យុវជនកម្ពុជាម្នាក់រត់ចម្ងាយ ៣១៤ គីឡូម៉ែត្រ ដើម្បីជួយសង្គ្រោះជីវិតកុមារ
- ភ្នំពេញ
រាជធានីភ្នំពេញ, ថ្ងៃទី ០១ ខែធ្នូ ឆ្នាំ ២០១៩ ៖ លោក នឹម ឈុន្នី…
រាជធានីភ្នំពេញ, ថ្ងៃទី ០១ ខែធ្នូ ឆ្នាំ ២០១៩ ៖ លោក នឹម ឈុន្នី…
រាជធានីភ្នំពេញ, ថ្ងៃទី ០១ ខែធ្នូ ឆ្នាំ ២០១៩ ៖ លោក នឹម ឈុន្នី គឺជាយុវជនខ្មែរដ៏ល្បីល្បាញមួយរូបខាងដឹកនាំធ្វើសមាធិ និងរត់តែម្នាក់ឯងពីរាជធានីភ្នំពេញ មកកាន់ទឹកដីក្រុងសៀមរាបអង្គរនៅក្នុងខែធ្នូនេះ ដើម្បីរៃអង្គាសថវិកាជួយសង្គ្រោះជីវិតកុមារកម្ពុជា ។
លោកនឹងរត់ថ្មើរជើងសរុបចម្ងាយ ១៩៨ ម៉ាយ គឺស្មើនឹង ៣១៤ គីឡូម៉ែត ក្នុងរយៈពេល ១០ ថ្ងៃដោយចាប់ផ្តើមពីថ្ងៃទី ១៥ ដល់ថ្ងៃទី ២៥ ខែធ្នូ ឆ្នាំ២០១៩ ដើម្បីចូលរួមចំណែកស្វែងរកមូលនិធិគាំទ្រដល់មន្ទីរពេទ្យកុមារអង្គរ ខេត្តសៀមរាប ដែលកម្មវិធីនេះ មានឈ្មោះថា “Running for Children’s Lives Cambodia 2019” ជាកម្មវិធីដ៏ធំដំបូងបង្អស់នៃព្រឹត្តិការណ៍រៃអង្គាសថវិកាជាច្រើននៅក្នុងព្រះរាជាណាចក្រកម្ពុជា ។
កម្មវិធី Running for Children’s Lives Cambodia 2019 មានគោលបំណងរៃអង្គាសថវិកាឲ្យបានចំនួន ១០ ម៉ឺនដុល្លារអាមេរិកពីសប្បុរសជននានាទាំងក្នុង និងក្រៅប្រទេស តាមរយៈប្រព័ន្ធអ៊ីនធើរណេត និងការបរិច្ចាគថវិកាដោយផ្ទាល់មកកាន់កម្មវិធីនេះ ក្រោមការគ្រប់គ្រងប្រកបដោយវិជ្ជាជីវៈ និងតម្លាភាព នៃក្រុមបុគ្គលិកផ្នែកហិរញ្ញវត្ថុរបស់មន្ទីរពេទ្យកុមារអង្គរ ។
មូលនិធិដែលទទួលបានពីកម្មវិធីនេះ នឹងត្រូវបានយកមកប្រើប្រាស់ក្នុងការផ្តល់សេវាសុខភាពជួយសង្គ្រោះជីវិតកុមារកម្ពុជា មកពីគ្រប់ទិសទីនៃព្រះរាជាណាចក្រកម្ពុជាយ៉ាងតិច ៤០០ នាក់ក្នុងមួយថ្ងៃៗ នៅក្នុងមន្ទីរពេទ្យកុមារអង្គរដោយឥតគិតកម្រៃ ប្រកបដោយគុណភាពខ្ពស់ និងក្តីមេត្តាករុណា ។ អស់រយៈពេលពីរទស្សវត្សរ៍កន្លងមក មន្ទីរពេទ្យបានក្លាយទៅជាស្ថាប័នដ៏សំខាន់មួយដែលបានបម្រើសេវាពិនិត្យ ព្យាបាល និងថែទាំសុខភាពដល់កុមារកម្ពុជា ជាង ២ លាន ៥ សែនករណី និងផ្តល់ការបណ្តុះបណ្តាលវេជ្ជសាស្ត្រដល់មន្ត្រីសុខាភិបាលកម្ពុជារាប់រយនាក់នៅទូទាំងប្រទេស ព្រមទាំងបានផ្តល់ការអប់រំអំពីការការពារសុខភាពដល់ប្រជាពលរដ្ឋរាប់ពាន់នាក់ទូទាំងខេត្តសៀមរាប ក្នុងមួយឆ្នាំៗ ។
