ខេត្តបន្ទាយមានជ័យ ៖ សេចក្តីរាយការណ៍បឋមបានឲ្យដឹងថា គ្រឿងក្នុងជ្រូកជាង១តោនត្រូវកម្លាំងនគរបាលប្រឆាំងបទល្មើសសេដ្ឋកិច្ចចាប់បានធ្វើការត្រួតពិនិត្យ នៅព្រឹកថ្ងៃទី០១ ខែធ្នូនេះ ដែលដឹកពីថៃយកមកលក់នៅភ្នំពេញ ។
លោកឧត្តមសេនីយ៍ត្រី ចាប សុផារិទ្ធិ ស្នងការរងនគរបាលខេត្តបានប្រាប់ថា នៅពេលដែលកម្លាំងនគរបាលប្រឆាំងបទល្មើសសេដ្ឋកិច្ចខេត្តបន្ទាយមានជ័យបានធ្វើការស្រាវជ្រាវឃាត់ខ្លួនរថយន្តក្រុង១គ្រឿង ក្រុមហ៊ុនរិទ្ធមុនី ពាក់ស្លាក់លេខបាត់ដំបង 3A-0244 ។
លោកបានបញ្ជាក់ថា ត្រួតពិនិត្យរកឃើញមានកេសសង្ស័យរកឃើញគ្រឿងក្នុងជ្រូកចម្រុះមាន១៦កេស ទម្ងន់១.០៩៤គីឡូក្រាម ដោយឃាត់នៅវេលាម៉ោង១និង៤៥នាទីថ្ងៃទី៣០ ខែវិច្ឆិកា ឆ្នាំ២០១៩ នៅចំណុចចំណតរថយន្តក្រុងសិរីសោភ័ណ ។
ម្ចាស់ទំនិញឈ្មោះ សូត្រ សុគន្ធ ភេទប្រុស អាយុ៣៥ឆ្នាំ រស់នៅភូមិមិត្តភាព សង្កាត់-ក្រុងប៉ោយប៉ែត អ្នកបើកបរឈ្មោះ សៅ នូរ៉ា ភេទប្រុស អាយុ៤៤ឆ្នាំ រស់នៅភូមិគ្រួស សង្កាត់សំរោង ខណ្ឌព្រែកភ្នៅ ។
លោកឧត្តមសេនីយ៍ត្រី ចាប់ សុផារិទ្ធ បានបញ្ជាក់ថា ក្រោយពេលឃាត់ខ្លួនម្ចាស់សាច់ជ្រូកខូចគុណភាពបានសារភាព គ្រឿងក្នុងជ្រូកទិញពីថៃ១គីឡូក្រាម តម្លៃជាង៣០បាត ហើយយកទៅលក់ភ្នំពេញ១គីឡូក្រាមតម្លៃជាង១ម៉ឺនរៀល អ្នកដឹកថា គាត់ស៊ីឈ្នួលដឹកពីក្រុងប៉ោយប៉ែតទៅភ្នំពេញ១៦កេស ដោយ១កេសតម្លៃ២៥.០០០រៀល ។
មន្ត្រីជំនាញបច្ចេកទេសបានបញ្ជាក់ថា គ្រឿងក្នុងជ្រូកចម្រុះជាង១តោន ដែលកម្លាំងសមត្ថកិច្ចចាប់មានជាទំនិញហាមឃាត់ និងគ្មានច្បាប់ដឹកគ្មានលក្ខណបច្ចេកទេស និងមានសារធាតុគីមី ។ ក្រោយពេលពិនិត្យហើយត្រូវបានយកទៅដុតកម្ទេចចោលនៅទីលានចាក់សំរាមក្រុងសិរីសោភ័ណ ៕ កែសម្រួលដោយ ៖ សុឃាក់
ចែករំលែកព័តមាននេះ