រាជធានីភ្នំពេញ ៖ នៅសាលាខណ្ឌដូនពេញ កាលពីព្រឹកថ្ងៃទី១០ មេសា បានរៀបចំពិធីសូត្រមន្តចំរើនព្រះបរិត្ត លើករាសីក្នុងឱកាសបុណ្យចូលឆ្នាំថ្មី ប្រពៃណីជាតិ ឆ្នាំមមី ឆស័ក ពុទ្ធសករាជ ២៥៥៨ ក្រោមវត្តមាន លោក សុខ សម្បត្តិ អភិបាលនៃគណ:អភិបាលខណ្ឌដូនពេញ និងលោក ហែម អាន ប្រធានក្រុមប្រឹក្សាខណ្ឌ អភិបាលរង ចៅសង្កាត់ទាំ១១ ព្រមទាំងមន្ត្រីការិយាល័យចំណុះជំនាញ ជុំវិញសាលាខណ្ឌជាច្រើនទៀត។
ក្នុងពិធីសូត្រមន្ត និងរាប់បាត្រនៅឆ្នាំនេះ មន្ត្រីសាលាខណ្ឌដូនពេញទាំងអស់ ក៏បានបួងសួងដល់វត្ថុស័ក្តិសិទ្ធក្នុងលោក មានទេវតារក្សាឆ្នាំថ្មី ឆ្នាំមមីជាដើមនោះ សូមជួយប្រោះព្រហ្ម សេរីសួស្តីជ័យមង្គលអាយុយឺនយូរ ឈ្នះរោគាទាំងឡាយ និងបួងសួងសុំសេចក្តីសុខ ថ្វាយព្រះមហាក្សត្រ សម្តេចម៉ែ សម្តេចអគ្គមហាទាំងបី និងជាពិសេសជូនដល់សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហម កម្ពុជា ព្រមទាំងដល់ប្រជាពលរដ្ឋក្នុងមូលដ្ឋាន នៅក្នុងឱកាស បុណ្យចូលឆ្នាំថ្មីប្រពៃណីជាតិនេះ។
បន្ទាប់ពីពិធីសូត្រមន្ត ចំរើនព្រះបរិត្ត លោក សុខ សម្បត្តិ ព្រមទាំងមន្ត្រី ទាំងអស់ បានអញ្ជើញប្រគេនទេយ្យវត្ថុនិងបច្ច័យដល់ព្រះសង្ឃចំនួន៥៣អង្គ ទៅតាមគន្លងប្រពៃណីព្រះពុទ្ធសាសនានិងមានរបាំគ្រុឌ ដើម្បីរាំជូនពរ ដល់លោកអភិបាលគ្រប់រូប មន្ដ្រីនៅក្រោមឱវាទនិងកន្លែងធ្វើការទាំងអស់ ទទួលបានជោគជ័យក្នុងការងារបន្ដទៀត។
ចែករំលែកព័តមាននេះ