រាជធានីភ្នំពេញ ៖ តារាសម្ដែងវ័យក្មេងដែលពីមួយថ្ងៃទៅមួយថ្ងៃអាជីពលូតលាស់ឥតឈប់ឈរ គឺកញ្ញាជុំ រចនាពេជ្រ ។ បច្ចុប្បន្ននាងពង្រីកទីផ្សារសិល្បៈបានច្រើនជាងមុន ។ រចនាពេជ្រ ទើបតែបង្កើតក្រុមរាំ និងចុះកិច្ចសន្យាថតរឿងភាគពីររឿង ធ្វើឱ្យគេមើលឃើញថា តារាវ័យក្មេងរូបនេះកាន់តែផុសត្រដែតឡើងក្នុងពិភពសិល្បៈ ។
រាជធានីភ្នំពេញ ៖ តារាសម្ដែងវ័យក្មេងដែលពីមួយថ្ងៃទៅមួយថ្ងៃអាជីពលូតលាស់ឥតឈប់ឈរ គឺកញ្ញាជុំ រចនាពេជ្រ ។ បច្ចុប្បន្ននាងពង្រីកទីផ្សារសិល្បៈបានច្រើនជាងមុន ។ រចនាពេជ្រ ទើបតែបង្កើតក្រុមរាំ និងចុះកិច្ចសន្យាថតរឿងភាគពីររឿង ធ្វើឱ្យគេមើលឃើញថា តារាវ័យក្មេងរូបនេះកាន់តែផុសត្រដែតឡើងក្នុងពិភពសិល្បៈ ។
កញ្ញាបេប៊ី បានបង្កើតក្រុមរាំផ្ទាល់ខ្លួនមួយដើម្បីសម្ដែងតាមស្ថានីយទូរទស្សន៍ ។ នាងបង្កើតក្រុមរាំនេះក្នុងន័យកសាងខ្លួនឱ្យកាន់តែលេចធ្លោ ខណៈតារាចម្រៀងលេចធ្លោជាច្រើនដួងទៀតមានក្រុមរាំដែរ ។ ក្នុងពេលបេប៊ីឡើងច្រៀងបទញាក់អមជាមួយក្រុមរាំរបស់នាងគឺនាងឆក់អារម្មណ៍អ្នកទស្សនា ដោយសារតែក្បាច់រាំរបស់ពួកនាងរស់រវើក ។
កញ្ញាជុំ រចនាពេជ្រ ហៅបេប៊ីដែលកាន់តែជោគជ័យក្នុងទំព័រសិល្បៈ និងកាន់តែមានរូបរាងស្រស់ស្អាត មុខមានមន្ដស្នេហ៍រូបនេះប្រាប់កោះសន្ដិភាពកាលពីពេល ថ្មីៗនេះថា ដើម្បីឱ្យរូបនាងពេលឡើងច្រៀងតាមស្ថានីយទូរទស្សន៍មានភាពប្លែក ចៀសវាងភាព ដដែលៗ នាងបានបង្កើតក្រុមរាំផ្ទាល់ខ្លួនមួយ ។ សម្រាប់ការឡើងរាំមានក្រុម ក្រោយពេលចូលឆ្នាំថ្មីប្រពៃណីជាតិនេះ នាងយល់ថា មិនទាន់ល្អមួយរយភាគរយទេ គឺនៅខ្វះចន្លោះខ្លះ ដោយសារតែហាត់ ភ្លាមៗ ហើយទៅសម្ដែង ។ ដោយសារមានការលើកទឹកចិត្ដពីមិត្ដភក្ដិ ក៏ដូចជាក្រុមគ្រួសារ នាងបានប្រមូលគ្នីគ្នាហាត់រាំនៅផ្ទះរបស់នាងដើម្បីឱ្យការបង្ហាញស្ទីលរាំរបស់នាងកាន់តែល្អសម្រាប់បម្រើការកម្សាន្ដរបស់អ្នកគាំទ្រ និងទស្សនិកជនទូទៅ ។
