ខេត្តត្បូងឃ្មុំ ៖ បុរសម្នាក់ជាអតីតទាហានខ្មែរក្រហម បានយកកណ្តៀវអារកប្រពន្ធ និងយកកាំបិតផ្គាក់មកកាប់ត្រូវក្បាលបន្ថែមទៀត បណ្តាលឲ្យស្ត្រីជាប្រពន្ធស្លាប់ក្នុងថ្លុកឈាមនៅលើផ្ទះឈើតំបន់ដាច់ស្រយាល ។ បន្ទាប់មកជនសង្ស័យបានដើរតម្រង់មករថយន្តរបស់សមត្ថកិច្ច ព្រមទាំងកាប់ត្រូវមន្ត្រីសមត្ថកិច្ចម្នាក់ បណ្តាលឱ្យរងរបួសធ្ងន់…
ខេត្តត្បូងឃ្មុំ ៖ បុរសម្នាក់ជាអតីតទាហានខ្មែរក្រហម បានយកកណ្តៀវអារកប្រពន្ធ និងយកកាំបិតផ្គាក់មកកាប់ត្រូវក្បាលបន្ថែមទៀត បណ្តាលឲ្យស្ត្រីជាប្រពន្ធស្លាប់ក្នុងថ្លុកឈាមនៅលើផ្ទះឈើតំបន់ដាច់ស្រយាល ។ បន្ទាប់មកជនសង្ស័យបានដើរតម្រង់មករថយន្តរបស់សមត្ថកិច្ច ព្រមទាំងកាប់ត្រូវមន្ត្រីសមត្ថកិច្ចម្នាក់ បណ្តាលឱ្យរងរបួសធ្ងន់ ។ ភ្លាមៗនោះ ក្រុមសមត្ថកិច្ចបានស្ទុះចូលទៅចាប់ឃាត់ខ្លួនជនសង្ស័យបានតែម្តង ។
ហេតុការណ៏ខាងលើនេះបានកើតឡើងកាលពីវេលាម៉ោង៤និង៣០នាទីទៀបភ្លឺថ្ងៃទី៦ តុលា ឆ្នាំ២០១៩ នៅភូមិមុខភ្នំ ឃុំទួលស្នួល ស្រុកក្រូចឆ្មារ ។
ជនសង្ស័យជាប្តីឈ្មោះ ឆយ ឈឿន អាយុ៥២ឆ្នាំ ជាអតីតទាហានខ្មែរក្រហម ចំណែកស្ត្រីរងគ្រោះជាប្រពន្ធដែលស្លាប់ឈ្មោះ ខាន់ តូច អាយុ៥៤ឆ្នាំ ។ គ្រួសារនេះមានកូនប្រុសម្នាក់អាយុ១០ឆ្នាំ រស់នៅក្នុងភូមិឃុំកើតហេតុខាងលើ ។ រីឯមន្ត្រីនគរបាលម្នាក់ដែលរងរបួសធ្ងន់ឈ្មោះឆេ ឡាង ភេទប្រុស អាយុ៤៩ឆ្នាំ ជានាយរងប៉ុស្តិ៍ទួលស្នួល ។
លោកវរសេនីយ៍ទោ វ៉ា សម្បត្តិ អធិការរងនគរបាលស្រុកក្រូចឆ្មារ បានឲ្យដឹងថា មុនពេលកើតហេតុ១ថ្ងៃ ស្ត្រីជាប្រពន្ធបានាំបុរសជាប្តីដែលមានអារម្មណ៏រវើរវាយទៅស្រោចទឹករំដោះគ្រោះចេញ គ្រាន់តែម៉ូតូជិះទៅជិតដល់វត្តនោះ ស្រាប់តែបុរសជាបានឈប់ម៉ូតូមិនព្រមចូលវត្តដើម្បីឲ្យព្រះសង្ឃស្រោចទឹកឲ្យនោះទេ រួចបានត្រឡប់មកផ្ទះវិញ លុះនៅវេលាម៉ោង៤និង៣០នាទីទៀបភ្លឺថ្ងៃទី៦ តុលា ឆ្នាំ២០១៩ ក៏មានកើតហេតុបែបនេះតែម្តង។
អធិការរងនគរបាលស្រុកក្រូចឆ្មារ បានឲ្យដឹងថា ក្រោយពីទទួលបានព័ត៌មានខាងលើភ្លាម លោកបានដឹកនាំកម្លាំងស្រុកនិងប៉ុស្តិ៍រដ្ឋបាលឃុំទួលស្នួលចុះទៅកាន់ផ្ទះកើតហេតុជាបន្ទាន់ និងឃើញបុរសជាឃាតករនៅលើផ្ទះរបស់ខ្លួន ហើយបុរសជាឃាតករបានដើរតម្រង់មករកថយន្តរបស់សមត្ថកិច្ច ដោយបានកាប់ត្រូវមន្ត្រីនគរបាលម្នាក់ បណ្តាលឱ្យរងរបួសធ្ងន់ ត្រូវបានបញ្ជូនទៅព្យាបាលនៅមន្ទីរពេទ្យឯរាជធានីភ្នំពេញ ។
