ខេត្តសៀមរាប ៖ សេចក្តីរាយការណ៍បឋមបានឲ្យដឹងថា អាសូរណាស់បុរសម្នាក់ដែលត្រូវភ្លើងឆេះពេញខ្លួនប្រាណ ហើយដើរលើកដៃសំពះសុំឲ្យគេជួយជូនទៅពេទ្យនោះ ខណៈពេលនេះបានស្លាប់បាត់ហើយ នៅមន្ទីរពេទ្យខេត្តសុរិន្ទនៃប្រទេសថៃ កាលពីវេលាម៉ោង៤និង២៥នាទីរសៀល ថ្ងៃទី២៣ ខែកញ្ញានេះ ។
បើតាមលោក ស៊ិន ចាន់ថុល អភិបាលរងស្រុកពួកបានអះអាងប្រាប់ភ្នាក់ងារកោះសន្តិភាពតាមទូរស័ព្ទ នៅវេលាម៉ោង៩និង៤០នាទី ថ្ងៃទី២៤ ខែកញ្ញាថា បុរសម្នាក់ឈ្មោះ មឿន កុយ អាយុ៤៦ឆ្នាំ ជាអ្នកបើបររថយន្តដឹកហ្គាសមានស្រុកកំណើតនៅស្រុកពួក ខេត្តសៀមរាប ដែលត្រូវភ្លើងផ្ទុះហ្គាសឆេះរាលដាលរលាកពេញខ្លួននោះ ត្រូវបានស្លាប់ហើយនៅខេត្តសុរិន្ទ នៃប្រទេសថៃ និងត្រូវបានក្រុមគ្រួសារបញ្ជូនយកសាកសពមកធ្វើបុណ្យនៅស្រុកខ្មែរដែលជាស្រុកកំណើតរបស់ខ្លួន នៅវេលាម៉ោងប្រមាណជិត៤រសៀល ថ្ងៃទី២៤ ខែកញ្ញា ឆ្នាំ២០១៩នេះវិញ ។
លោកបានបញ្ជាក់ទៀតថា នៅរសៀលដែលសាកសពដឹកយកមកដល់ផ្ទះវិញ យើងនិងឃើញមានវត្តមានថ្នាក់ដឹកនាំ និងមន្ត្រីរាជការជុំវិញស្រុកជួយជ្រោមជ្រែងបុណ្យក្នុងកម្មវិធីនោះផងដែរ ។
គួររំលឹកថា កាលពីវេលាម៉ោង១និង១៥នាទីរសៀល ថ្ងៃទី១៤ ខែសីហា ឆ្នាំ២០១៩ នេះ មានករណីអគ្គិភ័យមួយបានកើតឡើងដោយសារផ្ទុះធុងហ្គាសហើយឆេះ នៅហាងបញ្ចូលហ្គាសរថយន្ត២៤ម៉ោងមួយកន្លែង ជារបស់ម្ចាស់ឈ្មោះ ឈុក ឈុនលី អាយុ៤៨ ឆ្នាំ មុខរបរលក់ហ្គាស មានទីលំនៅបច្ចុប្បន្ន នៅភូមិគោកស្រុក ឃុំពួក ស្រុកពួក ខេត្តសៀមរាប ស្ថិតនៅតាមបណ្តោយផ្លូវលោកតាណឺយ ទល់មុខអតីតមន្ទីរពេទ្យនាគទេព ក្នុងភូមិបន្ទាយចាស់ សង្កាត់ស្លក្រាម ក្រុងសៀមរាប បណ្តាលឱ្យមនុស្ស ប្រុសស្រីចំនួន១៤នាក់ មានស្រីចំនួន០៤នាក់ បានរងរបួស ធ្ងន់ ស្រាល ។
បើតាមប្រភពពីសមត្ថកិច្ចនគរបាលខេត្តសៀមរាបបានឱ្យដឹងថា ដោយមានការយកចិត្តទុកដាក់ និងសម្របសម្រួលពី លោក ទៀ សីហា អភិបាលខេត្តសៀមរាបដែលជាជំហានដំបូង ក្រោយពីកើតហេតុ ជនរងគ្រោះទាំងអស់ត្រូវបានបញ្ជូនទៅព្យាបាលជំងឺទាំងនៅមន្ទីរពេទ្យរដ្ឋ និង ពេទ្យឯកជន រួចបានបញ្ជូនបន្តទៅព្យាបាលនៅប្រទេសថៃផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