ខេត្តប៉ៃលិន ៖ ទីបំផុត ភាពរំលោភបំពានលើពលរដ្ឋតូចតាចបានក្តៅដល់ទេវតាពិតមែន ។ នោះគឺលោកតាដែលត្រូវចាប់ដាក់ពន្ធនាគារមុននេះ ត្រូវបានដោះលែងវិញហើយបន្ទាប់ពីមានការចុះផ្សាយដោយ «កោះសន្តិភាព» ជុំវិញការចាប់ខ្លួនលោកតាជរាដ៏ក្រីក្រម្នាក់ ។
នៅរសៀលថ្ងៃទី១៨ កញ្ញា លោកជំទាវ បាន ស្រីមុំ តំណាងរាស្ត្រមណ្ឌលខេត្តប៉ៃលិន រួមដំណើរដោយលោកអភិបាលខេត្ត ប្រធានតុលាការ ព្រះរាជអាជ្ញាអមសាលាដំបូងខេត្ត បាននាំយកថវិកាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ចំនួន២០លានរៀល ផ្តល់ជូនលោកយាយ ហាង ចាន់ អាយុ៧៣ឆ្នាំ និងលោកតា មឿង សែម អាយុ៧៦ឆ្នាំ រស់នៅភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន ដែលមុននេះលោកតាបានរងការចោទប្រកាន់ថា ទិញឈើខុសច្បាប់ ហើយត្រូវនគរបាលស្រុកសាលាក្រៅដែលមិនសូវមានការងារធ្វើសង្ស័យឃាត់ខ្លួនបញ្ជូនទៅតុលាការនិងបានឃុំខ្លួនភ្លាមៗដាក់ពន្ធនាគារយ៉ាងអយុត្តិធម៌ពេកក្រៃ ។
ថ្លែងក្នុងពេលជួបសំណោះសំណាលនិងនាំថវិការបស់សម្តេចតេជោ និងសម្តេចកិត្តិព្រឹទ្ធបណ្ឌិតជូនដល់ដៃលោកតាដែលត្រូវបានដោះលែងវិញ និងលោកយាយដែលស្រែកយំមុននេះ លោកជំទាវ បាន ស្រីមុំ តំណាងរាស្ត្រមណ្ឌលខេត្តប៉ៃលិន បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជាជូនលោកតាលោកយាយដោយសម្តេចតែងតែគិតគូរពីសុខទុក្ខប្រជាពលរដ្ឋគ្រប់រូប គ្រប់កាលៈទេសៈ ដោយមិនទុកឲ្យប្រជាពលរដ្ឋណាម្នាក់ មិនបានទទួលការជួយសង្គ្រោះពីរាជរដ្ឋាភិបាល និងពីអាជ្ញាធរឡើយ ។
ជាមួយគ្នានេះ លោកជំទាវក៏បានផ្តាំផ្ញើដល់គ្រួសារចាស់ជរានេះ សូមកុំទិញឈើ ដែលមិនមានច្បាប់អនុ ញ្ញាត ព្រោះអាចជាប់ពាក់ព័ន្ធនឹងបទល្មើសផ្សេងៗ ហើយសូមឲ្យលោកយាយ លោកតាយកថវិការបស់សម្តេចដែលផ្តល់ជូនទៅសាងសង់ផ្ទះរស់នៅសមរម្យ និងទិញគ្រែដែលជាបំណងប្រាថ្នារបស់លោកយាយ លោកតាជាយូរមកហើយផងដែរ ។
គួរកត់សម្គាល់ថា កាលពីថ្ងៃទី១៥ កញ្ញា កម្លាំងជំនាញនៃអធិការដ្ឋាននគរបាលស្រុកសាលាក្រៅ បានបង្ក្រាបករណីអារ.ឈើដោយខុសច្បាប់១ករណីនៅចំណុចភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន ដោយឃាត់ខ្លួនជនសង្ស័យចំនួន២នាក់ រួមនឹងវត្ថុតាងមួយចំនួន ដែលក្នុងនោះក៏មានលោកតា មឿន សែន អាយុ៧៦ឆ្នាំ មុខរបរជាកសិករម្នាក់ផងដែរ ។
