ខេត្តព្រៃវែង ៖ បុរសម្នាក់ដែលប្រជាពលរដ្ឋ និងសមត្ថកិច្ចចាត់ទុកថា ជាកំពូលចោរលួចលុយចំណងដៃនៅតាមរោងការនានាកន្លងមកនោះ ត្រូវបានសមត្ថកិច្ច និងប្រជាពលរដ្ឋព័ទ្ធចាប់បានបន្ទាប់ពីជននោះឡើងទៅលើផ្ទះរើកកាយរកប្រាក់ចំណងដៃ ហើយត្រូវម្ចាស់ផ្ទះភ្ញាក់ទាន់ព្រួតគ្នាវាយធ្លាក់ពីលើផ្ទះ ។
ខេត្តព្រៃវែង ៖ បុរសម្នាក់ដែលប្រជាពលរដ្ឋ និងសមត្ថកិច្ចចាត់ទុកថា ជាកំពូលចោរលួចលុយចំណងដៃនៅតាមរោងការនានាកន្លងមកនោះ ត្រូវបានសមត្ថកិច្ច និងប្រជាពលរដ្ឋព័ទ្ធចាប់បានបន្ទាប់ពីជននោះឡើងទៅលើផ្ទះរើកកាយរកប្រាក់ចំណងដៃ ហើយត្រូវម្ចាស់ផ្ទះភ្ញាក់ទាន់ព្រួតគ្នាវាយធ្លាក់ពីលើផ្ទះ ។
បុរសជាប់ចោទរូបនេះឈ្មោះ ឡាយ ផៃ អាយុ៤១ឆ្នាំ ទីលំនៅ និងមុខរបរមិនពិតប្រាកដ ត្រូវចាប់ខ្លួនបានកាលពីវេលាម៉ោង២រំលងអធ្រាត្រឈានចូលថ្ងៃទី៦ មេសា ត្រង់ចំណុចមុខបុ៉ស្តិ៍ប៉ូលិសរដ្ឋបាលឃុំជ្រៃ ក្នុងស្រុកស្វាយអន្ទរ ។ តាមលោកវរសេនីយ៍ឯក សេង សុភ័ក្ត្រ ស្នងការរងនគរបាលខេត្តបញ្ជាក់ថា ជនឈ្មោះ ឡាយ ផៃ នេះគឺជាចោរដែលល្បីល្បាញខាងដើរលួចប្រាក់ចំណងដៃនៅតាមរោងការច្រើនឆ្នាំមកហើយ និងធ្លាប់ត្រូវសមត្ថកិច្ចចាប់ខ្លួនដាក់ពន្ធនាគារ៣ដងរួចមកហើយដែរ ។
ពេលត្រូវចាប់ខ្លួនបានលើកនេះ ជនឈ្មោះ ឡាយ ផៃ សារភាពថា ខ្លួនបានធ្វើសកម្មភាពដើរលួចលុយចំណងដៃតាមរោងការនានារហូតដល់ទៅ៨ខេត្ត-ក្រុង តែគេចាប់មិនដែលបានទេ ព្រោះខ្លួនមានវិធីសាស្ត្រលួចខ្ពស់ ។ នៅមុនពេលចាប់ខ្លួនបាន ជននេះបានឡើងលើផ្ទះមង្គលការមួយកន្លែងនៅភូមិឆ្កែកូន ឃុំជាខ្លាង ស្រុកស្វាយអន្ទរ បុ៉នប៉ងលួចយកប្រាក់ចំណងដៃ បុ៉ន្តែត្រូវម្ចាស់ភ្ញាក់ទាន់ស្រែកឆោឡោ និងព្រួតគ្នាវាយធ្លាក់ពីលើផ្ទះ ហើយជននេះបានរត់កាត់មុខបុ៉ស្តិ៍រដ្ឋបាលឃុំជ្រៃ ក៏ត្រូវប៉ូលិសនិងប្រជាពលរដ្ឋស្ទាក់ចាប់បានតែម្តង ។
យោងតាមចម្លើយសារភាពត្រួសៗរបស់ជនឈ្មោះ ឡាយ ផៃ សមត្ថកិច្ចបានចុះទៅធ្វើការឆែកឆេរនៅផ្ទះរបស់ជននេះដែលស្ថិតនៅភូមិជ្រៃវាល ឃុំជ្រៃ រកឃើញវត្ថុតាងខ្លះៗមាន សម្បកទូរស័ព្ទទំនើបៗមួយចំនួនដែលកូនស្រីរបស់ឈ្មោះ ឡាយ ផៃ ទើបតែយកទៅច្រកថង់កប់ចោលក្នុងដីខាងក្រោយផ្ទះ និងមួកកងរាជអាវុធហត្ថមួយដែលទទឹកជោក ។ ប្រភពដដែលបន្តទៀតថា រយៈពេលបុ៉ន្មានឆ្នាំមកនេះជនឈ្មោះ ឡាយ ផៃ បានធ្វើសកម្មភាពដើរលួចគ្រប់ទីកន្លែង ហើយទ្រព្យសម្បត្តិដែលលួចបាន គឺយកទៅធ្វើផ្ទះមួយកន្លែងនៅជាប់ផ្លូវជាតិលេខ៨A ស្ថិតក្នុងភូមិជ្រៃវាល ឃុំជ្រៃវាល ស្រុកស្វាយអន្ទរ អស់តម្លៃ៩ម៉ឺនដុល្លារ ទិញផ្ទះនៅភ្នំពេញមួយកន្លែង ធ្វើផ្ទះក្បឿងឱ្យម្តាយ២ខ្នង និងធ្វើឱ្យប្អូន២ខ្នងទៀត ។
បន្ទាប់ពីត្រូវចាប់ខ្លួន កំពូលចោរខាងលើនេះត្រូវបានសមត្ថកិច្ចកសាងសំណុំរឿងបញ្ជូនទៅកាន់ស្នងការដ្ឋាននគរបាលខេត្ត និងបញ្ជូនបន្តទៅសាលាដំបូងចាត់ការតាមនីតិវិធីច្បាប់ ៕
ចែករំលែកព័តមាននេះ