ខេត្តកំពង់ចាម ៖ លោកម៉ាន យូស្រេង ហៅស៊ីម៉ន អាយុ៤១ឆ្នាំ នៅភូមិព្រែកដើមចាន់ សង្កាត់សំបួរមាស ក្រុងកំពង់ចាម ប្រធានការិយាល័យសង្គមកិច្ចនិងអតីតយុទ្ធជនពិការស្រុកស្រីសន្ធរ បានលើកដៃសំពះទាំងសម្រក់ទឹកភ្នែកនៅក្នុងសាលសវនាការសាលាដំបូងខេត្ត កាលព្រឹកថ្ងៃទី១១ មេសា សូមអង្វរដល់លោកឱម យិនទៀង ប្រធានអង្គភាពប្រឆាំងអំពើពុករលួយ និងលោកប្រធានសាលាដំបូងខេត្ត មេត្តាឲ្យរូបគេបានរួចផុតពីការចោទប្រកាន់លើករណីលុយចំនួនជាង២លានរៀលរបស់មន្រ្តីសោធននិវត្តន៏ជាង១០នាក់ ដោយសំអាងថា បានសងទៅពួកគាត់វិញអស់ហើយ ដើម្បីមានឱកាសទៅព្យាបាលជំងឺ ដែលកំពុងយាយីលើរាងកាយនោះ ។
លោកគា អ៊ាវមេធាវី ការពារឲ្យជនជាប់ចោទឈ្មោះម៉ាន យូស្រេង បានលើកឡើងថា កូនក្តីរបស់លោកពិតជាមិនបានបើកលុយឲ្យទៅមន្រ្តីសោធននិវត្តន៏ចំនួនជាង១០នាក់នៅស្រុកស្រីសន្ធរក្នុងខែមីនា ២០១២ ពិតប្រាកដមែន ដោយសារតែលុយចំនួនជាង២លានរៀលនោះ ដកចាយអស់ហើយ ហើយត្រូវចាត់ទុកថាជាការរំលោភលើសេចក្តីទុកចិត្តផងដែរ ។ លោកគា អ៊ាវ បន្តថា តាមពិតទៅកូនក្តីរបស់លោកមិនមានចេតនាកិបកេងលុយនោះទេ ប្រសិនបើមានមែននោះនឹងយកលុយទាំងអស់មិនខាន ដោយមួយផ្នែកធំបានបើកជូនដល់មន្រ្តីនិវត្តន៏អស់ហើយ តែនៅខ្វះជាង១០នាក់ប៉ុណ្ណោះ ។ ចំពោះលុយទាំងនេះត្រូវបានកូនក្តីរបស់លោកបានបង្វិលសងវិញអស់ហើយដែរ សូមឲ្យតុលាការលើកលែងការចោទប្រកាន់ដល់កូនក្តីរបស់លោកដែលមានជំងឹផ្នែកតម្រងនោមនោះ ទាមទារឲ្យចូលពេទ្យត្រូវការវះកាត់ ។
ដើមបណ្តឹងឈ្មោះ អោ ស៊ាងឡេង ភេទស្រី អាយុ ៦៣ឆ្នាំ រស់នៅស្រុកស្រីសន្ធរ បានលើកឡើងថាចំពោះលុយប្រាក់ខែរបស់គាត់ ដែលលោកប្រធានការិយាល័យសង្គមកិច្ចមិនបានបើកឲ្យគាត់នៅក្នុងអំឡុងខែមីនា ឆ្នាំ ២០១២ ដែលមានចំនួនជាង២៨ម៉ឺនរៀល ក្រោយមកលុយទាំងនេះត្រូវបានគេបើកឲ្យនៅខែកក្កដា ឆ្នាំ២០១៣ ដូច្នេះគាត់ឈប់ប្តឹងលើករណីនេះ ។
ដោយឡែកលោករៀល សុភិន ព្រះរាជអាជ្ញារងអមសាលាដំបូងខេត្ត មានប្រសាសន៏ថា ជនជាប់ចោទខាងលើនេះ សូមឲ្យផ្តន្ទាទោសបន្តទៀតតាមផ្លូវច្បាប់ ៕
ចែករំលែកព័តមាននេះ