បច្ចុប្បន្នមានមនុស្សច្រើនណាស់ទទួលរងនូវការធ្លាក់ទឹកចិត្ដដែលបញ្ហានេះមិនមែនជារឿងតូចតាចនោះទេ ព្រោះរហូតមានអ្នកខ្លះធ្វើបាបខ្លួនឯងដោយប្រការផ្សេងៗ ឯខ្លះទៀតដោះស្រាយបញ្ហាខ្លួនឯងមិនចេញក៏សម្រេចចិត្ដជ្រើសរើសយកវិធីបញ្ចប់ជីវិតដោយរូបភាពផ្សេងៗមាន លោតទឹក ចង.ក ឬលេបថ្នាំជាដើម…។
លោកសាស្រ្ដាចារ្យវេជ្ជបណ្ឌិត យឹម សុបុត្រា ឯកទេសវិកលវិទ្យា និងជានាយកមន្ទីរសម្រាកព្យាបាលផ្លូវចិត្ដសាន់រ៉ាយបានប្រាប់កោះសន្ដិភាពឱ្យដឹងថា មនុស្សគ្រប់រូបតែងមានអារម្មណ៍ស្រងូតស្រងាត់ ឬធ្លាក់ទឹកចិត្ដនៅពេលណាមួយក្នុងដំណើរជីវិតរស់នៅប្រចាំថ្ងៃរបស់ពួកគេ ប៉ុន្ដែសភាពបែបនេះនឹងសាបសូន្យទៅវិញតែប៉ុន្មានថ្ងៃក្រោយមក ព្រោះវាគ្រាន់តែជាប្រតិកម្មធម្មតា ។ ផ្ទុយទៅវិញ ធ្លាក់ទឹកចិត្ដជាជំងឺធ្ងន់ធ្ងរទាំងផ្នែកវេជ្ជសាស្រ្ដ និងចិត្ដសាស្រ្ដ ។ វាមានរយៈពេលយូរធ្វើឱ្យប៉ះពាល់ដល់អារម្មណ៍ និងជីវិតរស់នៅប្រចាំថ្ងៃរបស់លោកអ្នក ។ ជំងឺនេះបានស្ដែងចេញនូវរោគសញ្ញាមួយចំនួនដែលគួរឱ្យចាប់អារម្មណ៍ដូចជា ៖
១-អាការៈរាងកាយ
-អស់កម្លាំងល្ហិតល្ហៃគ្រប់ពេល
-វិបត្ដិដំណេក, ហូបអាហារពុំបាន, ស្រកទម្ងន់
-ឈឺក្បាល, ឈឺចុកចាប់តាមសាច់ដុំស្ទើរពេញខ្លួន
-រដូវមកមិនទៀតទាត់
២-អាការៈផ្លូវចិត្ដ
-អារម្មណ៍ស្រងូតស្រងាត់ ឬធ្លាក់ទឹកចិត្ដ
-បាត់ការចាប់អារម្មណ៍ស្ទើរគ្រប់សកម្មភាពក្នុងជីវិតរស់នៅ
-គ្មានទំនុកចិត្ដលើខ្លួនឯង ពិបាកក្នុងការសម្រេចចិត្ដ
-ស្ដីបន្ទោសខ្លួនឯង មានគំនិតមិនចង់រស់ឬធ្លាប់ធ្វើសកម្មភាពសម្លាប់ខ្លួនម្ដង ឬច្រើនដងរួចមកហើយ
៣-អវិជ្ជមាននៃការគិត
-អ្វីៗជាកំហុសរបស់ខ្លួនទាំងអស់
-គ្មានអ្វីល្អសម្រាប់ខ្លួនទេនៅលើលោកនេះ
-ជីវិតរស់នៅគ្មានន័យ
-មិនចង់រស់នៅ គឺចង់តែស្លាប់
៤-អាកប្បកិរិយា
-គ្មានចំណង់ចង់ចេញក្រៅ ឬធ្វើការងារ
-ដកខ្លួនចេញពីក្រុមគ្រួសារ មិត្ដភក្ដិ និងសង្គម
-ឈានទៅផឹកស្រា សេពគ្រឿងញៀន និងការប្រើប្រាស់ថ្នាំងងុយគេងដោយគ្មានវេជ្ជ បញ្ជា ។
ជំងឺធ្លាក់ទឹកចិត្ដ គេសង្កេតឃើញកើតមានចំពោះស្រ្ដីច្រើនជាងបុរស អាចមានទាំងកុមារ វ័យជំទង់ មនុស្សពេញវ័យ និងមនុស្សចាស់ ។ ជំងឺធ្លាក់ទឹកចិត្ដមាន៣កម្រិត ស្រាល មធ្យម និងធ្ងន់ធ្ងរ ។ មូលហេតុដែលនាំឱ្យកើតមានជំងឺនេះបណ្តាលមកពី ៖
-បញ្ហាគ្រួសារ និងសង្គម
-ការខកចិត្ដ សោកស្ដាយ ការបាត់បង់មនុស្សជាទីស្រលាញ់
-បណ្ដាលមកពីជំងឺផ្លូវកាយមួយចំនួន
-មកពីឱសថព្យាបាលមួយចំនួន
-ការសេពសុរា ឬគ្រឿងញៀនជាដើម ។
ចំពោះការព្យាបាលជំងឺធ្លាក់ទឹកចិត្ដមាន ៖
-ព្យាបាលដោយប្រើឱសថប្រឆាំងនឹងជំងឺធ្លាក់ទឹកចិត្ដ
-ព្យាបាលតាមបែបពុទ្ធិ (អប់រំណែនាំតាមចិត្តសាស្ត្រ)
-ការគាំទ្រផ្លូវចិត្ដ ផ្ដល់ប្រឹក្សា
-ធ្វើលំហាត់ប្រាណ និងសម្រាកកាយ
-ចាត់ចែងរបបអាហារឱ្យមានតុល្យភាព ។
លោកសាស្រ្ដាចារ្យវេជ្ជបណ្ឌិតបានបញ្ជាក់ថា ដើម្បីការពារកុំឱ្យកើតជំងឺធ្លាក់ទឹកចិត្ដ លោកអ្នកត្រូវតែអនុវត្ដតាមវិធីសាស្ត្រមួយចំនួនដូច
ជា ៖
• ប្រើប្រាស់បំណិនជីវិតមកដោះស្រាយ បញ្ហា
-បញ្ឈប់ការសេពគ្រឿងញៀន គ្រឿងស្រវឹង
-អនុវត្ដតាមវេជ្ជបញ្ជាដោយត្រូវទទួលទានថ្នាំឱ្យបានទៀងទាត់
-ផ្ដល់ព័ត៌មានដល់គ្រូពេទ្យជាបន្ទាន់ក្នុងករណីថ្នាំមានផលវិបាក
-អ្នកជំងឺនិងក្រុមគ្រួសារគប្បីសហការជាមួយគ្រូពេទ្យអប់រំពីជំងឺធ្លាក់ទឹកចិត្ដ៕
ចែករំលែកព័តមាននេះ