រាជធានីភ្នំពេញ ៖ បន្ទាប់ពីមានជំនួបតាមទូរស័ព្ទជាមួយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីពេលថ្មីៗនេះ ស្របពេលដែលសម្តេចតេជោ ហ៊ុន សែន បានទម្លាយឱ្យដឹងពីការសន្ទនាគ្នាដ៏កម្រកាលពីព្រឹកថ្ងៃទី១០ មេសា លោក សម រង្ស៊ី ប្រធានគណបក្សសង្គ្រោះជាតិ បានធ្វើសន្និសីទសារព័ត៌មានមួយនៅទីស្នាក់ការគណបក្សថា គណបក្សសង្គ្រោះជាតិ
រាជធានីភ្នំពេញ ៖ បន្ទាប់ពីមានជំនួបតាមទូរស័ព្ទជាមួយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីពេលថ្មីៗនេះ ស្របពេលដែលសម្តេចតេជោ ហ៊ុន សែន បានទម្លាយឱ្យដឹងពីការសន្ទនាគ្នាដ៏កម្រកាលពីព្រឹកថ្ងៃទី១០ មេសា លោក សម រង្ស៊ី ប្រធានគណបក្សសង្គ្រោះជាតិ បានធ្វើសន្និសីទសារព័ត៌មានមួយនៅទីស្នាក់ការគណបក្សថា គណបក្សសង្គ្រោះជាតិបានទទួលជោគជ័យ៨០%ហើយ នៅសល់តែបញ្ហាជាប់គាំងបន្តិចប៉ុណ្ណោះ គឺគណបក្សទាំងពីរកំណត់ថ្ងៃបោះឆ្នោតសាជាថ្មីមិនទាន់ត្រូវគ្នា ។
ដោយអវត្តមានលោក កឹម សុខា អនុប្រធានគណបក្សសង្គ្រោះជាតិ ដែលកំពុងធ្វើទស្សនកិច្ចនៅក្រៅប្រទេស លោក សម រង្ស៊ី ថ្លែងថា លោកបានពិភាក្សាជាមួយសម្តេចតេជោ ហ៊ុន សែន ពិត មែន ។ ក្នុងជំនួបពិភាក្សាតាមទូរស័ព្ទនោះ ថ្នាក់ដឹកនាំទាំងពីរចង់ដោះស្រាយវិបត្តិនយោបាយដែលប្រទេសកម្ពុជាកំពុងប្រឈមមុខ ។ គណបក្សសង្គ្រោះជាតិមិនចង់ឱ្យមានការប្រើអំពើហិង្សាណាមួយកើតឡើងនោះទេ ។ ដូច្នេះមានផ្លូវតែមួយគត់ គឺការចរចាគ្នាដោយសន្តិវិធីរហូតមកដល់ពេលនេះយើងមិនបានស្តាយក្រោយទេ ។ ជាក់ស្តែង ការពិភាក្សាជាមួយថ្នាក់ដឹកនាំគណបក្សប្រជាជន បានផ្លាស់ប្តូរយោបល់គ្នា យល់ពីគ្នា ទោះបីជាមិនទាន់ទទួលបានជោគជ័យទាំងស្រុងក្ដី ក៏យើងបានទទួលលទ្ធផល៨០%ទៅហើយ ។
លោក សម រង្សុី បញ្ជាក់ថា កាលពីពិភាក្សាជាមួយសម្ដេចតេជោ រូបខ្ញុំមានគំនិតចង់ចូលក្នុងព្រះបរមរាជវាំងថាចង់ឱ្យមានជំនួបកំពូលរវាងថ្នាក់ដឹកនាំគណបក្សទាំងពីរទៀត ។ ប៉ុន្តែគណបក្សសង្គ្រោះជាតិមានបញ្ហាបច្ចេកទេសបន្តិច គឺដោយសារលោក កឹម សុខា នៅក្រៅប្រទេស ព្រោះថា គណបក្សសង្គ្រោះជាតិធ្វើអ្វីមួយចុះហត្ថលេខាទាល់តែមានវត្តមានទាំង២នាក់ ប្រសិនបើមានហេតុអ្វីដែលចង់ឱ្យគណបក្សសង្គ្រោះជាតិធ្វើអ្វីមួយជាផ្លូវការនោះទាល់តែមានលោក កឹម សុខា និងរូបខ្ញុំ សម រង្សុី ទើបអាចសម្រេចបាន ។ ការជជែកគ្នាតាមទូរស័ព្ទជាមួយសម្ដេចតេជោ គឺទទួលបានភាពវិជ្ជមានដែលការជជែកគ្នានោះគឺយើងបានយល់ព្រមគ្នាឱ្យមានការរៀបចំការកែទម្រង់ការបោះឆ្នោត ហើយក្នុងការកែទម្រង់ការបោះឆ្នោតនោះគឺការកែទម្រង់ស្ថាប័នគណៈកម្មាធិការជាតិរៀបចំការបោះឆ្នោត (គ.ជ.ប) មុនអ្វីៗទាំង អស់ ។
