ខេត្តបាត់ដំបង ៖ មន្ត្រីស្រុកបវេល បានរាយការណ៍ថា លំនៅឋានប្រជាពលរដ្ឋជិត១០០ខ្នង ក្នុងឃុំចំនួន២ រួមទាំងអគារក្នុងបន្ទាយយោធាផង បានរងការខូចខាតដោយសារខ្យល់កន្ត្រាក់ កាលពីវេលាម៉ោង៣រសៀល ថ្ងៃទី៧ មេសា ដែលនេះជាការរងគ្រោះលើកទី៤ ដោយសារគ្រោះធម្មជាតិក្នុងរដូវប្រាំង ដែលប៉ះទង្គិចធ្ងន់ធ្ងរជាងគេទៅលើស្រុកមួយនេះ ក្នុងចំណោមស្រុកនានាក្នុងខេត្តបាត់ដំបង ។
ខេត្តបាត់ដំបង ៖ មន្ត្រីស្រុកបវេល បានរាយការណ៍ថា លំនៅឋានប្រជាពលរដ្ឋជិត១០០ខ្នង ក្នុងឃុំចំនួន២ រួមទាំងអគារក្នុងបន្ទាយយោធាផង បានរងការខូចខាតដោយសារខ្យល់កន្ត្រាក់ កាលពីវេលាម៉ោង៣រសៀល ថ្ងៃទី៧ មេសា ដែលនេះជាការរងគ្រោះលើកទី៤ ដោយសារគ្រោះធម្មជាតិក្នុងរដូវប្រាំង ដែលប៉ះទង្គិចធ្ងន់ធ្ងរជាងគេទៅលើស្រុកមួយនេះ ក្នុងចំណោមស្រុកនានាក្នុងខេត្តបាត់ដំបង ។
លោក អឿម ទិត អធិការនគរបាលស្រុកបវេល ឱ្យដឹងថា ភ្លៀងដែលលាយឡំដោយខ្យល់បោកបក់ខ្លាំងផង មានរយៈពេលជិត១ម៉ោង កាលពីរសៀលថ្ងៃទី៧ មេសា បានប៉ះទង្គិចទៅលើឃុំឃ្លាំងមាស និងឃុំក្តុលតាហែន ក្នុងស្រុកបវេល ។ លោកថា ខ្យល់ព្យុះនេះបានបំផ្លាញលំនៅឋានរបស់ប្រជាពលរដ្ឋចំនួន៩៦ខ្នង ក្នុងនោះរលំទាំងស្រុងចំនួន៤៣ខ្នង ។ ក្រៅពីនេះមានរលំរោងដាក់រថក្រោះ របស់យោធាវរសេនាតូចលេខ៦៧ នៅក្នុងភូមិអូរដូនពៅ ឃុំក្តុលតាហែន អស់៤ខ្នង និងរលំអគារសម្រាប់ស្នាក់នៅក្នុងអង្គភាពនេះសង្កត់លើរថយន្តកាមរីមួយគ្រឿងផងដែរ ។ ប៉ុន្តែលោកអធិការនគរបាល បញ្ជាក់ថា គ្រោះធម្មជាតិលើកនេះមិនបង្កគ្រោះថ្នាក់ដល់មនុស្សដូចលើកមុនៗ ដែលកន្លងទៅថ្មីៗនេះទេ ។
កោះសន្តិភាព បានព្យាយាមទាក់ទងតាមទូរស័ព្ទ ដើម្បីស្នើសុំការបំភ្លឺបន្ថែមអំពីផលប៉ះពាល់ដោយសារគ្រោះធម្មជាតិនារដូវប្រាំងនេះពីលោក សឿម ប៊ុនរិទ្ធ នាយករដ្ឋបាលសាលាខេត្តដែរ ប៉ុន្តែលោកបានចុចផ្តាច់ទូរស័ព្ទ និងមិនលើកតែម្តង ដែលបញ្ហានេះបានធ្វើឱ្យមានការរិះគន់ពីមន្ត្រីនានា និងអ្នកសារព័ត៌មានអាជីពមួយចំនួន ។ មន្ត្រីមួយរូបរិះគន់ថា កន្លងមក នាយករដ្ឋបាលសាលាខេត្តរូបនេះ ហាក់ដូចជាមានការរើសអើងជាមួយមន្ត្រីក្នុងស្ថាប័នរដ្ឋមួយចំនួន ដែលធ្វើឱ្យមានការលំបាកក្នុងការស្នើសុំទាក់ទងការងារ ។ រីឯអ្នកសារព័ត៌មានអាជីពមួយចំនួនក្នុងខេត្តបាត់ដំបង ក៏ពិបាកក្នុងការទាក់ទងស្នើសុំព័ត៌មានពីមន្ត្រីរដ្ឋបាលសាលាខេត្តរូបនេះដែរ ។
