ខេត្តសៀមរាប ៖ ក្នុងរយៈពេលជាង១ខែនេះ ដើមរំាងទឹក ដើមកន្សែង និង ដើមទូលសរុបជាង១០០ដើម នៅចំណុចអក.ស ក្រឡេងដប លើទំនប់សោម និងទំនប់កន្សែងកំបុត ស្ថិតក្នុងភូមិច្រេស និង ភូមិគោកធ្លក ឃុំកណ្តែក ស្រុកបា្រសាទបាគង ដែលជាជម្រកសត្វស្លាប និងមច្ឆាចម្រុះ បានត្រូវក្រុមឈ្មួញកាប់គាស់បំផ្លាញនាំយកទៅលក់នៅក្នុងប្រទេសវៀតណាម ។
បើតាមអ្នកឆ្លើយឆ្លងព័ត៌មានកោះសន្តិភាពបានស្រង់សំដីអ្នកភូមិឲ្យដឹងទៀតថា អ្នកដែលបញ្ជាឲ្យមានការកាប់បំផ្លាញនោះ គឺមេឃុំកណ្តែកផ្ទាល់តែម្តង ។
សេចក្តីរាយការណ៏បានឲ្យដឹងផងដែរថា កម្មករដែលស៊ីឈ្នួលកាប់បំផ្លាញដើមរំាងទឹក ដើមកន្សែង និងដើមទូល ក្នុង១ដើមត្រូវឈ្មួញឲ្យតម្លៃចាប់ពី៣ទៅ៥ម៉ឺនរៀល ប៉ុន្តែតម្លៃនំាចេញទៅលក់នៅប្រទេសវៀតណាមនោះ មិនត្រូវបានគេបញ្ចេញឲ្យដឹងនោះទេ ។
ទាក់ទងទៅនឹងការចោទប្រកាន់ខាងលើនេះ លោក ខំា លឿ មេឃុំកណ្តែក បានបា្រប់តាមទូរស័ព្ទឲ្យដឹងថា ការកាប់គាស់ដើមរំាងទឹក ដើមកន្សែង និង ដើមទូលនេះ គាត់បានទទួលបញ្ជាពីលោកកែវ -សារ៉ាន់ ទីប្រឹក្សាផ្ទាល់ក្រសួងការពារជាតិ ដើម្បីយកទៅដំានៅចំណុចស្ពានក្អែក ក្នុងឃុំកណ្តែកដដែលនេះ ។
យ៉ាងណាក៏ដោយបើតាមអ្នកភូមិ ដើមឈើទំាងអស់នោះ មិនត្រូវបានគេឃើញដឹកយកទៅដំានៅចំណុចស្ពានក្អែកនោះទេ ផ្ទុយទៅវិញគេនំាយកទៅលក់នៅក្នុងប្រទេសវៀតណាម ។
លោក កែវ សារ៉ាន់ ដែលគេអះអាងថា ជាទីប្រឹក្សាផ្ទាល់ក្រសួងការពារជាតិនោះ កោះសន្តិភាពមិនអាចទំនាក់ទំនងដើម្បីសុំការបំភ្លឺបាននៅឡើយទេនៅព្រឹកថ្ងៃទី១៣ ឧសភា ២០១៤នេះ ៕
ចែករំលែកព័តមាននេះ