ព្រឹត្តិការណ៍រៃអង្គាសមូលនិធិជាលក្ខណៈឯកជនធំជាងគេបំផុតនេះ ផ្តួចផ្តើមឡើងដោយលោក នឹម ឈុន្នី ដោយផ្ទាល់ក្រោមកិច្ចសហការរៀបចំដោយមន្ទីរពេទ្យកុមារអង្គរ ព្រមទាំងមានការចូលរួមឧបត្ថម្ភគាំទ្រពីសំណាក់បុគ្គលល្បីៗនៅក្នុងព្រះរាជាណាចក្រកម្ពុជា ដូចជាអត្តពលិកអូឡាំពិក ក្រុមហ៊ុនឯកជន ក្រុមយុវជន និងសារព័ត៌មានផ្សព្វផ្សាយជាច្រើនទៀតជាដើម ដើម្បីពង្រីកការផ្សព្វផ្សាយឲ្យមានការចូលរួមជាសាធារណៈ ។
«ខ្ញុំមិនដែលភ្លេចទេ ចំពោះភាពរាក់ទាក់យ៉ាងកក់ក្តៅ និងការយកចិត្តទុកដាក់ នូវការផ្តល់សេវាកម្មថែទាំប្រកបដោយវិជ្ជាជីវៈរបស់បុគ្គលិកមន្ទីរពេទ្យកុមារអង្គរ ដែលក្មួយស្រីរបស់ខ្ញុំ កញ្ចនា និងខ្ញុំផ្ទាល់ទទួលបានកាលពី ៧ ឆ្នាំមុន ។ កាលណោះ កញ្ចនា កើតមកខុសប្លែកពីក្មេងដទៃ ។ ពួកយើង ពុំបានចាប់អារម្មណ៍ថា នាងមិនអាចដើរបានទេ រហូតដល់នាងមានអាយុប្រហែល ២ ឆ្នាំ» ។
លោក ឈុន្នី បាននិយាយបន្តថា «យើងបាននាំនាងទៅកាន់មន្ទីរពេទ្យជាច្រើនដើម្បីព្យាបាលតែពុំមានលិទ្ធភាពអាចជួយនាងបានទេ ។ ពីរឆ្នាំក្រោយមកទើបយើងរកឃើញមន្ទីរពេទ្យកុមារអង្គរ ដែលបានជួយក្មួយស្រីរបស់ខ្ញុំរកឃើញក្តីសង្ឃឹមឡើងវិញ ហើយទីបំផុតនាងក៏អាចដើរបានប្រសើរជាងមុន» ។ ពេលនេះកុមារី កញ្ចនា មានអាយុ ៩ ឆ្នាំហើយ នាងមានសុខភាពល្អ ហើយអាចដើរបានប្រសើរជាងមុន ។
លោក ឈុន្នី បានបន្តរទៀតថា បន្ទាប់ពីបានឆ្លងកាត់រឿងរ៉ាវដ៏អស្ចារ្យនេះ គាត់ក៏បានចាប់ផ្តើមការងារស្ម័គ្រចិត្តដើម្បីជួយដល់មន្ទីរពេទ្យតាមរយៈព្រឹត្តិការណ៍ផ្សេងៗជាច្រើន ជាពិសេសនៅក្នុងឆ្នាំ ២០១៩ នេះ ដោយមើលឃើញពីតម្រូវការសំខាន់ធំៗកើតឡើងជាបន្តបន្ទាប់របស់មន្ទីរពេទ្យកុមារអង្គរ គាត់ក៏បានសម្រេចចិត្តបង្កើតព្រឹត្តិការណ៍ជាលក្ខណៈឯកជនដ៏ធំនេះឡើង។
«វាមិនត្រឹមតែជួយដល់មន្ទីរពេទ្យប៉ុណ្ណោះទេ តែវាថែមទាំងជួយដល់ជីវិតកុមារកម្ពុជាជាច្រើននាក់ និងបំពេញនូវសេចក្តីសង្ឃឹមរបស់ពួកគេផងដែរ ។ ប្រសិនបើខ្ញុំមើលឃើញស្នាមញញឹម និងភាពមានសង្ឃឹម លើផ្ទៃមុខរបស់ក្មួយស្រី និងគ្រួសារទាំងមូលបាន ខ្ញុំក៏ចង់ឲ្យកុមារកម្ពុជាដទៃទៀត និងក្រុមគ្រួសាររបស់ពួកគេ ទទួលបានសេចក្តីរំភើបរីករាយនេះដូចគ្នា» ។
