ក្រោយមរណភាពនាយ សាន ម៉ៅ ធនធានកំប្លែងជើងចាស់កាន់តែខើចទៅៗ
- ភ្នំពេញ
រាជធានីភ្នំពេញ ៖ មួយរយៈចុងក្រោយនេះ គេសង្កេតឃើញថា ធនធានសិល្បៈផ្នែកកំប្លែងកាន់តែមានការ ខើចទៅៗ បន្ទាប់ពីមរណភាពរបស់នាយសានម៉ៅ កាលពេល ថ្មីៗកន្លងមកនេះ ។…
រាជធានីភ្នំពេញ ៖ មួយរយៈចុងក្រោយនេះ គេសង្កេតឃើញថា ធនធានសិល្បៈផ្នែកកំប្លែងកាន់តែមានការ ខើចទៅៗ បន្ទាប់ពីមរណភាពរបស់នាយសានម៉ៅ កាលពេល ថ្មីៗកន្លងមកនេះ ។…
រាជធានីភ្នំពេញ ៖ មួយរយៈចុងក្រោយនេះ គេសង្កេតឃើញថា ធនធានសិល្បៈផ្នែកកំប្លែងកាន់តែមានការ ខើចទៅៗ បន្ទាប់ពីមរណភាពរបស់នាយសានម៉ៅ កាលពេល ថ្មីៗកន្លងមកនេះ ។ បើទោះបីជាបច្ចុប្បន្នគេសង្កេតឃើញមានធនធានលើផ្នែកសិល្បៈកំប្លែងនេះកើតឡើងតិចតួចក្តី ប៉ុន្តែវាហាក់មិនសូវមានគុណភាព ឬមានការដុះដាលខ្លាំងដូចទៅនឹងតារាកំប្លែងជើងចាស់ដែលអាចនៅតែឈរជើងយ៉ាងរឹងមាំ និងនៅផ្តល់សំណើចដល់ទស្សនិកជនដដែល ។
ជាការកត់សម្គាល់បច្ចុប្បន្នមានតែតារាកំប្លែងជើងចាស់ប៉ុន្មានរូបមានដូចជា នាយក្រឹម នាយ កុយ នាយចាបចៀន យាយយយ អ្នកនាងគ្រត និងយាយអឿន ប៉ុណ្ណោះ ដែលអាចនៅមានសមត្ថភាពសម្តែងបាន ខណៈពេលដែលតារាកំប្លែងជើងចាស់ជាច្រើនបានធ្លាក់ខ្លួនឈឺ និងស្លាប់ជាបន្តបន្ទាប់ ។ ការបាត់បង់នាយសាន ម៉ៅ និងនាយវីតាមីនសេ កាលពីពេល ថ្មីៗនេះ ត្រូវបានគេចាត់ទុកថា ជាការបាត់បង់នូវធនធានដ៏ល្អលើផ្នែកសិល្បៈកំប្លែង ។
នាយ វីតាមីនសេ បានទទួលមរណភាពមិនបានប៉ុន្មានឆ្នាំផង ពេលនេះនាយសានម៉ៅ ក៏បានបាត់បង់ម្នាក់ទៀត ខណៈពេលដែលនាយក្តឹប នាយសង់ស៊ីស យាយណាង និងតារាកំប្លែងជាច្រើនទៀតបានធ្លាក់ខ្លួនឈឺ និងមិនអាចវិលមករកការសម្តែងជាថ្មីឡើងវិញ ។ ដោយសារតែមានការបាត់បង់តារាកំប្លែងជើងចាស់ជាបន្តបន្ទាប់នោះ បច្ចុប្បន្នគេសង្កេតឃើញថា ទាំងក្រុមកំប្លែងនាយកុយ និងនាយ ក្រឹម បានបញ្ចូលនូវសមាជិកកំប្លែងថ្មី ដើម្បីបំពេញតម្រូវការទស្សនិកជន បើទោះបីជាតារាថ្មីទាំងនោះខ្លះមិនសូវមានទេពកោសល្យសម្តែងយ៉ាងណាក៏ដោយ ។ នៅលើការសម្តែងតាមកញ្ចក់ទូរទស្សន៍ក្រៅពីក្រុមកំប្លែងនាយពែកមី ដែលលេងផ្តាច់មុខតែសម្រាប់ទូរទស្សន៍ CTN នោះ គេនៅឃើញមានក្រុមនាយកុយ នាយ ក្រឹម ដែលបានបន្ថែមសមាជិក ថ្មីៗ។
