ខេត្តកំពង់ឆ្នាំង ៖ ក្រុមអាជីវករលក់ដូរនៅផ្សារព្រៃខ្មែរ ស្ថិតក្នុងឃុំអណ្តូងស្នាយ ស្រុករលាប្អៀរ បានត្អូញត្អែរថា រយៈពេលជាងកន្លះខែមកហើយ ដែលទឹកដក់ពេញមុខផ្សារព្រៃខ្មែរជាប់នឹងផ្លូវជាតិលេខ៥ មិនត្រូវបានអាជ្ញាធរ ឬមន្ត្រីជំនាញណាមើលឃើញឡើយ ។ ទឹកដក់ដែលបណ្តាលមកពីស្ទះលូមិនហូរចេញនេះបានបង្កឲ្យទៅស្អុយទ្រាំស្ទើរមិនបាន ។ ជាងនេះទៅទៀតពួកគាត់លក់ដូរក៏លែងដាច់ដែរ ព្រោះតែទឹកដ៏កខ្វក់នេះបណ្តាលឲ្យអតិថិជនមិនចូលទិញទំនិញពួកគាត់ឡើយ ។
បុរសជាអាជីវករម្នាក់បានឲ្យដឹងថា ចាប់តាំងពីទឹកដក់ដែលបណ្ដាលមកពីស្ទះលូរយៈពេលជាងកន្លះខែមកនេះ ពួកគាត់លក់មិនដាច់ទាល់តែសោះ ព្រោះអតិថិជនមិនដើរចូលមកដោយសារទឹកដក់គ្មានកន្លែងដើរចូល និងម្យ៉ាងវិញទៀតទឹកដក់ទាំងនោះបង្កទៅជាភក់ជ្រាំស្អុយ សូម្បីតែពួកគាត់ក៏ពិបាកទ្រាំដែរ ។
ចំណែកបុរសអ្នកលក់គុយទាវម្នាក់ នៅជាប់នឹងកន្លែងដក់ទឹកមុខផ្សារព្រៃខ្មែរក៏បាននិយាយដូចគ្នាដែរថា ទឹកដក់នេះប្រមាណជិត១ខែមកហើយ ដែលបង្កឡើងដោយសារស្ទះលូ ។ ទឹកដក់ទាំងនេះ គឺហូរចេញពីតាមផ្ទះដែលនៅជុំវិញផ្សារវាជាទឹកចេញពីបន្ទប់ និងបង្គន់អនាម័យផងដែរទើបមានក្លិនស្អុយបែបនេះ ។ ចាប់តាំងពីពេលមានទឹកដក់រហូតមកដល់ពេលនេះមិនឃើញអ្នកម៉ៅការភាស៊ីផ្សារមកកាយ ឬបង្ហូរទឹកនោះចេញឡើយ ចំណែកអាជ្ញាធរឃុំឃើញមកមើលប៉ុន្មានថ្ងៃមុនដែរ ហើយក៏ស្ងាត់ឈឹង ។ ពួកគាត់ជាអាជីវករនៅជាប់កន្លែងដក់ទឹក ម្នាក់ៗចង់ដាច់បាយហើយព្រោះលក់មិនដាច់ ។ ពួកគាត់សំណូមពរដល់អាជ្ញាធរមន្ទីរសាធារណការខេត្ត អាជ្ញាធរឃុំ ស្រុកសូមមេត្តាជួយកាយបង្ហូរទឹកស្អុយនេះចេញផង ។
ជុំវិញបញ្ហានេះ ភ្នាក់ងារយើងបានទាក់ទងទៅលោក សេន សារ៉េត មេឃុំអណ្តូងស្នាយ តាមរយៈទូរស័ព្ទនៅព្រឹកថ្ងៃទី០៥ ខែធ្នូនេះ លោកបានបញ្ជាក់ថា កាលពីជាងកន្លះខែមុន មានគេសង់រោងការមួយកន្លែង ហើយក៏ចាក់ដីលុបលូបង្ហូរទឹកបណ្តាលឲ្យទឹកស្ទះព្រមជាមួយគ្នានេះក្រុមដែលជាងជួសជុលផ្លូវជាតិលេខ៥ បានកាប់ដើមឈើធ្លាក់ចូលក្នុងប្រឡាយនោះថែមទៀត បណ្ដាលឲ្យស្ទះកាន់តែខ្លាំង ។ ក្រោយពីទទួលព័ត៌មាននេះ គាត់បានចុះពិនិត្យមើលរួចហើយឃើញថា លុះត្រាតែយកគ្រឿងចក្រមកជីកស្តាប្រឡាយនៅផ្នែកខាងជើងផ្សារដែលជាកន្លែងស្ទះនោះឲ្យបន្តហូរធ្លាក់ទៅក្រោម ។ ប៉ុន្តែរយៈពេលប៉ុន្មានថ្ងៃនេះគាត់រកគ្រឿងចក្រមិនបានសោះ ដោយម្ចាស់គ្រឿងចក្រជាប់រវាល់គ្រប់កន្លែងតែមានម្ចាស់គ្រឿងចក្រ១កន្លែងបានសន្យាថា និងទៅស្តាប្រឡាយចំណុចស្ទះនោះនៅស្អែក ឬក៏ខានស្អែកនេះហើយ ៕ កែសម្រួលដោយ ៖ សុឃាក់
ចែករំលែកព័តមាននេះ