រាជធានីភ្នំពេញ ៖ បន្ទាប់ពីធ្វើការចរចាគ្នាយ៉ាងស្វិតស្វាញអស់រយៈពេលជាច្រើនលើកមក លទ្ធផលប្រាក់ឈ្នួលអប្បរមាកម្មករនិយោជិតសម្រាប់ឆ្នាំ២០២០ គឺ១៩០ដុល្លារអាមេរិកបូកទាំងការបន្ថែម៣ដុល្លាររបស់សម្តេចតេជោ ហ៊ុន សែន នាយករដ្ឋមន្ត្រី ។
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាជាតិប្រាក់ឈ្នួលអប្បរមាបានឲ្យដឹងក្រោយកិច្ចប្រជុំនាព្រឹកថ្ងៃទី២០ ខែកញ្ញានេះ នៅទីស្តីការថា មុននឹងឈានដល់ការបោះឆ្នោតសម្រេចភាគីទាំងអស់បានជជែកគ្នាយ៉ាងស្វិតស្វាញ និងមានភាពចាស់ទុំក្នុងការជជែកគ្នា ។ ចុងក្រោយក្រុមប្រឹក្សាជាតិបានសម្រេចបោះឆ្នោតកំណត់យកតួលេខរួមចុងក្រោយមួយ គឺ១៨៧ដុល្លារ បន្ថែមចំនួនតួលេខនេះសម្តេចតេជោ ហ៊ុន សែន បានបន្ថែម៣ដុល្លារពីលើចំនួនដែលសរុប១៩០ដុល្លារ ។
លោកបញ្ជាក់ថា ៖ «អីញ្ចឹងប្រាក់ឈ្នួលអប្បរមកម្មករនិយោជិតផ្នែកវាយនភណ្ឌ កាត់ដេរ សម្លៀកបំពាក់ និងស្បែកជើងឆ្នាំ២០២០ គឺ១៩០ដុល្លារអាមេរិក រួមទាំងអត្ថប្រយោជន៍ដែលបងប្អូនកម្មករមានស្រាប់ដូចជា សាហ៊ុយ ស្នាក់នៅប្រាក់ធ្វើដំណើរ និងប្រាក់អតីតភាពដែលបូកសរុបទៅ គឺលើសពី២០០ដុល្លារឡើងទៅ ។ អីញ្ចឹង គឺជាកាដូមួយដែលបងប្អូនកម្មករទទួលបានមុនថ្ងៃភ្ជុំបិណ្ឌ» ។ ជាមួយគ្នានោះដែរ លោករដ្ឋមន្ត្រីក៏បានឲ្យដឹងថា ក្រៅពីប្រាក់ឈ្នួលកម្មករឆ្នាំ២០២០ រាជដ្ឋាភិបាលបានរៀបចំអស់ហើយ សម្រាប់បងប្អូនកម្មករ ដូចជា ការធ្វើដំណើរពីភ្នំពេញ ដោយរថយន្តជាង១០០គ្រឿង និងមធ្យោបាយផ្សេងទៀតដូចជា រថយន្តភ្លើងផងដែរ ។
ចំណែកលោក ប៉ាវ ស៊ីណា ប្រធានសហជីពចលនាកម្មករកម្ពុជាបានឲ្យដឹងថា ការចរចាប្រាក់ឈ្នួលអប្បរមាកម្មករនិយោជិតឆ្នាំ២០២០ទោះបីជាមិនទាន់ដល់តួលេខមួយដែលភាគីសហជីពដាក់ ប៉ុន្តែវាជាតូលេខមួយដែលភាគីសហជីពខិតខំប្រឹងប្រែងក្នុងរយៈពេលកន្លងមកនេះ ។ លោកបញ្ជាក់ថា ៖«អ្វីដែលសំខាន់នោះ គឺកម្រិតប៉ុណ្ណឹង តែយើងក៏បានធ្វើការស្នើសុំនូវលក្ខខណ្ឌមួយចំនួន១៣ចំណុចផ្សេងទៀត ដែលមានចំណុចសំខាន់ដូចជា ៖ ការស្នើសុំអាហារថ្ងៃត្រង់ ការផ្តល់មធ្យោបាយដឹកជញ្ជូនប្រកបដោយសុវត្ថិភាព និងការស្នើសុំឲ្យពិនិត្យលើវិសាលភាពចំពោះក្រុមការងារផ្ទៃក្នុងក្រុមការងារពិភាក្សាប្រាក់ឈ្នួល ក្រៅពីវិស័យកាត់ដេរ និងស្បែកជើង និងស្នើសុំឲ្យពិនិត្យការចុះបញ្ជីការលើការចុះបញ្ជីការរោងក្រ ដោយសារបច្ចុប្បបន្នមានភាពរាំងស្ទះ និងស្នើពិនិត្យមើលការឡើងថ្លៃផ្ទះជួលជាដើម ។
យ៉ាងណាក្តី សម្រាប់តួលេខនេះលោកមេសហជីពរូបនេះបានអះអាងមិនទាន់មានតម្រូវការសម្រាប់ការចង់បានរបស់កម្មករនោះទេ ប៉ុន្តែសម្រាប់ប្រទេសកម្ពុជាស្ថិតនៅក្នុងភាពមិនច្បាស់លាស់នូវការអនុគ្រោះពន្ធ ។ អីញ្ចឹងខ្ញុំមើលឃើញថា វាក៏ជាភាព អវិជ្ជមានមួយនៅពេលយើងកំពុងប្រឈម និងការអនុគ្រោះពន្ធ ។ លោក ប៉ាវ ស៊ីណាបានអះអាងចំណុចអវិជ្ជមានជាងគេសម្រាប់កម្មករនោះ គឺការធ្វើដំណើរដែលកម្មករកំពុងជួបការប្រឈមបញ្ហាខុសភាពនៅកន្លែងធ្វើការជាដើម ។
សូមជម្រាប់ថា តួលេខដែលដាក់ក្នុងការបោះឆ្នោតកំណត់យកតួលេខមួយមាន ៖ តួលេខសហជីព១៩៥ដុល្លារបានគាំទ្រដោយសម្លេង៨សំឡេង លើ៥១សំឡេង។ តួលេខរបស់តំណាងរាជរដ្ឋាភិបាលចំនួន១៨៧ដុល្លារបានគាំទ្រដោយសំឡេង៤៣លើ៥១សំឡេង និងតួលេខភាគីនិយោជកចំនួន១៨៦ដុល្លាបានគាំទ្រសូន្យសំឡេងលើ៥១សំឡេង ។ ឈរលើកលទ្ធផលនៃការបោះឆ្នោតក្រុមប្រឹក្សាជាតិប្រាក់ឈ្នួលអប្បរមាកម្មករនិយោជិតផ្នែកវានភណ្ឌ កាត់ដេរ និងផលិតស្បែកជើងសម្រាប់ឆ្នាំ២០២០ នឹងអនុវត្តចាប់ពីថ្ងៃទី១ ខែមករា ឆ្នាំ២០២០តទៅ ៕ កែសម្រួលដោយ ៖ សុឃាក់
ចែករំលែកព័តមាននេះ