ដោយឡែកសម្រាប់តារាកំប្លែងនាយចេក ដែលជាតារាកំប្លែងមួយរូបត្រូវបានទស្សនិកជនទទូលស្គាល់ថា មានទេពកោសល្យម្នាក់ផងដែរនោះបានខ្ទាតចេញពីក្រុមកំប្លែងនាយកុយ អស់ជាច្រើនឆ្នាំ ដែលរហូតមកដល់ពេលនេះនៅមិនទាន់មានដំណឹងបានចូលលេងនៅឡើយទេ។
ក្រុមកំប្លែងនាយកុយ នៅតែអាចរក្សាទុកនូវកូនក្រុមរបស់ខ្លួនមានដូចជា នាងគ្រត នាង ប្រិមប្រិយ នាយហុងដា និងនាយក្រិន សម្រាប់ការសម្តែងរាល់ពីរសប្តាហ៍ម្តង នៅក្នុងកម្មវិធីសោភ័ណតន្ត្រីរបស់ទូរទស្សន៍CTN ។
ចំណែកក្រុមនាយក្រឹម បន្ទាប់ពីនាយក្តឹប បានធ្លាក់ខ្លួនឈឺនឹងមិនអាចមកសម្តែងវិញបាននោះ លោកក៏បានបញ្ចូលសមាជិកក្រុមថ្មីនាយផ្លយ ។ ខណៈពេលនាយចយ យាយអឿន និងនាយស្មាញ គឺតែរក្សាវត្តមានសម្តែងដដែល។ យ៉ាងណាក៏ដោយការបាត់បង់ធនធានផ្នែកកំប្លែងនេះក៏បានក្លាយទៅជាបញ្ហាប្រឈម និងក្តីបារម្ភផងដែរ ក្នុងពេលយុវវ័យសម័យថ្មីហាក់មិនសូវមានការចាប់យកអាជីពកំប្លែងនេះឡើយ ដោយភាគច្រើនសម្ដៅតែផ្នែកសម្តែង និងច្រៀង ។
តារាកំប្លែងជើងចាស់អ្នកនាងគ្រត បានអះអាងកាលពីពេល ថ្មីៗកន្លងមកថា ប្រសិនបើប៉ុស្តិ៍ទូរទស្សន៍មិនដាក់កម្មវិធីកំប្លែងនោះ ទៅថ្ងៃមុខវាអាចនឹងប្រឈមពីការបាត់បង់ ។ អ្នកនាងបញ្ជាក់ថា «យុវវ័យសម័យនេះពួកគាត់គឺស្វែងអាជីពសិល្បៈណាដែលអាចងាយរកលុយបាន និងឆាប់ទទួលបានភាពល្បីល្បាញ ប៉ុន្តែសម្រាប់អាជីពកំប្លែងនេះហាក់មិនសូវមានការចាប់អារម្មណ៍ច្រើនឡើយ ។
ដូច្នេះបណ្តាស្ថានីយទូរទស្សន៍នានាគួរបង្កើតមានកម្មវិធីកំប្លែងនៅក្នុងម៉ោងណាមួយ ហើយជាពិសេសបើអាចគួរៀបចំឲ្យមានការការប្រឡងជ្រើសរើសតារាកំប្លែង ថ្មីៗផង» ៕ (កែសម្រួលដោយ ៖ បុប្ផា)
ចែករំលែកព័តមាននេះ