រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា ប្រជាពលរដ្ឋទាំងអស់ដែលទន្ទឹងរង់ចាំនូវលទ្ធផលនៃជំនួបពិភាក្សារវាងសម្តេចជាមួយលោកសម រង្ស៊ី ថ្មីៗកន្លងទៅនេះរយៈពេល៤៤នាទី អំពីបញ្ហាមួយដែលនៅសេសសល់ទាក់ទិននឹងកាលបរិច្ឆេទនៃការបោះឆ្នោត និងកំណែទម្រង់ការបោះឆ្នោត។
រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា ប្រជាពលរដ្ឋទាំងអស់ដែលទន្ទឹងរង់ចាំនូវលទ្ធផលនៃជំនួបពិភាក្សារវាងសម្តេចជាមួយលោកសម រង្ស៊ី ថ្មីៗកន្លងទៅនេះរយៈពេល៤៤នាទី អំពីបញ្ហាមួយដែលនៅសេសសល់ទាក់ទិននឹងកាលបរិច្ឆេទនៃការបោះឆ្នោត និងកំណែទម្រង់ការបោះឆ្នោត។
លទ្ធផលនៃការចរចានេះ គឺគណបក្សទាំងពីរបានឯកភាពគ្នាកំណត់ឡើងវិញនូវកាលបរិច្ឆេទនៃការបោះឆ្នោតនាពេលខាងមុខដូចតទៅ ៖
-បោះឆ្នោតឃុំ-សង្កាត់នាខែកុម្ភៈ ឆ្នាំ២០១៧
-បោះឆ្នោតជ្រើសតាំងតំណាងរាស្ត្រនាខែកុម្ភៈ ឆ្នាំ២០១៨
សម្តេចអគ្គមហាសេនាបតីតេជោ ហ៊ុន សែន មានប្រសាសន៍បែបនេះនាព្រឹកថ្ងៃទី១០ មេសា នៅវិទ្យាស្ថានជាតិអប់រំ ក្នុងឱកាសអញ្ជើញជាអធិបតីភាពក្នុងពិធីប្រគល់វិញ្ញាបនបត្រ និងសញ្ញាបត្រជូនដល់សិក្ខាកាមថ្នាក់វិជ្ជាជីវៈ និងនិស្សិតថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ចំនួន១.៧៩៤នាក់ (នារី៧០៧នាក់) នៃសាកលវិទ្យាល័យធនធានមនុស្សដែលបានបញ្ចប់ការសិក្សាឆ្នាំ២០១១-២០១២ កន្លងមក ក្នុងនោះក៏មាននិស្សិតថ្នាក់បរិញ្ញាបត្រផ្នែកអាហារូបករណ៍របស់សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិតចំនួន២៩នាក់ផងដែរ ។
សម្តេចតេជោនាយករដ្ឋមន្ត្រីមានប្រសាសន៍បន្តថា លោកសម រង្ស៊ី បញ្ជាក់ថា លោកឯកភាពហើយ បុ៉ន្តែលោកសម រង្ស៊ី បានសុំពេលវេលាពិគ្រោះជាមួយអនុប្រធានរបស់គាត់ គឺលោកកឹម សុខា ដែលគាត់កំពុងនៅសហរដ្ឋអាមេរិក លោកនឹងខិតខំឱ្យលោកកឹម សុខា មកពីសហរដ្ឋអាមេរិកឱ្យទាន់ថ្ងៃទី១១ មេសានេះ ។
សម្តេចតេជោមានប្រសាសន៍បន្តថា ថ្ងៃ១១ មេសា ដែលលោកនិយាយស្នើសុំនេះត្រឹមត្រូវហើយ ព្រោះជាថ្ងៃសុក្រ ខ្ញុំថា អាទិត្យចុះរណ្តៅ ចន្ទចុះផ្លូវ អង្គារចុះភ្លើង ពុធចុះភូមិ ព្រហស្បតិ៍ចុះវិលវង់ សុក្រចុះដំណេក ដូច្នេះត្រូវហើយ ។ រួចហើយយើងត្រូវសុំទៅព្រះមហាក្សត្រ ព្រោះព្រះអង្គមានពេលវេលាត្រឹមតែម៉ោង៩ ទេ ដោយសារព្រះអង្គក៏មានកិច្ចការរបស់ព្រះអង្គដែរ ។ លោកសម រង្ស៊ី ថា គាត់ត្រូវការពេល១ម៉ោងដើម្បីសួរយោបល់អនុប្រធានរបស់គាត់ ។ ទាក់ទិននឹងបញ្ហានេះ សម្តេចតេជោនាយករដ្ឋមន្ត្រីបានប្រាប់ទៅលោកសម រង្ស៊ី វិញថា លោកជាប្រធាន លោកប្រាប់ទៅលោកកឹម សុខា ទៅថា កុំរឹងពេក… ។