តែបើតាមលោកយាយឈ្មោះ ហាង ចាន់ ត្រូវជាប្រពន្ធ បាននិយាយរៀបរាប់ទាំងទឹកភ្នែកហូររហាមថា៖ នៅព្រឹកថ្ងៃកើតហេតុ មានប៉ូលិស១ក្រុម បានចុះទៅដល់ផ្ទះរបស់គាត់ ហើយចោទប្រកាន់ថា ពួកគាត់អារ.ឈើស្តុកទុកខុសច្បាប់ តែគាត់ប្រាប់ថា ពួកគាត់មិនធ្លាប់រកស៊ីអារ.ឈើលក់អ្វីនោះទេ ដោយធ្វើតែចម្ការ ដាំម្ទេស ដាំត្រប់ បេះលក់រាល់ថ្ងៃ និងដាំស្រូវបន្តិចបន្តួចដើម្បីលក់ផ្គត់ផ្គង់ជីវិតប្រចាំថ្ងៃប៉ុណ្ណោះ ។
ចំណែកឈើបេងប្រហោងក្នុងឬឈើស្អុយក្រងេងក្រងង់នេះគាត់បានទិញពីម្ចាស់ចម្ការនៅក្នុងភូមិជា
មួយគ្នាយកមកដើម្បីធ្វើគ្រែ ដេក ។ ប៉ុន្តែនគរបាលទាំងនោះមិនស្តាប់ការរៀបរាប់របស់គាត់ឡើយ ព្រម ទាំងយកប្តីគាត់មកកាន់អធិការដ្ឋាននគរបាលស្រុកសាលាក្រៅ និងធ្វើសំណុំរឿងបញ្ជូនទៅតុលាការទៀត ហើយមិនដឹងថាសំណុំរឿងនោះគេធ្វើដោយបែបណាបែរជាតុលាការចេញដីកាឃុំលោកតាជាប្តីដែលមានអាយុ៧៦ឆ្នាំក្នុងពន្ធនាគារ ។
ប៉ុន្តែជាភ័ព្វសំណាងរហូតមកដល់ថ្ងៃទី១៨ កញ្ញា លោកតា ត្រូវបានតុលាការអនុញ្ញាតឲ្យត្រឡប់មកផ្ទះវិញហើយ ។ ចំណែកវត្ថុតាងឈើប្រភេទបេង ដែលនគរបាលរិបអួសក៏ត្រូវបានប្រគល់ជូនលោកតាវិញដែរ បន្ទាប់ពីព័ត៌មាននេះត្រូវបានចុះផ្សាយដោយគេហទំព័រ និងសារព័ត៌មាន«កោះសន្តិភាព» នោះគឺការសណ្តោសប្រណីពីសំណាក់សម្តេចតេជោ និងសម្តេចកិត្តិព្រឹទ្ធបណ្ឌិតជា«ទេវតា»បានធ្វើអន្តរាគមន៍ជួយជូតទឹកភ្នែកឱ្យលោកយាយបានជួបលោកតាវិញ ។
នេះជាក្តីករុណាមួយគួរឱ្យគោរពបំផុតសម្រាប់ពលរដ្ឋតូចតាចដែលគ្មានអ្វីជាទីពឹងតែងតែអំពាវនាវហៅរកការជួយសង្គ្រោះ ។ ពេលនេះ«គ្រោះ»ដែលលោកតាលោកយាយជួបនោះបានក្លាយជា«លាភ»ដែលស្មានមិនដល់ ។
សូមថ្លែងអំណរគុណដល់លោក អុី ឈាន និងលោកជំទាវ បាន ស្រីមុំ លោក ផាន់ ចាន់ថុល អភិបាលខេត្ត និងមន្ត្រីតុលាការដែលមានវត្តមានរួមគ្នាមកជួបលោកតា លោកយាយ ដែលរស់នៅដូចលលកញីឈ្មោលក្នុងផ្ទះតៀមដ៏រខេករខាកក្នុងវ័យជរានេះ ៕ (សម្រួលដោយ៖ ស្រីណា)
ចែករំលែកព័តមាននេះ