ខេត្តក្រចេះ ៖ ការធ្វើនេសាទខុសច្បាប់ ដោយជនឱកាសនិយមតាមរូបភាពផ្សេងៗ នៅតាមតំបន់នានាដូចជាទន្លេ ព្រែក បឹងបួ ក្នុងភូមិសាស្ត្រខេត្តក្រចេះ នៅតែកើតមានគួរឲ្យព្រួយបារម្ភ ខណៈតួលេខនៃការបង្ក្រាបពីសំណាក់ក្រុមមន្ត្រីជំនាញ ក៏ដូចជាអាជ្ញាធរពាក់ព័ន្ធនៅតែកើនឡើងឥតឈប់ឈរ ។ ខេត្តក្រចេះ មានទីតាំងលាតសន្ធឹងតាមបណ្តោយទន្លេមេគង្គ និងមានអំណោយផលសម្រាប់ការនេសាទ ។ ខេត្តដែលស្ថិតជាប់នឹងដងទន្លេមេគង្គលើនេះ ក៏អំណោយផលល្អដល់ជីវចម្រុះទឹកសាប សម្បូរដោយជម្រកត្រីពងកូន ត្រីមេពូជ ពិសេសនោះផ្សោតទឹកសាប ។
ដោយសារតែខេត្តក្រចេះសម្បូរដោយធនធានមច្ឆជាតិទឹកសាបបែបនេះ ទើបពលរដ្ឋជាងពាក់កណ្តាលនៃចំនួនពលរដ្ឋសរុបជិត១០ម៉ឺននាក់ បានចាប់យករបរនេសាទជាចម្បងសម្រាប់ជីវភាពគ្រួសារប្រចាំថ្ងៃ ។
ទន្ទឹមនឹងការនេសាទដែលកំពុងកើតមានលើផ្ទៃទន្លេ ព្រែក បឹង ជាលក្ខណៈគ្រួសារតាមទ្រង់ទ្រាយតូចឬធំដើម្បីចាប់យកត្រីនោះ ជាមួយគ្នានេះបទល្មើសនេសាទដែលប្រព្រឹត្តដោយជនឱកាសនិយមក៏នៅតែកើតមាន ខណៈការចុះល្បាតបង្ក្រាបពីសំណាក់អាជ្ញាធរក៏ដូចជាមន្ត្រីជលផល នៅតែខិតខំបន្តធ្វើយ៉ាងសស្រាក់សស្រាំ។
តាមរបាយការណ៍របស់ខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តឲ្យដឹងថា ក្នុងរយៈពេល៩ដើមឆ្នាំ២០១៩ នេះ ខណ្ឌរដ្ឋបាលជលផល សហការជាមួយគណៈបញ្ជាការឯកភាពស្រុក ក្រុង និងអាជ្ញាធរតាមមន្ទីរ ស្ថាប័នពាក់ព័ន្ធ ចុះបង្ក្រាបបទល្មើសនេសាទនៅតាមតំបន់ភូមិសាស្ត្រ ទន្លេ ព្រែក បឹងបួ បានចំនួន១៣៦ករណី ។
ការបង្ក្រាបករណីបទល្មើសនេសាទខាងលើ អាជ្ញាធរមានសមត្ថកិច្ចរឹបអូសបានឧបករណ៍ផ្សេងៗ សម្រាប់បម្រើឲ្យបទល្មើសនេសាទមានដូចជា ស្បៃមុងសាច់កាវប្រវែងជិត២ពាន់មែ៉ត្រលូសាច់អួនជាង១ពាន់ម៉ែត្រ បង្គោលឫស្សីជាង៣ពាន់ដើម និងបានចាក់លែងកូនត្រីចូលក្នុងទន្លេ និងបឹងធម្មជាតិវិញជិត២រយគីឡូក្រាម ។ អនុប្រធានខណ្ឌរដ្ឋបាលជលផលខេត្ត និងជាប្រធានឆ្មាំអភិរក្សសត្វផ្សោតលោក ម៉ុក ពន្លក
បានថ្លែងថា មានមងបណ្តែតចំនួន២០៥ត្បូង ត្រូវបានសមត្ថកិច្ចបង្ក្រាបនៅតាមតំបន់អន្លង់ផ្សោត និងអន្លង់ត្រីមេពូជក្នុងតំបន់អភិរក្ស ។
ឧបករណ៍សន្ទូចរាយជាង១ពាន់ម៉ែត្រ សម្រាស់២៨គំនរ មងពាក់ព្រែកចំនួន៣ត្បូង ដែលក្រុមជនល្មើសលបលួចធ្វើនេសាទនៅតំបន់ហាមឃាត់ ក៏ត្រូវបានបង្ក្រាបនិងប្រមូលមកកម្ទេចចោលនៅនឹងមុខមហាជន ។ ក្រៅពីនេះ នៅមានទូកម៉ាស៊ីនចំនួន៣គ្រឿង និងសម្ភារឆក់ត្រីជាច្រើនសម្រាប់ទៀតក៏ត្រូវបានបង្ក្រាបដែរ ។
ទន្ទឹមនឹងស្ថានភាពលួចធ្វើនេសាទខុសច្បាប់ នៅតែជាបញ្ហាប្រឈមនិងស្មុគស្មាញ ដែលកំពុងតែគំរាមកំហែងដល់ពពួកត្រីធម្មជាតិនេះ ប្រធានខណ្ឌរដ្ឋបាលជលផលខេត្ត លោក សៀន គិនបានអះអាងថា កម្លាំងខណ្ឌរដ្ឋបាលជលផល បានត្រៀមលក្ខណៈគ្រប់គ្រាន់ដោយសហការជាមួយនឹងកម្លាំងប្រដាប់អាវុធទាំង៣ប្រភេទ និងមន្ត្រីអង្គការពាក់ព័ន្ធនានា លើចំណាត់ការបង្ក្រាបបទល្មើសនេសាទ ។
ពិសេស ផែនការពង្រឹងសហគមន៍នេសាទឲ្យចូលរួមសហការក្នុងការត្រួពិនិត្យ និងល្បាតជាប់ជាប្រចាំ ។ ការអភិរក្សនិងថែទាំអន្លង់ផ្សោត និងអន្លង់មេពូជមួយចំនួនក្នុងដែននេសាទទាំង២៨ចំណុច និងស្រះជម្រកត្រី១០កន្លែង និងការរុករក បន្តស្រាវជ្រាវស្រះជម្រកត្រីថែមទៀតដើម្បីកំណែទម្រង់ទិន្នផលឲ្យកាន់តែកើនឡើង ។
លោកបានលើកឡើងថា ដោយសារតំបន់មួយចំនួននៅមានភាពស្មុគស្មាញ វិសាលភាពទន្លេធំ និងមានកូនកោះច្រើន ទើបធ្វើឲ្យក្រុមជនល្មើសងាយលាក់ខ្លួនពីការចុះល្បាតរបស់សមត្ថកិច្ចជំនាញ ក៏ដូចជាមន្ត្រីឆ្មាំ តែយ៉ាងណាក៏ដោយក្រុមអាជ្ញាធរនៅតែបង្កើនសកម្មភាពល្បាតរុករកដើម្បីទប់ស្កាត់ រាល់ជនខិលខូចដែលលួចនេសាទ ៕
ចែករំលែកព័តមាននេះ