ខេត្តកំពត ៖ ការគ្រប់គ្រងកាកសំណល់បានក្លាយជាបញ្ហាចម្បងនៅក្នុងព្រះរាជាណាចក្រកម្ពុជា ដោយការគ្រប់គ្រងសំណល់ឧស្សាហកម្មជាបញ្ហាប្រឈមក្នុងពេលដែលកំណើនសេដ្ឋកិច្ចកើនឡើងយ៉ាងរហ័ស ។ គម្រោងកែច្នៃសំណល់របស់ក្រុមហ៊ុន ជីប ម៉ុង អ៊ិនស៊ី ត្រូវបានបង្កើតឡើងក្នុងគោលបំណង កែច្នៃកាកសំណល់ឧស្សាហកម្មប្រកបដោយលក្ខណៈភាតរៈបរិស្ថាន និងទទួលបានការគាំទ្រពីក្រសួងបរិស្ថាន ។
ការគ្រប់គ្រងសំណល់បែបថ្មីនេះ គឺជាផ្នែកមួយនៃការប្តេជ្ញាចិត្តរបស់ក្រុមហ៊ុន ជីប ម៉ុង អ៊ិនស៊ី ស៊ីមេន ដើម្បីលើកកម្ពស់បរិស្ថានស្អាត នៅពេលដែលពិភពលោកកំពុងប្រឈមនឹងបញ្ហាយ៉ាងខ្លាំងនៃការឡើងកម្តៅផែនដី និងការប្រែប្រួលអាកាសធាតុ ។
ជាមួយគ្នានេះ នៅថ្ងៃទី៥ ខែធ្នូ ឆ្នាំ២០១៩ មកនេះ រោងចក្រស៊ីម៉ងត៍ ជីប ម៉ុង អ៊ិនស៊ី ស៊ីមេន (CMIC) ដែលជារោងចក្រផលិតស៊ីម៉ងត៍ធំជាងគេនៅក្នុងព្រះរាជាណាចក្រកម្ពុជា និងឈានមុខគេមួយនៅក្នុងតំបន់ បានរៀបចំពិធីសម្ពោធគម្រោងកែច្នៃសំណល់ឧស្សាហកម្មនៅក្នុងរោងចក្រស៊ីម៉ងត៍ ជីប ម៉ុង អ៊ិនស៊ី ដែលស្ថិតនៅក្នុងស្រុកបន្ទាយមាស ខេត្តកំពត ក្រោមវត្តមានឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ។
លោក នីកូឡាស់ ចច (Nicolas George) នាយកប្រតិបត្តិនៃក្រុមហ៊ុន ជីប ម៉ុង អ៊ិនស៊ី ស៊ីមេន (CMIC) បានឱ្យដឹងថា ការសម្ពោធគម្រោងកែច្នៃសំណល់នេះបង្ហាញថា ក្រុមហ៊ុន ជីប ម៉ុង អ៊ិនស៊ី បានឈានដល់ដំណាក់កាលសំខាន់មួយទៀត គឺឆ្ពោះទៅការរួមចំណែកក្នុងការកែលម្អបរិស្ថាននៅកម្ពុជា ។
ឥឡូវនេះ រោងចក្ររបស់យើងត្រូវបានបំពាក់ដោយបច្ចេកវិទ្យាទំនើបចុងក្រោយ ដើម្បីគ្រប់គ្រងកាកសំណល់ឧស្សាហកម្ម និងកាត់បន្ថយការប៉ះពាល់ដល់បរិស្ថាន ។ ខ្ញុំជឿជាក់ថា ការបណ្តាក់ទុនថ្មីនេះនឹងបង្ហាញឲ្យឃើញពីភាពជោគជ័យអស្ចារ្យ និងផ្តល់អត្ថប្រយោជន៍ដល់ដៃគូពាក់ព័ន្ធទាំងអស់របស់យើង ។ លើសពីនេះទៀត ក្រុមហ៊ុន CMIC បានបង្ហាញការប្តេជ្ញាចិត្តរបស់ខ្លួន ក្នុងការអភិវឌ្ឍឧស្សាហកម្មស៊ីម៉ងត៍ប្រកបដោយចីរភាព ។
ការគ្រប់គ្រងកាលសំណល់នេះ មានរួមទាំងការប្រមូល និងដំណើរការនៃការកែឆ្នៃសំណល់រឹងដែលនឹងផ្តល់ដំណោះស្រាយដល់រោងចក្រកាត់ដេរ និងរោងចក្រស្បែកជើងក៏ដូចវិស័យផ្សេងៗទៀតដែរ ។
លោកឧកញ៉ា លាង ឃុន ម្ចាស់ភាគហ៊ុនធំក្រុមហ៊ុន ជីបម៉ុង អ៊ិនស៊ី ស៊ីមេន ខបភើរេសិន បានមានប្រសាសន៍ថា គម្រោង ជីប ម៉ុង អេកូសាយខល ដែលផ្តួចផ្តើមបង្កើតឡើងនៅដើមឆ្នាំ ២០១៩ នេះ បានទទួលការគាំទ្រ ពីក្រសួងបរិស្ថាន ដែលអនុញ្ញាតឱ្យក្រុមហ៊ុន ជីប ម៉ុង អ៊ិនស៊ី «ប្រមូល ដឹកជញ្ជូន ស្តុកទុក និងដុតកំទេចសំណល់ឧស្សាហកម្ម»។ យើងបានចំណាយប្រាក់វិនិយោគអស់ជាង ៤ លានដុល្លារអាមេរិកលើគម្រោងនេះ ។ ឡ អេកូសាយខល មានសមត្ថភាពដុតកំទេចសំណល់ឧស្សាហកម្មក្នុងបរិមាណ ១០ តោនក្នុងមួយម៉ោង ឬ ២៤០ តោនក្នុង ១ថ្ងៃ ឬក៏ជាង ៧០០០ តោនក្នុង ១ ខែ ។
