ប្រទេសកូរ៉េខាងជើង ៖ យោងតាមYONHAPថាទីភ្នាក់ងារស៊ើបការណ៍ជាតិកូរ៉េខាងត្បូងរាយការណ៍នាថ្ងៃទី៤វិច្ឆិកាថា មេដឹកនាំកូរ៉េខាងជើងលោកគីមជុងអ៊ុន ហាក់ដូចជាសម្រេចជួបគ្នាកំពូលថ្មីជាមួយប្រធានាធិបតីអាមេរិកលោកដូណាល់ត្រាំក្នុងខែធ្នូ មុនពេលដាច់ឆ្នាំដែលក្រុងព្យុងយ៉ាងកំណត់ សម្រាប់កិច្ចព្រមព្រៀងនុយក្លេអ៊ែរមួយជាមួយក្រុងវ៉ាស៊ិនតោន។
ទីភ្នាក់ងារស៊ើបការណ៍នេះ លាតត្រដាងព័ត៌មាននោះក្នុងឱកាសនៃកិច្ចប្រជុំសម្ងាត់មួយរបស់សភាហើយនិយាយថា ប្រទេសទាំង២ត្រូវធ្វើការចរចាគ្នាឡើងវិញក្នុងកម្រិតប្រតិបត្តិការ នាខែនេះឬយ៉ាងយូរបំផុតនាដើមខែធ្នូ។ ន
ះបើតាមការអះអាងរបស់បណ្ដាសមាជិកសភាជាសមាជិកគណៈកម្មការស៊ើបការណ៍។ ក្នុងសន្និសីទសារព័ត៌មានមួយ សមាជិកសភាលោកKIM MIN KIនៃគណបក្សប្រជាធិបតេយ្យជាគណបក្សកាន់អំណាចថ្លែងថា ទីភ្នាក់ងារស៊ើបការណ៍ជាតិយល់ឃើញថា លោកគីមជុងអ៊ុនបានសម្រេចរៀបចំការជួបគ្នាកំពូលមួយទៀតនាខែធ្នូ។ ចំណែកសមាជិកសភានៃគណបក្សប្រឆាំងមួយរូប លោកLEE EUN JAEថ្លែងថា ពេលវេលាហាក់ដូចជាមកដល់ហើយដើម្បីរៀបចំការចរចាពេញអង្គរវាងភាគីទាំង២។
សហរដ្ឋអាមេរិកនិងកូរ៉េខាងជើងបានបន្តការចរចានុយក្លេអ៊ែរកម្រិតប្រតិបត្តិការ ក្នុងទីក្រុងស្តុកខូលប្រទេសស៊ុយអែត បន្ទាប់ពីជាប់គាំងជាច្រើនខែ តែការចរចានោះត្រូវបរាជ័យជាថ្មី ដោយក្រុងព្យុងយ៉ាងចោទប្រកាន់អាមេរិកថា ពុំបានធ្វើសំណើថ្មី៕ (កែសម្រួលដោយ ៖ បុប្ផា)
ចែករំលែកព័តមាននេះ