រាជធានីភ្នំពេញ ៖ មានការភ្ញាក់ផ្អើលមួយ ខណៈពេលដែលអ្នកភូមិកំពុងនាំគ្នារាំសប្បាយរីករាយបុណ្យដាលានភូមិ ស្រាប់តែយុវជនម្នាក់បានធ្លាក់ពីលើផ្ទះថ្មល្វែងជាន់ទី៣ មិនដឹងមូលហេតុ បណ្តាលឲ្យរងរបួសធ្ងន់ត្រូវសាច់ញាតិបញ្ជូនទៅមន្ទីរពេទ្យកាល់ម៉ែតដើម្បីសង្រ្គោះជីវិត។ ហេតុការណ៍នេះបានកើតឡើងកាលពីវេលាម៉ោង១០និង៣០នាទីយប់ថ្ងៃទី១០ មេសា នៅច្រកឌឿងហែមផ្លូវលេខ៥៣ ស្ថិតក្នុងក្រុមទី២០ ភូមិ៤ សង្កាត់ផ្សារថ្មី៣ ខណ្ឌដូនពេញ ។
សមត្ថកិច្ចបានឲ្យដឹងថា នៅវេលាយប់ថ្ងៃទី១០ មេសា អ្នកភូមិទី៤ សង្កាត់ផ្សារថ្មី៣ ខណ្ឌដូនពេញ នាំគ្នាធ្វើបុណ្យដាលានភូមិ ក៏ដូចជាអបអរសាទរក្នុងឱកាសបុណ្យចូលឆ្នាំខ្មែរប្រពៃណីជាតិនាពេលខាងមុខថ ហើយជាទម្លាប់សំរាប់អ្នកភូមិខាងលើរៀបចំជារៀងរាល់ឆ្នាំ ។ ដំណើរការរាំរែកសប្បាយរបស់អ្នកភូមិទី៤ទៅមុខជាបន្តបន្ទាប់ លុះដល់ម៉ោង១០និង៣០នាទី មានការភ្ញាក់ផ្អើលយ៉ាងខ្លាំង ខណៈពេលយុវជនម្នាក់ដែលចូលរួមបុណ្យនោះដែរ បានធ្លាក់ពីលើផ្ទះលេខ១២០អឺ៣ហ្សិត(ជាន់ទី៣) ចុះមកទើរលើអាងទឹកជាន់ទី២ បណ្តាលឲ្យរងរបួសធ្ងន់ ហើយភ្លាមៗនោះក្រុមគ្រួសារនិងមិត្តភក្តិបានដឹកបញ្ជូនទៅកាន់មន្ទីរពេទ្យកាល់ម៉ែតដើម្បីសង្រ្គោះជីវិត។
សមត្ថកិច្ចមូលដ្ឋានបានបញ្ជាក់ថា យុវជនដែលធ្លាក់ពីលើផ្ទះថ្មល្វែងជាន់ទី៣ មិនទាន់ដឹងមូលហេតុមានឈ្មោះអិុន តុលា ភេទប្រុស អាយុ១៩ឆ្នាំ ស្នាក់នៅផ្ទះលេខ៣អឺ៣ហ្សិត ក្រុមទី២០ ភូមិ៤ សង្កាត់ផ្សារថ្មី៣ ខណ្ឌដូនពេញ ។
ចែករំលែកព័តមាននេះ