តាមការកត់សម្គាល់ កុំថាឡើយព័ត៌មានដែលពាក់ព័ន្ធនឹងអំពើពុករលួយ ឬព័ត៌មានដែលធ្វើឱ្យរសើបដល់មន្ត្រីនានា ឬថ្នាក់ដឹកនាំក្នុង ខេត្ត សូម្បីតែព័ត៌មាន ឬរបាយការណ៍ស្តីពីសកម្មភាពការងាររបស់អាជ្ញាធរខេត្ត ឬស្តីពីបញ្ហាគ្រោះថ្នាក់ធម្មជាតិដូចខាងលើនេះជាដើម ក៏លោកនាយករដ្ឋបាលសាលាខេត្តរូបនេះ ព្យាយាមលាក់បាំង ឬរើសអើងមិនចង់ផ្តល់ព័ត៌មានដល់អ្នកសារព័ត៌មានដែរ លើកលែងតែសាលាខេត្តមានរៀបចំប្រជុំបូកសរុបការងារ ឬកម្មវិធីផ្សេងៗ ដែលត្រូវឱ្យមានការផ្សព្វផ្សាយ ទើបមន្ត្រីរូបនេះកោះហៅអ្នកសារព័ត៌មានឱ្យចូលរួមយកព័ត៌មាន បើមិនដូច្នេះទេ អ្នកសារព័ត៌មានមិនអាចទាក់ទងសុំព័ត៌មានពីមន្ត្រីរដ្ឋបាលសាលាខេត្តរូបនេះបានឡើយ ។
កន្លងមក សាលាខេត្តបាត់ដំបង ក៏មានមន្ត្រីអ្នកនាំពាក្យមួយរូបដែរ តែមន្ត្រីអ្នកនាំពាក្យរូបនោះ នៅតែមិនអាចស្នើសុំផ្តល់ព័ត៌មានបានដូចគ្នា ។ ពេលខ្លះ អ្នកនាំពាក្យរូបនោះឆ្លើយថា «មិនដឹង និងរុញឱ្យអ្នកសារព័ត៌មានសួរអ្នកនេះ អ្នកនោះបន្តទៀតដដែល» ដែលជាហេតុធ្វើឱ្យអ្នកសារព័ត៌មានអាជីពជួបការលំបាកក្នុងការស្នើសុំព័ត៌មានពីមន្ត្រីសាលាខេត្ត ។ សាលាខេត្តបាត់ដំបង គួរតែរៀបចំមន្ត្រីអ្នកនាំពាក្យម្នាក់ឱ្យប្រាកដប្រជា ងាយស្រួលក្នុងការទាក់ទងជាមួយអ្នកសារព័ត៌មាន ដើម្បីចៀសវាងការចោទប្រកាន់ថា អ្នកសារព័ត៌មានចុះផ្សាយព័ត៌មានមិនពិត ។ ទោះជាយ៉ាងណា ជុំវិញករណីគ្រោះធម្មជាតិខាងលើនេះ បើតាមការផ្តល់ព័ត៌មានពីលោក អឿម ទិត អធិការនគរបាលស្រុកបវេល ឱ្យដឹងថា ចាប់តាំពីមានភ្លៀងកក់ខែក្នុងរដូវប្រាំងកន្លងមកនេះ ស្រុករបស់លោកបានទទួលរងគ្រោះធម្មជាតិចំនួន៤លើករួចមកហើយ ដែលធ្វើឱ្យខូចខាតផ្ទះប្រជាពលរដ្ឋមិនតិចជាង៤០០ខ្នងទេ ។ លោកបញ្ជាក់ថា ក្រៅពីនេះ ក៏មានពលរដ្ឋម្នាក់ត្រូវរន្ទះបាញ់ស្លាប់ផងដែរ ។
ជាមួយគ្នានេះ ប្រធានសាខាកាកបាទក្រហមកម្ពុជាខេត្ត លោក កង ប៊ន បានបញ្ជាក់ប្រាប់តាមទូរស័ព្ទនៅព្រឹកថ្ងៃទី៨ មេសា ថា មានស្រុកមួយចំនួនទៀតក៏រងផលប៉ះពាល់ដោយសារគ្រោះមហន្តរាយនេះដែរ រាប់ទាំងរន្ទះបាញ់ស្លាប់មនុស្សផង ។ លោកថា មន្ត្រីកាកបាទក្រហមកម្ពុជាខេត្ត រួមជាមួយអាជ្ញាធរស្រុក ខេត្ត បាននាំអំណោយចុះចែកជូនដល់ពលរដ្ឋដែលរងគ្រោះភ្លាមៗជាបន្តបន្ទាប់ ដើម្បីសង្គ្រោះបន្ទាន់ ហើយកាកបាទក្រហមកម្ពុជាខេត្ត បានត្រៀមអំណោយមួយចំនួនដើម្បីចុះចែកជូនពលរដ្ឋរងគ្រោះដោយខ្យល់ព្យុះនេះជាបន្តបន្ទាប់ទៀតដែរនាពេលខាងមុខ ៕
ចែករំលែកព័តមាននេះ