អស់កម្លាំង ឈឺប្រអប់ដៃ និងជើងឈៀបៗ
៥- នោមញឹក ជាពិសេសការដែលឧស្សាហ៍ចូលបន្ទប់ទឹកញឹកជាងធម្មតា
៦- អស់កម្លាំង ចង្អោ និងក្អួតគឺជាអាការៈញឹកញាប់
៧- បេះដូងលោតញ៉ាប់
៨- ជាតិស្ករក្នុងឈាមឡើងខ្ពស់ជាង ១៨០mg/dL
៩- ព្រឹលភ្នែកដោយសារតែជាតិស្ករលើសហើយកកជាប់កញ្ចក់ភ្នែកផ្នែកកណ្តាល
១០- ជំងឺអញ្ចាញធ្មេញក៏អាចធ្វើឲ្យជាតិស្ករក្នុងឈាមឡើងខ្ពស់ដែរ។
តើអ្វីទៅដែលធ្វើឲ្យជាតិស្ករក្នុងឈាមឡើងខ្ពស់?
១-តមអាហារ ឬភ្លេចចាក់ថ្នាំអាំងស៊ុយលីន
២- ស្ត្រេសគឺជាមូលហេតុចំបងមួយដែលនាំឲ្យជាតិស្ករក្នុងឈាមឡើងខ្ពស់
៣- កង្វះលំហាត់ប្រាណរាងកាយ
៤- ធ្វើលំហាត់ប្រាណខ្លាំងៗពេក
៥- ជំងឺ Diabetic Ketoacidosis កើតឡើងនៅពេលរាងកាយមិនទទួលបានអាំងស៊ុយលីនគ្រប់គ្រាន់
៦- ជំងឺរលាកលំពែង
៧- ជំងឺរលាកក្រពេញទីរ៉ូអ៊ីត
៨- កំពុងតែធាត់ជ្រុល ឬរស់នៅអសកម្ម។
តើនរណាខ្លះដែលប្រឈមខ្ពស់នឹងការលើសជាតិស្ករក្នុងឈាម?
១-ការលើសជាតិស្ករក្នុងឈាមកើតឡើងលើអ្នកដែលមានជំងឺទឹកនោមផ្អែម
២- វាក៏អាចកើតឡើងដែរបើសិនជាអ្នកមិនបានតាមដាន និងគ្រប់គ្រងជាតិស្ករល្អទេ
៣- ការញ៉ាំគ្រឿងស្រវឹងច្រើនពេកក៏អាចបង្កើនការប្រឈមនឹងការលើសជាតិស្ករក្នុងឈាមបានដែរ។
វិធីសាស្ត្រធម្មជាតិក្នុងការគ្រប់គ្រងជាតិស្ករក្នុងឈាម៖
១-ធ្វើទោតាមគម្រោងញ៉ាំអាហារ ឬគម្រោងរបបអាហារ ការហាត់ប្រាណទៀងទាត់ និងការពិគ្រោះជាមួយគ្រូពេទ្យជានិច្ច
២- តាមដានជាតិស្ករក្នុងឈាមជាទៀងទាត់
៣- ពិនិត្យជាតិស្ករក្នុងឈាមជារៀងរាល់ថ្ងៃដោយប្រើម៉ាស៊ីនតេស្តដែលណែនាំពីគ្រូពេទ្យ
៤- លេបថ្នាំដែលគ្រូពេទ្យបានចេញឲ្យប្រើ និងចៀសវាងពពួកថ្នាំ Steroids
៥- ចូរកាត់បន្ថយការញ៉ាំកាបូអ៊ីដ្រាត និងអាហារសម្បូរខ្លាញ់ក្នុងអាហារ
៦- ចូរពិនិត្យទម្ងន់ជានិច្ចផងដោយសារតែគម្រោងរបបអាហារនឹងជួយអ្នកស្រកទម្ងន់បាន។
ពេលដែលត្រូវទៅជួបពេទ្យ
បើសិនជាអាការៈនៃការលើសជាតិស្ករក្នុងឈាមដូចជា ស្រេកទឹកខ្លាំង អស់កម្លាំង ពិបាកដកដង្ហើម ឈឺពោះ នោមញឹក ចង្អោ និងក្អួតកើតឡើងជាប់យូរជាងពីរសប្តាហ៍ដោយមិនស្រាកស្រាន្ត និងធ្វើឲ្យអ្នកពិបាកធ្វើការរស់នៅប្រចាំថ្ងៃ វាគឺជាពេលវេលាដែលអ្នកត្រូវទៅជួបគ្រូពេទ្យដើម្បីពិនិត្យហើយ។ វាកាន់តែល្អបំផុតដែលត្រូវព្យាបាលរោគសញ្ញាក្នុងពេលមានអាការៈលើសជាតិស្ករក្នុងឈាមភ្លាមៗ ដើម្បីកុំឲ្យមានផលវិបាកច្រើន (ប្រភពពី៖ Health.com.kh)៕ (កែសម្រួលដោយ ៖ បុប្ផា)
ចែករំលែកព័តមាននេះ