អំពីមន្ទីរពេទ្យកុមារអង្គរ
មន្ទីរពេទ្យកុមារអង្គរ គឺជាអង្គភាពមិនស្វែងរកប្រាក់ចំណេញ ដែលមានបេសកកម្មលើកកម្ពស់សុខុមាលភាពកុមារកម្ពុជាគ្រប់រូប ។ មន្ទីរពេទ្យកុមារអង្គរ បានផ្តល់នូវការយកចិត្តទុកដាក់ក្នុងការពិនិត្យព្យាបាល និងថែទាំសុខភាពដល់កុមារកម្ពុជា ប្រកបដោយក្តីមេត្តាករុណា អស់រយៈពេល ២០ ឆ្នាំ ចាប់តាំងពីឆ្នាំ ១៩៩៩ ។
បច្ចុប្បន្ននេះ មន្ទីរពេទ្យកុមារអង្គរ បានក្លាយខ្លួនទៅជាមជ្ឈមណ្ឌលមួយផ្តល់ជូននូវសេវាកម្មផ្នែកសុខភាពប្រកបដោយគុណភាពខ្ពស់ និងជំនាញឯកទេសវិជ្ជាជីវៈដល់កុមារនៅក្នុងប្រទេសកម្ពុជា អមដោយការប្តេជ្ញាចិត្តក្នុងការបណ្តុះបណ្តាលវេជ្ជសាស្ត្របន្តពង្រីកការអភិវឌ្ឍន៍សមត្ថភាពចំណេះដឹងទៅខាងក្រៅមន្ទីរពេទ្យ ព្រមទាំងដើរតួនាទីជាអង្គភាពគំរូដែលមានភិបាលកិច្ចគណនេយ្យភាពល្អប្រសើរ។
តាមរយៈទិន្នន័យនៃការស្រាវជ្រាវ និងគោលនយោបាយបានបង្ហាញឲ្យឃើញថា មន្ទីរពេទ្យកុមារអង្គរកំពុងតែជួយសង្គ្រោះជីវិតកុមារកាន់តែទូលំទូលាយ តាមរយៈការពង្រឹងប្រព័ន្ធថែទាំសុខភាព និងធ្វើឲ្យប្រសើរឡើងនូវសុខុមាលភាពកុមារក្នុងតំបន់ និងអន្តរជាតិ ។
អំពី លោក នឹម ឈុន្នី
លោក នឹម ឈុន្នី គឺជាគ្រូដឹកនាំធ្វើសមាធិនៅ Impact Hub Phnom Penh និងជាស្ថាបនិក ព្រមទាំងគ្រូបណ្តុះបណ្តាលនៅក្រុមហ៊ុន VIPASSA។ លោក ឈុន្នី ក៏ជាអ្នកនិពន្ធសៀវភៅដ៏ពេញនិយម និងលក់ដាច់បំផុតនៅក្នុងប្រទេសកម្ពុជា មានឈ្មោះថា «សមាធិដើម្បីថាមពលជីវិត» ។ បច្ចុប្បន្នគាត់ក៏ជាសមាជិកក្រុមប្រឹក្សាផ្តល់យោបល់ផ្នែទំនាក់ទំនង នៃការិយាល័យទំនាក់ទំនងសាធារណៈប្រចាំប្រទេសកម្ពុជារបស់មន្ទីរពេទ្យកុមារអង្គរ ។
លេខទំនាក់ទំនង ៖
អ្នកស្រី ស៊ិនកេត អរុណ ប្រធានការិយាល័យទំនាក់ទំនងសាធារណៈប្រចាំប្រទេសកម្ពុជា
Email: arun@angkorhospital.org / Tel: ០១២ ២៣ ២៣ ៨៨ / Website: angkorhospital.org
លោក នឹម ឈុន្នី អ្នកដឹកនាំគម្រោងរៃអង្គាសមូលនិធិ Running for Children Lives Cambodia 2019 និង ជាស្ថាបនិកក្រុមហ៊ុន VIPASSA
Email: chhunny@annakotasia.com / Tel: ០៧៨ ៧៨៥ ០៤៤ / Website: anakotasia.com ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