រាជធានីភ្នំពេញ ៖ មន្ត្រីជាន់ខ្ពស់ព្រះបរមរាជវាំង លោក អ៊ុំ ដារា៉វុធ បានបញ្ចេញប្រតិកម្មតាមសេចក្តីថ្លែងការណ៍ដែលចុះហត្ថលេខាផ្ទាល់ កាលពីថ្ងៃទី៧ មេសា ជាលាយលក្ខណ៍អក្សរទាក់ទិននឹងលិខិតរបស់លោក សម រង្សុី ប្រធានគណបក្សសង្គ្រោះជាតិ ដែលបានដាក់ថ្វាយព្រះករុណាព្រះបរមនាថ នរោត្តម សីហមនុី កាលពីថ្ងៃទី២ មេសា កន្លងមក ដែលបានធ្វើឱ្យមានប្រតិកម្មស៊ូណាមិមួយកក្រើកឡើង ។
លោក អ៊ុំ ដារា៉វុធ បានសរសេរថា ចំពោះពាក្យពេចន៍ដែលលោក សម រង្សុី ទូលថ្វាយព្រះមហាក្សត្រ ខ្ញុំយល់ឃើញថា ដូចជាមិនមានអ្វីប៉ះពាល់ធ្ងន់ធ្ងរដល់ព្រះមហាក្សត្រ និងព្រះរាជកិត្តិនាមព្រះមហាក្សត្រទេ ប៉ុន្តែលោក អ៊ុំ ដារា៉វុធ មិនយល់ស្របនឹងលោក សម រង្សុី ដែលលើកឡើងថា រដ្ឋសភាសព្វថ្ងៃ ជារដ្ឋសភាឯកបក្ស ដែលមានតែសមាជិក៦៨រូបរបស់គណបក្សប្រជាជនកម្ពុជានោះទេ ។ ដោយមន្ត្រីជាន់ខ្ពស់ព្រះបរមរាជវាំងបានលើកឡើងថា ចំពោះការលើកឡើងរបស់លោក សម រង្សុី ថា «រដ្ឋសភាដែលត្រូវបានបង្កើតឡើង កាលពីថ្ងៃទី២៣ ខែកញ្ញា ឆ្នាំ២០១៣ គឺជាសភាឯកបក្ស «នោះគឺមិនត្រូវទេ» ។ ដោយបេក្ខជនតំណាងរាស្ត្រជាប់ឆ្នោតទាំងអស់ត្រូវបានប្រកាសសុពលភាព១២៣រូប ក្នុងនោះរួមមានទាំងបេក្ខជនជាប់ឆ្នោតតំណាងរាស្ត្ររបស់គណបក្សសង្គ្រោះជាតិដែរ ។
ប៉ុន្តែមានតែបេក្ខជនតំណាងរាស្ត្រជាប់ឆ្នោតរបស់គណបក្សប្រជាជនកម្ពុជាចំនួន៦៨រូបប៉ុណ្ណោះ ដែលបានធ្វើសច្ចាប្រណិតធានក្នុងព្រះបរមរាជវាំង ។
យ៉ាងណាក្តី លោកអ៊ុំ ដារា៉វុធ បានលើកឡើងថា លិខិតរបស់លោក សម រង្សុី ជាលិខិតផ្លូវការមួយក្នុងនាមប្រធានគណបក្សមួយ និងខ្លឹមសារនៃលិខិតនោះមានលក្ខណៈជារបាយការណ៍មួយដែលលោកសម រង្ស៊ី ទូលថ្វាយអំពីសភាពការណ៍បច្ចុប្បន្នរបស់គណបក្សសង្គ្រោះជាតិដែលតំណាងប្រជាពលរដ្ឋយ៉ាងតិច៣លាននាក់។ គួររំឭកថា កាលពីថ្ងៃទី២ មេសា លោកសម រង្ស៊ី បានសរសេរលិខិតទូលថ្វាយព្រះមហាក្សត្រអំពីរដ្ឋសភានីតិកាលទី៥ ដែលបានបង្កើតឡើងកាលពីថ្ងៃទី២៣ កញ្ញា ២០១៣ រហូតដល់ពេលនេះដោយលោកសម រង្ស៊ី អះអាងថា ជារដ្ឋសភាមិនស្របនឹងរដ្ឋធម្មនុញ្ញ ហើយមិនតំណាងឱ្យប្រជាពលរដ្ឋខ្មែរទាំងមូលនោះទេ ។ មូលហេតុមកពីសមាជិកសភា៥៥រូបរបស់គណបក្សសង្គ្រោះជាតិមិនចូលរួមប្រជុំ ព្រោះតវ៉ានឹងលទ្ធផលបោះឆ្នោត ។
លិខិតរបស់លោកសម រង្ស៊ី ត្រូវបានស្ថាប័នរដ្ឋនានាដែលដឹកនាំដោយគណបក្សប្រជាជនកម្ពុជា បានចេញសេចក្តីថ្លែងការណ៍ថ្កោលទោសលោកសម រង្ស៊ី ថា បានប្រមាថព្រះមហាក្សត្រ និងរដ្ឋសភា ។ ទាក់ទិននឹងលិខិតរបស់ប្រធានគណបក្សសង្គ្រោះជាតិនេះ កាលពីថ្ងៃទី៧ មេសា សម្តេចតេជោនាយករដ្ឋមន្ត្រីបានប្រកាសថា ក្រុមអ្នកច្បាប់របស់រដ្ឋាភិបាលកំពុងសិក្សា និងរៀបចំពាក្យបណ្តឹងប្រឆាំងលោកសម រង្ស៊ី ពីបទប្រឆាំងសេចក្តីសម្រេចរបស់ក្រុមប្រឹក្សាធម្មនុញ្ញ។ហើយនៅថ្ងៃដដែលនោះដែរលោក សម រង្សុី ក៏បានព្រមានថានឹងធ្វើបាតុកម្មធំមួយនៅថ្ងៃទី២ ឧសភា ខាងមុខ និងប្រកាសថា ប្រសិនបើលោកពិតជាខុសមែននោះលោកសុខចិត្តទទួលទោស។
យ៉ាងណាក្តីថ្នាក់ដឹកនាំគណបក្សទាំងពីរសុទ្ធតែបានបង្ហើបឱ្យដឹងពីកិច្ចចរចាជាមួយគ្នាជាសម្ងាត់ដែលអាចនឹងមានលទ្ធផលក្នុងពេលឆាប់ៗនេះ ពិសេសសម្ដេចនាយករដ្ឋមន្ត្រីបានបង្ហើបថា ប្រសិនបើមេគណបក្សសង្គ្រោះជាតិចង់ចរចាមែននោះឱ្យទូរស័ព្ទទៅលមើល ។ ចំពោះការលើកឡើងរបស់សម្ដេចនាយករដ្ឋមន្ត្រីត្រូវបានលោក សម រង្សុី ប្រាប់បណ្ដាញផ្សព្វផ្សាយថា លោកមិនទូរស័ព្ទទៅទេ ដោយលើកឡើងបកវិញថាប្រសិនបើសម្ដេចនាយករដ្ឋមន្ត្រីចង់ដោះស្រាយបញ្ហាក្រោយថ្ងៃបោះឆ្នោតមែននោះ ម្ដេចក៏មិនកំណត់ថ្ងៃមួយជួបចរចាគ្នាទៅ ។
ទោះបីជាយ៉ាងណា ក្ដី ការប្រកាន់ជំហររបស់ថ្នាក់ដឹកនាំគណបក្សទាំង២ត្រូវបានក្រុមអ្នកតាមដានសកម្មភាពនយោបាយបញ្ចេញមតិថា ស្ថានការណ៍នយោបាយក្នុងប្រទេសកម្ពុជាកំពុងតែរកចំណុចមួយដែលមានស្ថិរភាព និងដោះស្រាយជាស្ថាពរ ខណៈដែលជាប់គាំងអូសបន្លាយអស់រយៈពេលជាងកន្លះឆ្នាំហើយនេះ ៕
ចែករំលែកព័តមាននេះ