លោកមហាសេដ្ឋី Mark Zuckerberg ដែលជាស្ថាបនិក និងនាយកប្រតិបត្តិរបស់ក្រុមហ៊ុន Facebook បានប្រាប់មកថា ការមានទ្រព្យសម្បត្តិច្រើនអាចនឹងមិនសមហេតុសមផល ប៉ុន្តែវាអាចល្អសម្រាប់សង្គមទាំងមូល ។ ប្រសាសន៍នេះត្រូវបានលើកឡើងដើម្បីឆ្លើយតបនឹងទស្សនៈមួយរបស់លោក Bernie Sanders ដែលអះអាងមកថាពិភពលោកមិនគួរមានមហាសេដ្ឋីទេ ។
លោក Zuckerberg ដែលមានទ្រព្យសម្បត្តិរូមប្រមាណ ៦៩.៦ ប៊ីលានដុល្លារបើយោងតាម Billionnaire Index របស់ Bloomberg បានបកស្រាយថា នៅកម្រិតមួយមិនមានមនុស្សណាម្នាក់ដែលគួរមានទ្រព្យសម្បត្តិច្រើនពេកទេ ។ ប៉ុន្តែប្រសិនបើមនុស្សបានធ្វើអ្វីដែលល្អ ពួកគេគួរតែទទួលបានរង្វាន់ ។
លោក Zuckerberg និងភរិយាគឺអ្នកស្រី Priscilla Chan បានសន្យាថានឹងបរិច្ចាគ ៩៩% នៃភាគហ៊ុន Facebook ដែលពួកគេមានតាមរយៈការផ្តួចផ្តើម Chan Zuckerberg Initiative ប៉ុន្តែនៅតែមានមនុស្សដែលរិះគន់ការសម្រេចចិត្តនេះដដែល ។
អ្នកជំនាញមួយចំនួនបានអះអាងថា អំពើសប្បុរសធម៌ដែលចូលរួមដោយអ្នកមានទ្រព្យសម្បត្តិស្តុកស្តម្ភអាចនឹងធ្វើឲ្យបញ្ហាវិសមភាពកាន់តែធ្ងន់ធ្ងរ ឬជះឥទ្ធិពលអវិជ្ជមានដល់សង្គមថែមទៀត ។ លោក Zuckerbeg បានបន្តថាការមានទ្រព្យសម្បត្តិច្រើនក្នុងករណីខ្លះអាចនឹងមិនយុត្តិធម៌ ប៉ុន្តែវាអាចល្អសម្រាប់សង្គម ជាពិសេសគឺវាល្អជាងរដ្ឋាភិបាលមានសិទ្ធិក្នុងការសម្រេចចិត្តគ្រប់បែបយ៉ាងក្នុងការប្រើប្រាស់ទ្រព្យសម្បត្តិ ។
លោកបានបកស្រាយទៀតថា ភ្នាក់ងាររដ្ឋាភិបាលដែលចែកថវិកាសម្រាប់គម្រោងផ្សេងៗដើម្បីសិក្សាបញ្ហា ឬស្វែងរកដំណោះស្រាយតែងតែធ្វើការសម្រេចចិត្តដោយប្រុងប្រយ័ត្ន ប៉ុន្តែថវិកាដែលបានពីវិស័យឯកជនអាចត្រូវបានវិនិយោគក្នុងទ្រង់ទ្រាយធំទោះជាគម្រោងនោះមានហានិភ័យខ្ពស់ក៏ដោយ ។ អ្វីដែលលោកជឿជាក់លើគឺការដើរទៅមុខអាចកើតមានបានប្រសិនបើមនុស្សជ្រើសរើសផ្លូវដើរខុសៗគ្នាជាពិសេសប្រសិនបើផ្លូវទាំងនោះត្រូវការធនធានច្រើន និងមានហានិភ័យខ្ពស់ ៕ កែសម្រួលដោយ ៖សុឃាក់
ចែករំលែកព័តមាននេះ