រាជធានីភ្នំពេញ ៖ ជនសង្ស័យចំនួន៣នាក់ប្រដាប់ដោយកាំបិតបុ័ងតោ ដែលកន្លងមកតែងតែធ្វើសកម្មភាពដេញធាក់ផ្ដួលម៉ូតូ និងដេញតាមកាប់ប្លន់យកម៉ូតូពីអ្នកដំណើរតាមផ្លូវនៅពេលយប់បានសម្រេចជាបន្តបន្ទាប់ចំនួន៤លើកមកហើយនោះ ត្រូវបានកម្លាំងនគរបាលខណ្ឌពោធិ៍សែនជ័យនិងកម្លាំងប៉ុស្តិ៍រដ្ឋបាលនគរបាលចោមចៅ៣ ធ្វើការស្រាវជ្រាវរហូតឈានដល់ការចាប់ខ្លួនបានទាំង៣នាក់តែម្តង ។
លុះនៅលើកចុងក្រោយនេះ ក្រុមជនសង្ស័យទាំង៣នាក់ខាងលើបានធ្វើសកម្មភាពដេញតាមធាក់ម៉ូតូ និងប្រើកាំបិតបុ័ងតោដេញកាប់ទៅលើបុគ្គលិកហាងខារ៉ាអូខេ២នាក់ប្ដីប្រពន្ធប្លន់យកម៉ូតូមួយគ្រឿងបានសម្រេច ខណៈជនរងគ្រោះទាំងពីរនាក់ជិះម៉ូតូ១គ្រឿងឌុបគ្នាចេញពីធ្វើការត្រឡប់ទៅកាន់ផ្ទះជួលកាលពីវេលាម៉ោង៣និង១៥នាទីឈានចូលព្រឹកថ្ងៃទី២៨ ខែវិច្ឆិកា ឆ្នាំ២០១៩ ត្រង់ចំណុចមុខរោងចក្រក្លេតភី តាមផ្លូវបេតុងឃ្យូអឹមអាយ ស្ថិត ក្នុងភូមិព្រៃព្រីងជើង២ សង្កាត់ចោមចៅទី២ ខណ្ឌពោធិ៍សែនជ័យ ប៉ុន្តែពេលនោះជនរងគ្រោះទាំង២នាក់ប្ដីប្រពន្ធនាំគ្នារត់ចេញចោលម៉ូតូទាន់ កុំអីប្រហែលជាត្រូវក្រុមជនសង្ស័យខាងលើនេះកាប់បណ្ដាលឲ្យបាត់បង់ជីវិត ឬរងរបួសធ្ងន់ជាមិនខានឡើយ។
ជនសង្ស័យដែលត្រូវចាប់ខ្លួនទាំង៣នាក់ខាងលើនោះរួមមាន ១-ឈ្មោះ មួន ភិរក្ស័ ភេទប្រុស អាយុ១៨ឆ្នាំ ជាសិស្សរៀនជួសជុលម៉ូតូ ស្នាក់នៅក្នុងភូមិកន្ទោកខាងជើង សង្កាត់កន្ទោក ខណ្ឌកំបូល ២-ឈ្មោះ កែវ សុភាព ភេទប្រុស អាយុ១៧ឆ្នាំ ជាសិស្ស មានទីលំនៅក្នុងភូមិសាមគ្គីទី៦ សង្កាត់ត្រពាំងក្រសាំង ខណ្ឌពោធិ៍សែនជ័យ និង៣-ឈ្មោះ គង់ ប៊ុនសី ភេទប្រុស អាយុ១៧ឆ្នាំ មុខរបរមិនពិតប្រាកដ ស្នាក់នៅបន្ទប់ជួលក្នុងភូមិត្រពាំងគល់ សង្កាត់កន្ទោក ខណ្ឌកំបូល (ជននេះជាអ្នកយកម៉ូតូដែលប្លន់បានទៅលាក់ទុកក្នុងបន្ទប់ជួលដែលខ្លួនស្នាក់នៅហើយក្រោយពេលមានការស្ងប់ស្ងាត់ទើបយកទៅលក់) ។
ដោយឡែកប្តីប្រពន្ធរងគ្រោះនៅក្នុងករណីប្លន់លើកចុងក្រោយនេះ ក្នុងនោះបុរសជាប្តីឈ្មោះ គា សុភារ៉ា អាយុ២៧ឆ្នាំ មុខរបរបុគ្គលិកហាងខារ៉ាអូខេផងនិងជាកម្មករោងចក្រផង និងស្ត្រីជាប្រពន្ធមិនស្គាល់ឈ្មោះឡើយ ។ ប្តីប្រពន្ធទាំង២នាក់ស្នាក់នៅបន្ទប់ជួលស្ថិតនៅក្នុងភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ ។ រីឯម៉ូតូមួយគ្រឿងដែលត្រូវជនសង្ស័យប្លន់យកទៅនោះម៉ាកហុងដាឌ្រីម ធុនសេ១២៥ ស៊េរីឆ្នាំ២០១៩ ពណ៌ខ្មៅ ពាក់ស្លាកលេខ ភ្នំពេញ ១HI-០៣១៩ ត្រូវបាននគរបាលដកហូតបានមកវិញ រួចយកទៅប្រគល់ជូនម្ចាស់វិញហើយ។
