រថយន្ត Mazda MX-5 គឺជារថយន្តដែលមានទម្ងន់ស្រាល ស្រួលបើកបរ ដែលមានម៉ាស៊ីនសាំងស៊ីឡាំងបួន ។ ម៉ាស៊ីនប្រភេទនេះ គឺគ្រប់គ្រាន់សម្រាប់ការបើកបរ ដែលធ្វើឱ្យរថយន្តនេះល្បីសម្រាប់ការរីករាយនឹងបើកបរ។ នៅពេលនេះសារព័ត៌មាន Autocar បានផ្សាយថា គេគ្រោងនឹងផលិតរថយន្តនេះឱ្យទៅជារថយន្ត Hybrid ឬ រថយន្តអគ្គិសនីសុទ្ធតែម្តង ហើយវានឹងមិនយូរទៀតនោះទេ។
ថ្នាក់លើនៅក្រុមហ៊ុន Mazda បច្ចុប្បន្នបានចូលរួមនៅក្នុងកិច្ចពិភាក្សាអំពីវិធីធ្វើឱ្យ MX-5 កាន់តែប្រសើរ និង ធ្វើវាឱ្យទៅជារថយន្តអគ្គិសនី។ លោក Ichiro Hirose ដែលទទួលបន្ទុកផ្នែកស្រាវជ្រាវនិងអភិវឌ្ឍន៍នៅក្រុមហ៊ុន Mazda មានប្រសាសន៍ថា៖«ទំងន់ស្រាលនិងទំហំតូច នៅតែជាធាតុយ៉ាងសំខាន់សម្រាប់រថយន្ត Mazda MX-5 បើទោះបីជាយើងនឹងធ្វើវាឱ្យទៅជារថយន្តអគ្គិសនីក៏ដោយ។ យើងត្រូវប្រាកដថា វាមានទម្ងន់ស្រាល»។
នេះគឺដូចជាក្រុមហ៊ុនរថយន្ត Porsche ដែរ ព្រោះតែក្រុមហ៊ុន Porsche ធ្វើឱ្យរថយន្តស្ព័ររបស់ខ្លួនអាចនៅរក្សាចំណុចសំខាន់ៗដដែល បើទោះបីជាមានម៉ាស៊ីនអគ្គិសនី។ ដោយសារតែមូលហេតុនេះហើយ បានជាអ្នកគាំទ្រនៅតែបន្តគាំទ្រ ហើយរង់ចាំទិញមិនជិនណាយ។
ក្រុមហ៊ុន Mazda ក៏បានទទួលស្គាល់ពីការផ្លាស់ប្តូរគំនិតរបស់អ្នកទិញរថយន្តស្ព័រផងដែរ។ ប្រធានផ្នែករចនានិងរចនាលោក Ikuo Maeda បានពង្រីកលើចំណុចនេះ ដោយនិយាយថា៖ «ចំណូលចិត្តរបស់មនុស្សដែលចូលចិត្តបើកបររថយន្តស្ព័រ អាចនឹងមានការផ្លាស់ប្តូរដូច្នេះយើងត្រូវគិតអំពីអ្វីដែលសង្គមកំពុងឆ្ពោះទៅមុខ»។
គួរបញ្ជាក់ផងដែរថា ការផ្លាស់ប្តូរម៉ាស៊ីនរថយន្ត MX-5 គ្រាន់តែជាផ្នែកតូចមួយ សម្រាប់ការធ្វើឱ្យកាន់តែទំនើបប៉ុណ្ណោះ។ នៅថ្ងៃអនាគត រថយន្តនឹងមានលក្ខណៈកាន់តែខុសប្លែកពីពេលបច្ចុប្បន្ន ៕
ចែករំលែកព័តមាននេះ