សិស្សភាសាអង់គ្លេសប្រចាំវិទ្យាស្ថានប៊ែលធីរូបនេះឱ្យដឹងថា ក្រៅពីបង្កើតក្រុមរាំ នាងទើបតែចុះកិច្ចសន្យាថតរឿងភាគឱ្យផលិតកម្មរ៉ុកនិងផលិតកម្មមហាហង្ស ។ ចំពោះរឿងនៅផលិតកម្មរ៉ុក នាងមិនទាន់ហ៊ានជម្រាបជូនពីចំណងជើងទេ រង់ចាំការបង្ហាញសាច់រឿងពេលចាក់បញ្ចាំង ។ រឿងរបស់ផលិតរ៉ុកនោះមានតួឯកស្រីបីដួង ហើយនាងជាតួកាចឆ្នាសកាច់កុងគ្នា ។ ពេលសម្ដែងនាងនឹងយកចិត្ដទុកដាក់ដើម្បីឱ្យសមនឹងតួអង្គចរិតឆ្នាសឆ្នើម ។ ម៉្យាងទៀត តួឆ្នាសនេះត្រូវនឹងចំណូលចិត្ដ ឬអត្ដចរិតរបស់នាង ។ តារាដែលផ្ដាច់ស្នេហ៍ឧកញ៉ាស្រវាសិល្បៈរូបនេះអះអាងថា សម្រាប់ឆ្នាំ២០១៤នេះ នាងបង្ហាញទាំងអាជីពសម្ដែង បង្ហាញម៉ូដ ពិធីការិនី និងក្រុមរាំថ្មី ។
រចនាពេជ្រ រំពឹងថា មហាជននឹងរិះគន់ និងស្ថាបនារាល់ការសម្ដែងរបស់នាង ដោយនាងមិនអន់ចិត្ដឡើយ ដើម្បីឱ្យការសម្ដែងរបស់ខ្លួនកាន់តែល្អឡើង ។ នាងមិនហ៊ានកំណត់ថា ការសម្ដែងរបស់នាងល្អទេ អាស្រ័យលើអ្នកទស្សនាវិនិច្ឆ័យ ។ ទាក់ទិននឹងការបើកបេះដូងទទួលយកស្នេហា រចនាពេជ្រ និយាយថា «រាល់ថ្ងៃមិនអត់មានអ្នកស្រឡាញ់ទេ តែនាងខ្ញុំមិនទទួល ។ នាងខ្ញុំសុំត្រឹមតែស្គាល់គ្នា ធម្មតាៗទៅបានហើយ ព្រោះគិតតែសិល្បៈ និងរៀបផែនការរៀនបន្ដទៀតទាន់នៅក្មេង ឯស្នេហាអីនោះពិតជាមិនហ៊ានអើពើឡើយ» ។ ចំណុចនេះ ម្ដាយរបស់បេប៊ីមានប្រសាសន៍ថា «កូនស្រីខ្ញុំមានគេសុំស្រឡាញ់ច្រើនណាស់ ដូច្នេះបើសិនជាខ្ញុំមិនតាមមើលនាងទេ គឺមិនបានទេ ព្រោះនាងនៅក្មេងណាស់ ។
ខ្ញុំជាម្ដាយមិនដែលទៅច្រងេងច្រងាង ទៅស្រែកថាឱ្យគេនោះទេ ឱ្យតែមកនិយាយគ្នា ទុកកិត្ដិយសឱ្យមនុស្សស្រី ហើយខ្ញុំក៏មិនទុកកូនស្រីអីដែរ គឺត្រូវតែមានគូ តែសុំឱ្យចាស់ចិត្ដជាងនេះសិន ។ ម៉្យាងទៀត ខ្ញុំបើកផ្លូវឱ្យជានិច្ច បើសិនជាស្រឡាញ់កូនខ្ញុំត្រូវគោរពប្រពៃណីខ្មែរ ចូលតាមច្បាប់ទម្លាប់ គោរពគ្នា នោះខ្ញុំនឹងឱ្យកូនពិចារណា ។ បើសិនជាចេញមកកោងកាចនោះ ខ្ញុំមិនឱ្យកូនស្រីទៅជិតទេ» ៕
ចែករំលែកព័តមាននេះ