តាមប្រភពព័ត៌មានបានឲ្យដឹងថា នៅមុនពេលកើតហេតុ បុរសជាប្តីបានជិះម៉ូតូឌុបប្រពន្ធចេញពីធ្វើការនៅហាងខារ៉ាអូខេមួយកន្លែងដែលមានទីតាំងស្ថិតនៅតាមបណ្ដោយផ្លូវចោមចៅ ហៅផ្លូវវ៉េងស្រេង ក្នុងគោលបំណងត្រឡប់ទៅផ្ទះជួលដែលពួកគាត់ស្នាក់នៅ ។
តាមប្រភពព័ត៌មានបានបន្តថា ក្រោយពេលចេញផុតពីហាងខារ៉ាអូខេ ស្រាប់តែលេចមុខក្រុមជនសង្ស័យទាំង៣នាក់ជិះម៉ូតូដេញតាមពីក្រោយ រហូតទៅដល់ត្រង់ចំណុចកើតហេតុខាងលើ ក៏បានធ្វើសកម្មភាពធាក់ផ្ដួលម៉ូតូជនរងគ្រោះបណ្ដាលឲ្យដួល ។ បន្ទាប់មកជនសង្ស័យទាំងបានយកកាំបិតបុ័ងតោដេញកាប់ដណ្ដើមយកម៉ូតូ ពេលនោះដោយសារមាន ការភ័យខ្លាច ទើបជនរងគ្រោះទាំង២នាក់ប្ដីប្រពន្ធនេះបាននាំគ្នារត់ចេញទាំងការភិតភ័យ ហើយជនសង្ស័យក៏លើកយកម៉ូតូជិះគេចខ្លួនទៅបាត់ដោយសុវត្ថិភាពតែម្ដង។
តាមប្រភពព័ត៌មានបានបន្តទៀតថា ក្រោយពេលកើតហេតុ ជនរងគ្រោះបានដាក់ពាក្យបណ្ដឹងនៅប៉ុស្តិ៍នគរបាលចោមចៅ៣ ហើយនគរបាលប៉ុស្តិ៍ខាងលើរួមជាមួយនគរបាលខណ្ឌពោធិ៍សែនជ័យ បានធ្វើការស្រាវជ្រាវរហូតដល់វេលាល្ងាចថ្ងៃដដែលនោះ ទើបឈានដល់ការចាប់ខ្លួនជនសង្ស័យបានជាបន្តបន្ទាប់ចំនួន៣នាក់ រួចនាំទៅធ្វើការសាកសួរ។
ក្រោយចាប់ខ្លួន ក្រុមជនសង្ស័យបានសារភាពថា ពួកខ្លួនធ្លាប់ធ្វើសកម្មភាពប្លន់បានសម្រេចចំនួន៣លើករួចមកហើយ ក្រោយពេលប្លន់បានសម្រេចម្ដងៗឈ្មោះគង់ ប៊ុនសី បានយកម៉ូតូដែលប្លន់បាននោះទៅលាក់ទុកក្នុងបន្ទប់ជួលរបស់ខ្លួន ដែលមានទីតាំស្ថិតនៅក្នុងភូមិត្រពាំងគល់ សង្កាត់កន្ទោក ខណ្ឌកំបូល ។ ក្រោយពេលស្ងប់ស្ងាត់ ទើបឈ្មោះគង់ ប៊ុនសី យកម៉ូតូនោះទៅលក់បានលុយចែកគ្នាចាយ ។ ដោយឡែកលើកទី៤នេះ ក្រោយប្លន់បានសម្រេចហើយ ឈ្មោះគង់ ប៊ុនសី ត្រៀមបញ្ចេញម៉ូតូនោះយកទៅលក់នៅយប់ថ្ងៃទី២៨ ខែវិច្ឆិកានេះដែរ ប៉ុន្តែមិនទាន់បានយកទៅលក់ផង ក៏ត្រូវបាននគរបាលក្របួចបានទាំងសម្បុកបែបនេះតែម្ដង៕ (កែសម្រួលដោយ ៖ ធីតា)
ចែករំលែកព័តមាននេះ