សហគ្រិនដែលជោគជ័យភាគច្រើនមានជំនាញក្នុងការដោះស្រាយបញ្ហាដោយប្រើប្រាស់ដំណោះស្រាយប្លែកៗ ។ ឧទាហរកណ៍ដូចជា Uber និង Airbnb ជាដើមដែលបង្កើតចេញសេវាដឹកជញ្ជូន និងជួលផ្ទះសម្រាប់ភ្ញៀវទេសចរប្រភេទថ្មី ។ អ្វីដែលមនុស្សទូទៅមិនចាប់អារម្មណ៍…
សហគ្រិនដែលជោគជ័យភាគច្រើនមានជំនាញក្នុងការដោះស្រាយបញ្ហាដោយប្រើប្រាស់ដំណោះស្រាយប្លែកៗ ។ ឧទាហរកណ៍ដូចជា Uber និង Airbnb ជាដើមដែលបង្កើតចេញសេវាដឹកជញ្ជូន និងជួលផ្ទះសម្រាប់ភ្ញៀវទេសចរប្រភេទថ្មី ។
អ្វីដែលមនុស្សទូទៅមិនចាប់អារម្មណ៍ គឺសហគ្រិនទាំងនេះតែងតែប្រើដំណោះស្រាយសាមញ្ញដើម្បីដោះស្រាយបញ្ហាដែលមនុស្សគិតថាស្មុគស្មាញ ។ ដូចជាក្រុមហ៊ុន Uber និង Grab ដែលដោះស្រាយបញ្ហាដឹកជញ្ជូនដែលហួសសម័យ ដោយអនុញ្ញាតឲ្យមនុស្សគ្រប់រូបដែលមានយាន្តជំនិះផ្ទាល់ខ្លួនចែករំលែកមធ្យោបាយដឹកជញ្ជូនជាមួយអ្នកដទៃដើម្បីរកប្រាក់ចំណូល ។
ជាទូទៅមនុស្សតែងតែចង់ស្វែងរកដំណោះស្រាយងាយៗដើម្បីដោះស្រាយបញ្ហា ប៉ុន្តែផ្នត់គំនិតរបស់យើងអាចបោកបញ្ឆោតឲ្យយើងគិតថាបញ្ហាដែលកំពុងជួបប្រទះមិនអាចត្រូវបានដោះស្រាយដោយដំណោះស្រាយសាមញ្ញទាំងនេះទេ ។ លើសពីនេះទៅទៀត មិនថាដំណោះស្រាយមានភាពសាមញ្ញប៉ុណ្ណាឡើយ ការអនុវត្តវាមិនតែងតែមានភាពងាយស្រួលទេ ។ សហគ្រិនដែលជោគជ័យយល់ច្បាស់ថាពួកគេត្រូវខិតខំយ៉ាងខ្លាំងដើម្បីធានាថា ផលិតផល ឬសេវាផ្គត់ផ្គង់របស់ពួកគេពិតជាអាចដោះស្រាយបញ្ហាដែលអតិថិជនកំពុងជួបប្រទះពិតមែន ។
កត្តាសំខាន់គឺកាត់បន្ថយភាពស្មុគស្មាញដែលអតិថិជនកំពុងតែជួបប្រទះក្នុងការរស់នៅប្រចាំថ្ងៃរបស់ពួកគេ ។ ឧទាហរណ៍ដូចជា Facebook កាត់បន្ថយភាពស្មុគស្មាញរបស់អ្នកលក់អនឡាញដោយអនុញ្ញាតឲ្យពួកគេធ្វើការ Live ដើម្បីទាក់ទាញអតិថិជនដែលចូលចិត្តការមើលឃើញមុខអ្នកលក់ និងមើលឃើញផលិតផលផ្ទាល់មុនពេលសម្រេចចិត្តទិញជាដើម ។
ដំណោះស្រាយដែលមើលទៅសាមញ្ញទាំងនេះអនុញ្ញាតឲ្យក្រុមហ៊ុនធំៗជាច្រើនជោគជ័យ ប៉ុន្តែវាត្រូវឆ្លងកាត់ការរៀបចំ និងស្រាវជ្រាវជាយូរមុននិងអាចបង្កើត និងសាកល្បងប្រើបាន ។ ប៉ុន្តែការបង្កើតផលិតផល ឬសេវាដែលផ្តល់ភាពងាយស្រួលដល់អតិថិជនទាំងនេះ អាចផ្តល់ដំណោះស្រាយមួយដែលមានឥទ្ធិពលយូរ ។ ជាលទ្ធផល អតិថិជនរបស់អ្នកនឹងបន្តមករកអ្នកដើម្បីដោះស្រាយបញ្ហាដែលពួកគេកំពុងជួបប្រទះ ៕ កែសម្រួលដោយ ៖ សុឃាក់
ចែករំលែកព័តមាននេះ