រាជធានីភ្នំពេញ ៖ បុរសម្នាក់របួសធ្ងន់ និងបុរសម្នាក់ទៀតរបួសស្រាល ក្នុងហេតុការណ៏ជនមិនស្គាល់អត្តសញ្ញាណ ០២នាក់ជិះម៉តូគប់ដបសាំងដែលឆេះ ចូលក្នុងវង់ផឹកស៊ីនៅមុខផ្ទះមួយកន្លែង ។ហេតុការណ៏នេះកើតឡើងនៅវេលាម៉ោង ១និង១០នាទីរំលងអធ្រាត្រ ឈានចូលថ្ងៃទី០៤ មេសា ២០១៤ នៅចំណុចមុខផ្ទះ លក់ចាប់ហួយ ដែលមានយីហោ ហេង ហេង តាមបណ្តោយផ្លូវ ២៣០ ស្ថិតនៅក្នុងសង្កាត់បឹងសាឡាង ខណ្ឌទួលគោក ។
ប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុជនរងគ្រោះ ដែលជាម្ចាស់តូបលក់ចាប់ហួយ បានអង្គុយផឹកស៊ី ជាមួយបងប្អូននិង មិត្តភក្ត័ នៅពេលនោះក៏មានក្មេងស្ទាវ ០២ក្រុមដេញវ៉ៃគ្នានៅក្បែរកន្លែងផឹកស៊ី របស់គាត់ហើយក៏បែកគ្នាទៅ ។ស្រាប់តែ២០នាទី ក្រោយមក ក៏មានជនមិនស្គាល់អត្តសញ្ញាណ០២នាក់ ជិះម៉ូតូ សង់កូរ៉េ ពណ៌ក្រហម ដោយកាន់មកជាមួយនៅដបសាំង រួចដុតឱ្យឆេះ ហើយគប់ចូលក្នុងវង់ផឹកស៊ីរបស់ជនរងគ្រោះ ដែលកំពុងអង្គុយជុំគ្នា បណ្តាលឱ្យដបសាំងនោះធ្លាក់ចំជនរងគ្រោះនិងខ្ទាតចំអ្នកនៅអង្គុយក្បែរជនរងគ្រោះផងដែរ ។
ប្រភពព័ត៌មានបានបន្តថា ក្រោយគប់ដបសាំងដែលឆេះចូលទៅវង់ផឹកស៊ី របស់ជនរងគ្រោះហើយ ជនសង្ស័យដែលមិនស្គាល់អត្តសញ្ញាណ បានស្រែកដាក់ក្រុមជនរងគ្រោះថា (មកពីពួកឯងវ៉ៃប្អូនអញ) រួចពួកគេក៏ជិះម៉ូតូគេចខ្លួនបាត់ទៅ ។ជនរងគ្រោះសំណាងណាស់ ដោយបានប្រជាពលរដ្ឋជួយ ជះទឹកកុំឱ្យឆេះខ្លួនប្រាណខ្លាំង ចំណែកឯអ្នកអង្គុយក្បែរជនរងគ្រោះម្នាក់របួសស្រាល និងម៉ូតូមួយគ្រឿងឆេះខូចអស់ពាក់កណ្តាលដោយសារដបសាំងដែលឆេះខ្ទាតត្រូវ ។ ករណីខាងលើត្រូវបានគេសន្និដ្ឋានថា ជារឿងយល់ច្រលំ ។
ក្រោយពេលកើតហេតុ ជនរងគ្រោះត្រូវបានគេបញ្ជូនទៅព្យាបាលនៅមន្ទីរពេទ្យ ហើយនៅកន្លែងកើតហេតុសមត្ថកិច្ចកំពុងសួរនាំពីហេតុការណ៏ផងដែរ ។
ចែករំលែកព័តមាននេះ