លោក សម រង្សុី បញ្ជាក់ថា អ្វីដែលសម្ដេចតេជោ យល់ព្រមជាមួយលោកគឺ ស្ថាប័នបោះឆ្នោតដែលឯករាជ្យពេញលេញ ដោយមានចែងក្នុងរដ្ឋធម្មនុញ្ញ ហើយសមាសភាពនៃស្ថាប័ននេះនឹងចេញមកពីគណបក្សទាំង២ ។ ក្នុងេសចក្តីព្រាងដែលថ្នាក់ដឹកនាំទាំងពីរគ្រោងចុះហត្ថលេខាលើកិច្ចព្រមព្រៀងគ្នានោះមានច្រើនចំណុច បុ៉ន្តែមានមួយចំណុចតែបុ៉ណ្ណោះ គឺជាការកំណត់ថ្ងៃបោះឆ្នោតជាថ្មី ។ ក្នុងជំនួបតាមទូរស័ព្ទ សម្តេចតេជោ ហ៊ុន សែន បានស្នើឱ្យទាញថ្ងៃបោះឆ្នោតមកមុខបន្តិច បុ៉ន្តែមិនដូចអ្វីដែលគណបក្សសង្គ្រោះជាតិចង់បាននោះទេ ។ គណបក្សសង្គ្រោះជាតិចង់បានទាញថ្ងៃបោះឆ្នោតឱ្យកាន់តែឆាប់ទាំងការបោះឆ្នោតឃុំ-សង្កាត់ និងការបោះឆ្នោតជ្រើសតាំងតំណាងរាស្ត្រ ។
តាមធម្មតា ការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅដើមខែមិថុនា ឆ្នាំ២០១៧ បុ៉ន្តែគណបក្សប្រជាជនកម្ពុជាបានទាញមកដល់ខែកុម្ភៈ ឆ្នាំ២០១៧ ។ ចំពោះការបោះឆ្នោតជ្រើសតាំងតំណាងរាស្ត្រវិញ តាមធម្មតានៅខែកក្កដា ឆ្នាំ២០១៨ បុ៉ន្តែគណបក្សប្រជាជនកម្ពុជាបានទាញមកដល់ខែកុម្ភៈ ឆ្នាំ២០១៨ ជាលទ្ធផលល្អដែលបក្សសង្គ្រោះជាតិចង់បានមួយចំណុចដែរ ។ ទោះបីជាគណបក្សប្រជាជនកម្ពុជាទាញមកមុខបុ៉ន្មានខែមកនោះ ក៏គណបក្សសង្គ្រោះជាតិមិនទទួលយកទេ គឺគណបក្សសង្គ្រោះជាតិចង់ឱ្យទាញមួយឆ្នាំ ។ ទោះជាយ៉ាងណាក្តី លោកសម រង្ស៊ី បានបង្ហើបពីការចរចាគ្នានោះថា នឹងមាននៅថ្ងៃខាងមុខទៀត តែមិនទាន់កំណត់ច្បាស់លាស់ទេ គឺរង់ចាំលោកកឹម សុខា ត្រឡប់មកពីក្រៅប្រទេសវិញសិន ។ លោកបញ្ជាក់ហើយបញ្ជាក់ទៀតថា ជាប់គាំងតែបន្តិចទេសម្រាប់ការចរចាគ្នា គឺត្រង់ការកំណត់ថ្ងៃបោះឆ្នោតមុនអាណត្តិ ។ គណបក្សសង្គ្រោះជាតិចង់បានឆ្នាំ២០១៧ ចំណែកគណបក្សប្រជាជនកម្ពុជាវិញចង់បោះឆ្នោតនៅខែកុម្ភៈ២០១៨ វាគ្មានអ្វីដែលជាការគាំងធ្ងន់ធ្ងរទេ ឱ្យតែភាគីទាំង២យោគយល់គ្នាបន្តិចនឹងត្រូវគ្នា។
សូមបញ្ជាក់ថា លោក សម រង្សុី បានជួបគ្នាតាមទូរស័ព្ទជាមួយសម្តេចតេជោ ហ៊ុន សែន កាលពីថ្ងៃទី៩ មេសា ដោយចំណាយពេលអស់ជិត៤៥នាទី និងបានឯកភាពគ្នារហូតចង់មានចុះហត្ថលេខាជាលាយលក្ខណ៍អក្សរនៅចំពោះព្រះភក្ត្រព្រះមហាក្សត្រទៀត តែគណបក្សសង្គ្រោះជាតិត្រូវរង់ចាំលោកកឹម សុខា សិន ។ យោងតាមប្រភពពីគេហទំព័រក្នុងស្រុកមួយបានឱ្យដឹងថា ថ្នាក់ដឹកនាំគណបក្សទាំង២គ្រោងនឹងចូលទៅក្នុងព្រះបរមរាជវាំងនៅថ្ងៃ១២ មេសា បន្ទាប់ពីលោក កឹម សុខា វិលត្រឡប់មកពីអាមេរិកវិញ ៕
ចែករំលែកព័តមាននេះ