លោកឧកញ៉ាបន្តថា ជីប ម៉ុង អេកូសាយខល ជាគម្រោងថ្មីមួយស្ថិតនៅក្រោមដំបូលរបស់ក្រុមហ៊ុនជីបម៉ុង អ៊ិនស៊ី ស៊ីមេន ត្រូវបានប្រសូតចេញពីការវិនិយោគទុនរួមគ្នាក្នុងទឹកប្រាក់ ២៦២ លានដុល្លារអាមេរិក ក្នុងនោះ ៦០% មកពីក្រុមហ៊ុន ជីប ម៉ុង ដែលជាក្រុមហ៊ុនក្នុងស្រុកដ៏ធំមួយ និងមានបទពិសោធន៍ជិត ៤០ ឆ្នាំ ក្នុងវិស័យសំណង់ និងវិស័យចែកចាយលើទីផ្សារ និង ៤០% ទៀតមកពីក្រុមហ៊ុនស្យ៉ាម ស៊ីធី ស៊ីមេន (SCCC) នៃព្រះរាជាណាចក្រថៃ ដែលជាក្រុមហ៊ុនដ៏ធំសម្បើមមានបទពិសោធន៍ជាង ៥០ ឆ្នាំ ក្នុងការផលិតស៊ីម៉ងត៍ ។
លោកឧកញ៉ាបន្ថែមទៀតថា ក្រុមហ៊ុន ជីប ម៉ុង អ៊ិនស៊ី ពិតជាមានមោទកភាពណាស់ចំពោះគម្រោងកែច្នៃសំណល់របស់ខ្លួន ដែលជាដំណោះស្រាយនៃការគ្រប់គ្រងសំណល់ឧស្សាហកម្មប្រកបដោយនិរន្តរភាពដំបូងគេនៅប្រទេសកម្ពុជា។ គម្រោង ជីប ម៉ុង អេកូសាយខល នេះអាចកែច្នៃកាកសំណល់ដែលមានគ្រោះថ្នាក់ និងមិនមានគ្រោះថ្នាក់ ដោយប្រើបច្ចេកវិទ្យាថ្មីមួយដែលគេហៅថា «ខូ-ប្រូសេសស៊ីង (co-processing)» ។ «ខូ ប្រូសេសស៊ីង» គឺជាពាក្យបច្ចេកទេសប្រើសម្រាប់ការកំចាត់កាកសំណល់ឧស្សាហកម្មតាមរយៈការដុតដោយឡស៊ីម៉ងត៍ ស្របពេលដែលកំពុងដំណើរការផលិតស៊ីម៉ងត៍ ដោយមិនប៉ះពាល់ដល់ប្រសិទ្ធភាពណាមួយឡើយ ។
បច្ចេកវិទ្យា «ខូ-ប្រូសេសស៊ីង» គោរពតាមលក្ខខណ្ឌច្បាប់ទាំងអស់ហើយត្រូវបានអនុម័តជាសកល សម្រាប់ការគ្រប់គ្រងកាកសំណល់ឧស្សាហកម្ម។ បច្ចេកវិទ្យានេះត្រូវបានគេមើលឃើញថា ជាជម្រើសល្អប្រសើរជាងការយកកាកសំណល់ទៅចាក់ចោល និងការយកទៅដុតចោលធម្មតា ពីព្រោះវាផ្តល់នូវដំណោះស្រាយពេញលេញដោយមិនបង្កផលប៉ះពាល់ដល់បរិស្ថាន។
បច្ចេកវិទ្យានេះ ត្រូវបានប្រើប្រាស់ដោយជោគជ័យនៅសហរដ្ឋអាមេរិក សហភាពអឺរ៉ុប និងជប៉ុន អស់រយៈពេលជាង ៤០ ឆ្នាំ ។ វាត្រូវបានទទួលស្គាល់ដោយអង្គការអន្តរជាតិជាច្រើន រួមទាំងអង្គការសុខភាពពិភពលោក និងអង្គការ (ជីធីហ្សិត) GTZ ក៏ដូចជាអនុសញ្ញា បាសែល (Basel) និង ស្តុកខុម (Stockholm) ។
ឯកឧត្តម សាយ សំអាល់ ដែលជាអធិបតីក្នុងពិធីនេះ ក្រៅពីលើកទឹកចិត្តដល់ក្រុមហ៊ុន ជីប ម៉ុងហើយនោះឯកឧត្តមថែមទាំងមានប្រសាសន៍ថា ថ្ងៃនេះក្រុមហ៊ុន ជីប ម៉ុង បានចូលរួមជាមួយក្រសួងបរិស្ថាន ក្នុងការកែឆ្នៃកាកសំណល់ដែលជាបញ្ហាធំរបស់ក្រសួងបរិស្ថាន ព្រោះថាបើយើងយកទៅបោះចោលនៅទីលានចាក់សំរាមមានការលំបាក ក៏ប៉ុន្តែរបស់ទាំងអស់នេះ នៅមានតម្លៃដែលអាចប្រើប្រាស់បាន ។ ដូច្នេះក្រុមហ៊ុន ជីប ម៉ុង ជួយក្រសួងបរិស្ថានក្នុងការដកសំរាមចេញពីទីលានចាក់សំរាមជាច្រើនដែលយកមកពីភ្នំពេញ និងកំពង់សោម ដែលទាំងនេះជាការចូលរួមចំណែកធំណាស់ក្នុងវិស័យបរិស្ថាន ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