ខេត្តមណ្ឌលគិរី ៖ សិក្សានុសិស្សជិត១០០នាក់ បានទទួលការអប់រំពន្យល់ណែនាំ អំពីអត្ថប្រយោជន៍សត្វព្រៃ និងជីវៈចម្រុះ កាលពីល្ងាចថ្ងៃទី៣០ វិច្ឆិកា ពីមន្ត្រីបរិស្ថានខេត្តមណ្ឌលគិរី សហការជាមួយអាជ្ញាធរមូលដ្ឋាន…
ខេត្តមណ្ឌលគិរី ៖ សិក្សានុសិស្សជិត១០០នាក់ បានទទួលការអប់រំពន្យល់ណែនាំ អំពីអត្ថប្រយោជន៍សត្វព្រៃ និងជីវៈចម្រុះ កាលពីល្ងាចថ្ងៃទី៣០ វិច្ឆិកា ពីមន្ត្រីបរិស្ថានខេត្តមណ្ឌលគិរី សហការជាមួយអាជ្ញាធរមូលដ្ឋាន ប្រជាសហគមន៍ស្រែអ៊ី និងលោកនាយកសាលាបឋមសិក្សាស្រែអ៊ី ដោយបានបង្ហាញប្អូនៗសិស្សានុសិស្សឲ្យបានឃើញ និងបានយល់ពីកត្តាគំរាមកំហែងរបស់ជម្រកសត្វព្រៃ អត្ថប្រយោជន៍សត្វព្រៃ និងវិធានការការពារសត្វព្រៃ។
កញ្ញា អ៊ុន ចន្ធី អនុប្រធានការិយាល័យចំណេះដឹង និងព័ត៌មានបរិស្ថាន នៃមន្ទីរបរិស្ថានខេត្តមណ្ឌលគិរី បានបង្ហាញអំពីរូបភាពសត្វព្រៃដ៏កម្រនិងជិតផុតពូជ ការបំផុសគំនិតឲ្យចេះស្រឡាញ់សត្វព្រៃនិងបរិស្ថាន និងការពញ្ញាក់ស្មារតីដល់ប្អូនៗសិស្សានុសិស្សឲ្យកាន់តែចេះស្រឡាញ់បរិស្ថានស្អាតនៅជុំវិញខ្លួន។
ជាមួយនឹងការបង្ហាញក្នុងអត្ថន័យអប់រំបណ្ដុះគំនិតនេះ ក្រុមការងារបានផ្ដល់ជូននូវខ្មៅដៃពណ៌ និងសៀវភៅ ព្រមទាំងរូបភាពសត្វព្រៃ(ស-ខ្មៅ) ដើម្បីឲ្យសិស្សានុសិស្សយកទៅផាត់ជាពណ៌របស់សត្វព្រៃផងដែរ។
បន្ទាប់មកនៅវេលាម៉ោង៧:៣០នាទីយប់ថ្ងៃដដែល ក្រុមការងារបានបន្តចាក់បញ្ចាំងកុនជាលក្ខណៈវីដេអូខ្នាតតូច ស្ដីអំពី “កេរមរតកធម្មជាតិរបស់ប្រទេសកម្ពុជា” ដោយបានបង្ហាញអំពីប្រភេទសត្វព្រៃសំខាន់ៗ ដែលបង្កប់ទៅដោយអត្ថន័យអប់រំ និងការបំផុសផ្នត់គំនិតមនុស្សឲ្យចេញស្រឡាញ់ធនធានធម្មជាតិដ៏កម្រក្នុងព្រះរាជាណាចក្រកម្ពុជា និងនៅក្នុងភពផែនដីនេះផងដែរ៕
ចែករំលែកព័តមាននេះ