ក្រុងប៉ោយប៉ែត ៖ ក្រុមឈ្មួញលួចនាំម៉ូតូគេចពន្ធលោតឆត្រមកពីប្រទេសថៃតាមច្រកទ្វារអន្តរជាតិប៉ោយប៉ែតត្រូវក្រុមមន្ត្រីជំនាញ៣ស្ថាប័នដែលឈរជើងនៅក្រោមប្រាសាទកំពូលបីច្រកប៉ោយប៉ែតឃាត់ចាប់បានកាលពីរសៀល ថ្ងៃទី៩ មេសា ២០១៤ ខណៈពេលដែលគេបានបង្កប់ដាក់ក្នុងរទេះដឹកទំនិញជួលកម្មករឱ្យអូសចូលមកក្នុងគោលបំណងបន្លំភ្នែកសមត្ថកិច្ចជំនាញ តែត្រូវជាប់ជុងរបស់សមត្ថកិច្ចតែម្តង។
តាមប្រភពព័ត៌មានពីមន្ត្រីជំនាញដែលឈរជើងនៅក្រោមប្រាសាទកំពូលបីមាត់ច្រកប៉ោយប៉ែតបានឱ្យដឹងថា ម៉ូតូដែលឃាត់ចាប់នេះជាប្រភេទម៉ូតូធុនធំម៉ាក PCX ស៊េរីឆ្នាំ២០១៤ មួយគ្រឿងដែលក្រុមឈ្មួញបានដាក់បង្កប់ក្នុងរទេះដឹកទំនិញ ហើយជួលកម្មករឱ្យអូសចូលមកពីប្រទេសថៃក្នុងគោលបំណងបន្លំភ្នែកមន្ត្រីជំនាញ ដោយមិនបានបង់ពន្ធត្រឹមត្រូវឡើយ។
តែទោះជាបែបណាក្តី ម៉ូតូលោតឆត្រ១គ្រឿងនេះត្រូវមន្ត្រីជំនាញសហការគ្នាឆែកឆេររទេះរបស់កម្មករឃាត់ចាប់បានតែម្តង ប៉ុន្តែចំពោះមេឈ្មួញបានគេចខ្លួនបាត់ស្រមោលនៅសល់តែកម្មករអូសរទេះតែប៉ុណ្ណោះ។ មន្ត្រីជំនាញបន្តថា ម៉ូតូលោតឆត្រ១គ្រឿងនេះត្រូវបានមន្ត្រីគយ និងរដ្ឋាករច្រកប៉ោយប៉ែតយកទៅរក្សាទុកជាបណ្តោះអាសន្នរង់ចាំម្ចាស់ចូលមកបង់ពន្ធតាមច្បាប់៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