រាជធានីភ្នំពេញ ៖ កញ្ញាវី ឌីណែត កូនស្រីអ្នកចម្រៀងជើងចាស់លោកហួរ ឡាវី ធ្លាប់អះអាងថា នាងសប្បាយចិត្តដែលផលិតកម្មហង្សមាសទាក់ទងបញ្ចូលនាងឱ្យក្លាយជាសមាជិកថ្មី នៅពេលឃើញទេពកោសល្យរបស់នាង ។ ទោះជាយា៉ងណាក្តី យូរខែកន្លងមកហើយនៅតែមិនទាន់ឃើញបទចម្រៀងណាមួយរបស់កញ្ញាវី ឌីណែត នៅក្នុងអាល់ប៊ុមថ្មីរបស់ហង្សមាសឡើយ ។ ហេតុអ្វីបានជាបែបនេះ?
រាជធានីភ្នំពេញ ៖ កញ្ញាវី ឌីណែត កូនស្រីអ្នកចម្រៀងជើងចាស់លោកហួរ ឡាវី ធ្លាប់អះអាងថា នាងសប្បាយចិត្តដែលផលិតកម្មហង្សមាសទាក់ទងបញ្ចូលនាងឱ្យក្លាយជាសមាជិកថ្មី នៅពេលឃើញទេពកោសល្យរបស់នាង ។ ទោះជាយា៉ងណាក្តី យូរខែកន្លងមកហើយនៅតែមិនទាន់ឃើញបទចម្រៀងណាមួយរបស់កញ្ញាវី ឌីណែត នៅក្នុងអាល់ប៊ុមថ្មីរបស់ហង្សមាសឡើយ ។ ហេតុអ្វីបានជាបែបនេះ?
ក្នុងជំនួបនៅពេលចូលរួមសម្តែងក្នុងកម្មវិធីសិល្បៈអបអរបុណ្យចូលឆ្នាំរបស់សមាគមទូរទស្សន៍កាលពីពេល ថ្មីៗកន្លងមក តារាចម្រៀងទើបតែរះថ្មី កញ្ញាវី ឌីណែត និយាយថា អ្វីដែលនាងប្រកាសថាជិតបានក្លាយជាសមាជិកថ្មីនៅផលិតកម្មហង្សមាសជាផលិតកម្មល្បីឈ្មោះក្នុងស្រុកគឺជាការបញ្ចេញវាចាពិតប្រាកដមិនបានលើកយកមកប្រឌិតឡើយ ។ បើទោះជាយូរមកហើយនាងអត់ទាន់មានបទចម្រៀងនៅហង្សមាស តែនាងមិនភូតកុហកយកភាពទាក់ទាញឡើយ ។ ផលិតកម្មហង្សមាសឱ្យនាងនៅរង់ចាំបន្តិច ព្រោះចាំមើលទីផ្សារសិន ។ ហង្សមាសនៅតែទាក់ទងសួរនាំនាងជាហូរហែ ហើយប្រាប់ថាយកនាងជាសមាជិក គឺយកមែនមិនបោះបង់ចោល ឬនិយាយលេងទេ ។
វី ឌីណែត ដែលចាប់ផ្តើមអណ្តែតឡើងក្នុងពិភពសិល្បៈ ព្រោះតែច្រៀងបទជាភាសាអង់គ្លេសបានយា៉ងពីរោះនោះ មិនអន់ចិត្តរឿងផលិតកម្មហង្សមាសយឺតយា៉វបញ្ចូលនាងជាសមាជិកជាផ្លូវការឡើយ ។
នាងដឹងថា តារារៀមច្បងខ្លះក៏ធ្លាប់រង់ចាំពេលវេលាដូចនាងដែរ ។ នាងយល់ពីអ្វីដែលផលិតកម្មរៀបចំ ព្រោះផលិតកម្មដ៏ធំមួយនេះល្អិតល្អន់ណាស់រឿងធ្វើអ្វីមួយ ដើម្បីឱ្យសម្រេចជារូបរាង ហើយទទួលបានលទ្ធផលល្អ។ ម្យ៉ាងទៀតនាងមិនតក់ក្រហល់ក្នុងការចូលខ្លួនក្នុងផលិតកម្មល្បីឈ្មោះនោះទេ ព្រោះឱកាសប្រឡូកសិល្បៈរបស់នាងទើបតែបានមួយរយៈខ្លីប៉ុណ្ណោះ និងទើបតែពេញវ័យ ដូច្នេះនៅមានពេលវេលាវែងឆ្ងាយទៀត ។ ឆ្លៀតឱកាសនេះនាងដុសខាត់សំឡេងឱ្យកាន់តែប្រសើរឡើងទាន់នៅក្មេង ដោយពឹងលោកហួរ ឡាវី និងរៀមច្បងជាច្រើនទៀតជួយកែលម្អ ។
ថ្វីបើមិនទាន់បានចូលផលិតកម្មហង្សមាស តែកញ្ញាវី ឌីណែត ឧស្សាហ៍បានឱកាសឡើងសម្តែងនៅទូរទស្សន៍ហង្សមាសដូចជាកម្មវិធី «វិមានសុបិន» «តន្ត្រីលើទឹក» «តន្ត្រីតំបន់យុវវ័យ» និង«តន្ត្រីពិសេស»ជាដើម ។ ក្រៅពីទូរទស្សន៍ហង្សមាស ឌីណែត សម្តែងនៅទូរទស្សន៍បាយ័នជាញឹកញាប់ ក្នុងកម្មវិធី«តន្ត្រីយុវវ័យ» «វិស្សមកាលតន្ត្រី» និង«តន្ត្រីខារ៉ាបាវ» ។ កញ្ញាវី ឌីណែត ជាស្លឹកឈើជ្រុះមិនឆ្ងាយពីគល់ ជាពន្លកថ្មីគួរជាទីសង្ឃឹមរបស់អ្នកចម្រៀងជើងចាស់ហួរ ឡាវី ៕
ចែករំលែកព័តមាននេះ