ពាក់ព័ន្ធនឹងការឯកភាពគ្នារវាងគណបក្សប្រជាជន និងគណបក្សសង្គ្រោះជាតិ សម្តេចតេជោនាយករដ្ឋមន្ត្រី ហ៊ុន សែន បានដាស់តឿនថា សូមកុំធ្វើសេចក្តីថ្លែងការណ៍ណាមួយដែលខុសនឹងការដែលបាននិយាយគ្នា ព្រោះអ្វី ? កាលណាបើមានការពិភាក្សាចរចាគ្នាហើយ គឺសុទ្ធតែមានការថតសំឡេងខ្សែអាត់រៀងៗខ្លួន ហើយកិច្ចចរចានេះក៏មានថតសំឡេងជាភស្តុតាង ដែរ ដូច្នេះសូមកុំឱ្យមានអ្នកខ្លះធ្វើជារង្ស៊ី លើសរង្ស៊ី ព្រោះនេះគឺជាសំឡេងទាំងស្រុង៤៤នាទីនិង២០វិនាទី ។ សម្តេចគូសបញ្ជាក់ថា ខ្ញុំមិនចង់ឱ្យអ្នកណាមួយនិយាយខុសរឿងទេ ។ លោកសម រង្ស៊ី បានឯកភាពហើយតើរឿងនេះ ហើយបានធ្វើសេចក្តីព្រាងសម្រាប់ចុះហត្ថលេខា លោកព្រុំ សុខា ជាមួយលោកសុន ឆ័យ ធ្វើជាមួយគ្នា ។
សម្តេចតេជោមានប្រសាសន៍ថា ខ្ញុំក៏មិនទាន់ដាក់ការអស់សង្ឃឹមទេ ខ្ញុំបានទាក់ទងជាមួយលោកឧបនាយករដ្ឋមន្ត្រី ស ខេង ហើយលោកឧបនាយករដ្ឋមន្ត្រី ស ខេង បានប្រាប់មកខ្ញុំថា ឥឡូវលោកកឹម សុខា អត់ព្រម ។ ទោះបីមានការឯកភាពជាមួយលោកសម រង្ស៊ី ក៏ដោយ ក៏បុ៉ន្តែចំណែកខ្ញុំថា មិនទាន់ជាផ្លូវការទេ ព្រោះប្រធាន និងអនុប្រធានអត់ត្រូវគ្នា មួយព្រម មួយអត់ព្រម ខ្ញុំក៏អត់យល់ដែរ ។ សម្តេចតេជោបានរំលឹករឿងអតីតកន្លងមកថា តែខ្ញុំក៏ធ្លាប់ឆ្លងកាត់រឿងហ្នឹងដែរ ដោយសារខ្ញុំធ្លាប់ចរចាជាមួយត្រីភាគី ។ កាលពីនៅប៉ាតាយ៉ា ប្រទេសថៃ ព្រះករុណាព្រះបរមរតនកោដ្ឋ សម្តេចព្រះនរោត្តម សីហនុ និងលោកសឺន សាន យល់ព្រមឈប់បាញ់នៅនឹងកន្លែង ខៀវ សំផន អត់ព្រម (ពេលអង្គុយចរចា)។ ស្រាប់តែដល់ពេលទៅអង្គុយពិសាបាយ ព័ត៌មានថា លោកសក់ ស៊ុតសាខន អត់យល់ព្រមឈប់បាញ់ទេ ។ កាលនោះ លោកសឺន សាន ជានាយករដ្ឋមន្ត្រី ពីរនាក់នោះទាស់គ្នាថា ប្រធានមិនព្រមសួរអគ្គបញ្ជាការទ័ព ។ ពេលនោះខ្ញុំថាតែម្តង យី! ឯកឧត្តមធ្វើប្រធានគេហើយឱ្យគេជំទាស់ លោកថាឈប់បាញ់ ហើយចុះមេអគ្គបញ្ជាការអត់ព្រមឈប់បាញ់ ដូច្នោះតើធ្វើម៉េចទៅ ?
