ខេត្តក្រចេះ ៖ លំនៅឋានតូច-ធំមានថ្មនិងឈើរបស់ពលរដ្ឋចំនួន៧ខ្នងផ្ទះ រស់នៅតាមមាត់ច្រាំងដងទន្លេ មេគង្គក្នុងភូមិកោះកណ្តុរ ឃុំឆ្លូង ស្រុកឆ្លូង បានជួបហេតុការបាក់ស្រុតចូលទៅក្នុងទន្លេ បណ្តាលឱ្យខូខខាតស្ទើរទាំងស្រុង ខណៈមាន១៧ខ្នងផ្ទះទៀតកំពុងគំរាមកំហែងដោយការបាក់ច្រាំង។ អាជ្ញាធរស្រុកឆ្លូងក៏បានអះអាងប្រាប់ថា អាជ្ញាធរកំពុងចាត់ជម្លៀសគ្រួសាររបស់ពលរដ្ឋ ដែលរងគ្រោះដោយការបាក់ច្រាំងក៏ដូចជាគ្រួសារពលរដ្ឋ ដែលកំពុងតែគំរាមកំហែងដោយការបាក់ច្រាំងទៅកាន់តំបន់មានសុវត្ថិភាព ដើម្បីគេចចេញពីគ្រោះថ្នាក់។
ស្ថានភាពការបាក់ច្រាំងទន្លេមេគង្គ បង្កឱ្យមានការខូចខាតធ្ងន់ធ្ងរដល់លំនៅឋានពលរដ្ឋ តែមិនបង្កឲ្យគ្រោះថ្នាក់ដល់អាយុជីវិតនេះ ត្រូវបានពលរដ្ឋនិយាយថា បានកើតមានកាលពីព្រឹកព្រលឹមថ្ងៃទី១១ តុលា នេះ ក្នុងនោះ បង្កឲ្យមានលំនៅឋានថ្មនិងឈើតូចធំរបស់អ្នកភូមិបាន បាក់ចូលក្នុងទន្លេ ខណៈ១៧ខ្នងផ្ទះទៀតកំពុងតែគំរាមកំហែង។
ពលរដ្ឋរស់នៅតំបន់កើតហេតុនិយាយឲ្យដឹងថា នេះជាព្រឹត្តការណ៍បាក់ច្រាំងទន្លេជាលើកទី២ហើយដល់ពលរដ្ឋដែលរស់នៅតាមបណ្តោយច្រាំងទន្លេនៅក្នុងឃុំឆ្លូង ស្រុកឆ្លូង និងតែងតែបង្កឲ្យមានការប៉ះពាល់លំនៅឋានធ្ងន់ធ្ងររបស់ពលរដ្ឋ។ ជាមួយនិងការបាក់ស្រុតច្រាំងទន្លេ ដែលបានកើតមានជាបន្តបន្ទាប់គ្នាបានធ្វើឲ្យពលរដ្ឋ កំពុងតែរស់នៅតាមតំបន់ជួរមាត់ទន្លេមានការព្រួយបារម្ភនេះ ពលរដ្ឋទាំងនោះបានផ្តោត សំខាន់ លើមូលហេតុដែលកើតមាន គឺបណ្តាលមកពីការធ្វើអាជីវកម្មបូមខ្សាច់ក្រួសរបស់ឈ្មួញដែលរាល់ថ្ងៃកំពុងតែមានសកម្មភាពនៅកណ្តាលទន្លេក្នុងស្រុកឆ្លូង ។
តែបើទោះជាបែបណា អភិបាលរងស្រុកឆ្លូង លោក ធីម សុខឡេង បានថ្លែងប្រាប់ឲ្យដឹង ដោយលោកបានបញ្ជាក់ពីមូលហេតុថា ការបាក់ស្រុកច្រាំងគឺបណ្តាលមកពីតំបន់ដីជ្រោយ នេះបានរងការជន់លិចដោយទឹកជំនន់។ មួយវិញទៀត អាចបណ្តាលមកពីការហូរច្រោះទឹក ដែលជន់ដក់នៅប៉ែងខាងមុខមិនមានលូររំដោះ ធ្វើឲ្យមានការហូរច្រោះមិនមែនបណ្តាលមកពី ការបូមខ្សាច់ក្រួសនោះទេ។
ចែករំលែកព័តមាននេះ