លក្ខណៈរបស់អ្នកបួសបច្ចុប្បន្នមិនមែនសម្រាប់តែព្រះពុទ្ធសាសនាតែម្យ៉ាងនោះទេ គឺព្រះសង្ឃត្រូវប្រតិបត្តិនូវកិច្ចរបស់ខ្លួនឱ្យបានត្រឹមត្រូវទៅតាមធម៌វិន័យ ប្រឹងប្រែងសិក្សាក្បួនច្បាប់តាមមាគ៌ាសាសនាឱ្យបានចេះដឹងច្បាស់លាស់ ហើយ ត្រូវបំពេញមុខងារតាមតួនាទីរបស់អ្នកបួសដោយប្រពៃផង និងត្រូវផ្សព្វផ្សាយព្រះធម៌ អប់រំដល់មហាជនដើម្បីសង្គមជាតិផង ។
ព្រោះថា នៅក្នុងសង្គមជាតិ ព្រះសង្ឃដើរតួយ៉ាងសំខាន់ក្នុងការទល់ទ្រជ្រោងវប្បធម៌ ប្រពៃណី និងអប់រំសីលធម៌ សុជីវធម៌ដល់ស្រទាប់មហាជនចូលចិត្តអំពើល្អ មិនប្រព្រឹត្តអំពើអាក្រក់សព្វបែបយ៉ាង ពោលគឺសង្គមជាតិមិនអាចខ្វះព្រះសង្ឃបានឡើយ ។
អ្នកបួសណាធ្វើខ្លួនឱ្យបរិសុទ្ធ អ្នកបួសនោះឈ្មោះថាញុំាងជីវិតប្រកបដោយប្រយោជន៍ដល់សង្គមជាតិ ដល់ព្រះពុទ្ធសាសនា និងបានជាទីពឹងនៃបរិស័ទគ្រប់ទិសទី ។
តែបើអ្នកបួសប្រព្រឹត្តខ្ជះខ្ជាយពេលវេលា ខ្ជិលច្រអូស រៀនមន្តអាគម ធ្វើពេទ្យ ធ្វើហ្ម ស្រោចទឹក ចងខ្សែ ចារយ័ន្តបោកប្រាស់អ្នកដទៃ ដែលជាអំពើប្រាសចាកធម៌វិន័យនោះ មិនសមជាបព្វជិតឡើយ ។
(ដោយសាន សារិន)
ចែករំលែកព័តមាននេះ