សម្តេចតេជោនាយករដ្ឋមន្ត្រីបញ្ជាក់ថា ខ្ញុំអត់ទាន់ថាអស់សង្ឃឹមទេ ព្រោះលោកប្រធានសម រង្ស៊ី បានព្រមហើយ លោកត្រូវការពិគ្រោះជាមួយលោកអនុប្រធាន កឹម សុខា ។ ខ្ញុំបានប្រាប់លោកសម រង្ស៊ី ថា លោកជាប្រធានប្រាប់ទៅលោកកឹម សុខា ទៅថា កុំរឹងពេក ។ សម្តេចបន្តថា ជារួមគឺជាការល្អទេ ក្នុងន័យស្ថាបនាទាក់ទងនឹងការធ្វើកិច្ចការជាមួយគ្នា ក៏បុ៉ន្តែបើរឿងដែលមិនអាចចុះហត្ថលេខាបាន មិនមែនជាកំហុស ហ៊ុន សែន ឬគណបក្សប្រជាជន ហើយក៏មិនមែនជាកំហុស សម រង្ស៊ី និងក្រុមការងារ គឺជាកំហុសរបស់លោកកឹម សុខា ។ សូមកុំធ្វើសេចក្តីថ្លែងការណ៍ណាមួយខុសរឿង ខុសរ៉ាវ ខុសសម្តីដែលនិយាយគ្នា ។ ដូច្នេះសូមមេត្តាកុំនិយាយអ្វីឱ្យខុសពីអ្វីដែលយើងបានព្រមព្រៀងគ្នា ឯកភាពគ្នាហើយ ។ បុ៉ន្តែខ្ញុំយល់ ដោយសារគណបក្សនេះទើបនឹងចូលគ្នា ទើបអាយុបានតែ១ឆ្នាំ ៣ថ្ងៃ ហើយប្រធាន និងអនុប្រធានត្រូវការធ្វើការកុងសង់សីុស ។ ប្រធានយល់ព្រមហើយនៅអនុប្រធានមិនព្រម ដូច្នេះបើសិនជាករណីជាប់គាំង សូមកុំទម្លាក់កំហុសឱ្យគណបក្សប្រជាជន ឬ ហ៊ុន សែន ឬទម្លាក់កំហុសទៅ សម រង្ស៊ី គឺរឿងរបស់កឹម សុខា និយាយប្រការទុកឱ្យហើយ ការពារប្រការខ្លាចក្រែងលោចុះហត្ថលេខាមិនបាន ។
សម្តេចមានប្រសាសន៍ថា ក៏ត្រូវគិតអំពីការបោះឆ្នោតព្រឹទ្ធសភាផងដែរ អាចរៀបចំឱ្យទៅដើមឆ្នាំ ឬចុងឆ្នាំ២០១៦ បោះឆ្នោតព្រឹទ្ធសភាហើយបានចាប់ផ្តើមយកអង្គបោះឆ្នោតក្រុមប្រឹក្សាឃុំ-សង្កាត់ ជាសេចក្តីប្រកាសកាលបរិច្ឆេទបោះឆ្នោតធ្វើឡើងដោយនាយករដ្ឋមន្ត្រីទេសម្រាប់ការបោះឆ្នោត ។
បុ៉ន្តែបញ្ហាចោទដែលមានកថាខ័ណ្ឌចុងក្រោយ គណបក្សទាំងពីរឯកភាពគ្នាក្នុងការសិក្សាដើម្បីឈានទៅធ្វើវិសោធនកម្មបទដ្ឋានគតិយុត្តពាក់ព័ន្ធដើម្បីធានាការអនុវត្តកិច្ចព្រមព្រៀងនេះ ។ ដូច្នេះចំណុចនេះមានពាក់ព័ន្ធជាមួយនឹងរដ្ឋធម្មនុញ្ញ ៕
ចែករំលែកព័តមាននេះ