លោកអធិការរងនគរបាលស្រុកក្រូចឆ្មារបានបន្តថា ភ្លាមៗនោះ សមត្ថកិច្ចបានស្ទុះទៅចាប់បុរសជាឃាតករជាប់ ខណៈពេលបំរុងកាប់បន្ថែម១កាំបិតទៀត ក៏ត្រូវសមត្ថកិច្ចចាប់ក្រៀកជាប់តែម្តង ។
ក្រោយពេលឃាត់ខ្លួន បុរសជាឃាតករបានឆ្លើយសារភាពថា នៅវេលាម៉ោងប្រហែល៣ឈានចូលព្រឹកថ្ងៃទី៦ តុលា ខ្លួនចេះតែរវើរវាយឃើញគេមករករឿង ពេលនោះខ្លួនក៏បានយកកាំបិតផ្គាក់ចុះមកដី តែប្រពន្ធបានឃាត់មិនឲ្យចុះមកដី ហើយបានទាញទ្វារបិទ ។
បុរសជាឃាតករបានឆ្លើយសារភាពបន្តថា បន្ទាប់មកប្រពន្ធក៏បានយកកាំបិតផ្គាក់ពីខ្លួនបោះមកដី រហូតដល់វេលាម៉ោងប្រហែល៤ទាបភ្លឺឈានចូលព្រឹកថ្ងៃទី៦តុលា ២០១៩ ខ្លួនក៏ខឹង ហើយចាប់ប្រពន្ធក្រៀកក រួចយកកណ្តៀវមកអារក និងបានផ្តួលទៅលើរនាបផ្ទះ ពេលឃើញប្រពន្ធមិនទាន់ស្លាប់ ខ្លួនក៏បានយកកាំបិតផ្គាក់មកកាប់បន្ថែមត្រូវក្បាល១កាបិតទៀត បណ្តាលឲ្យស្លាប់ក្នុងថ្លុកឈាមតែម្តង ។
បុរសជាឃាតករបានឆ្លើយសារភាពបន្តទៀតថា បន្ទាប់ពីកាប់ប្រពន្ធស្លាប់រួចហើយ ខ្លួនក៏បានយកកាំបិតចុះមកដីដើរទៅដើរមកតាមផ្លូវ និងបានដើរចូលមកផ្ទះវិញ លុះឡើងមកលើផ្ទះឃើញក្មួយខាងប្រពន្ធឈ្មោះ ខាន់ រស្មី កំពុងតែលើកមីង (ស្ត្រីរងគ្រោះដែលស្លាប់) ឡើង ខ្លួនក៏កាប់ត្រូវ១កាំបិតទៀត ហើយបានលោតចុះពីលើផ្ទះដើម្បីរត់គេចខ្លួន ។ បន្ទាប់មកទៀតក៏បានឃើញរថយន្តរបស់សមត្ថកិច្ចបានមកដល់ និងនាំគ្នាចេញពីរថយន្ត ពេលនោះខ្លួនបានទាញកាំបិតស្ទុះទៅកាប់ និងមានការប្រតាយប្រតប់គ្នាជាមួយសមត្ថកិច្ចទៀត ទើបត្រូវបានសមត្ថកិច្ចចាប់ឃាត់ខ្លួនជាប់តែម្តង ។
ក្រោយពេលកើតហេតុ សមត្ថកិច្ចបានពិនិត្យសពស្ត្រីរងគ្រោះឃើញមានស្នាមអារក និងកាប់ត្រូវក្បាល បន្ទាប់ពីពិនិត្យរួច សមត្ថកិច្ចក៏ប្រគល់សពឲ្យទៅសាច់ញាតិដើម្បីរៀបចំធ្វើបុណ្យតាមប្រពៃណី ។
នាព្រឹកថ្ងែទី៧ តុលា បុរសជាឃាតករត្រូវបានសមត្ថកិច្ចបញ្ជូនមកកាន់សាលាដំបូងខេត្តដើម្បីសួរនាំ និងចាត់ការតាមច្បាប់។ ចំណែកលោកនាយរងប៉ុស្តិ៍ទួលស្នួល ដែលរងរបួសធ្ងន់ ត្រូវបានការយកចិត្តទុកដាក់ពីលោកឧត្តមសេនីយ៍ទោ បែន រ័ត្ន ស្នងការនគរនបាលខេត្ត ហើយក្នុងពេលស្នាក់នៅព្យាបាលនៅមន្ទីរពេទ្យក្នុងរាជធានីភ្នំពេញ ត្រូវបានលោកទេសរដ្ឋមន្ត្រីជា សុផារ៉ា បានជួយចេញថ្លៃព្យាបាលរួមនឹងការស្នាក់នៅសព្វបែបយ៉ាងផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