ខេត្តកំពង់ឆ្នាំង ៖ បន្ទាប់ពីបានដឹងអំពីការខ្វះខាតចង្ហាន់ ជាពិសសនៅក្នុងរដូវបុណ្យភ្ជុំ បិណ្ឌរបស់ព្រះសង្ឃវត្តគិរីធម្មរាជភ្លាម នៅថ្ងៃទី១៨ ខែកញ្ញា ឆ្នាំ២០១៩ លោកជំទាវខៀវ ស៊ីណា ជា ចាន់តូ អនុប្រធានកិត្តិយសសាខាកាកបាទក្រហមកម្ពុជាខេត្តកំពង់ធំ និងសហការីបាននាំយកគ្រឿងឧបភោគ បរិភោគ សម្ភារៈបរិក្ខារ និងបច្ច័យទៅកាន់វត្តគិរីធម្មរាជ ដើម្បីជួយសម្រាលការលំបាកខ្វះខាតរបស់ព្រះសង្ឃនៅទីអារាមនេះ ប្រកបដោយសុទ្ធាជ្រះថ្លាបំផុត។
សូមរំលឹកឲ្យដឹងថា ៖ វត្តគិរីធម្មរាជ ជាទីអារាមស្ថិតនៅជើងភ្នំនៅភូមិស្រាងខ្ពស់ ឃុំពង្រ ស្រុករលាប្អៀរ ខេត្កំពង់ឆ្នាំង។
យោងតាព័ត៌មានរបស់សង្គម Facebook បានបញ្ជាក់ថា ៖ វត្តគិរីធម្មរាជឆ្នាំនេះក៏ដូចឆ្នាំកន្លងមកដែរ តែងតែជួបការខ្វះខាតចង្ហាន់ ដោយសារមិនសូវសម្បូរមានពុទ្ធបរិស័ទចំណុះជើងវត្ត ក៏ដូចជាពុទ្ធបរិស័ទជិតឆ្ងាយផងដែរ និងគ្មានវេណកាន់បិណ្ឌនោះដែរ។ ប៉ុន្តែក្រោយឃើញព័ត៌មាននេះមក នៅទី១៨ ខែកញ្ញានេះ គេសង្កេតឃើញមានពុទ្ធបរិស័ទមកច្រើនខុសពីធម្មតាដែលមិននឹកស្មានដល់ទាល់តែសោះ ដែលញ៉ាំងឲ្យព្រះអង្គ ហឿន សុវណ្ណរ៉ា ចៅអធិការវត្តវត្តគិរីធម្មរាជ មានទឹកព្រះទ័យរំភើបរីករាយឥតឧបមា ដោយឃើញទឹកចិត្តជ្រះថ្លារបស់ពុទ្ធបរិស័ទជិតឆ្ងាយបានអញ្ជើញមកចូលរួមគាំពារឧបត្ថម្ភតាមកម្លាំងសុទ្ធាធ្វើឲ្យព្រះសង្ឃទាំង៣៥អង្គ មានចង្ហាន់ឆាន់ និងលែងកន្ដោចកន្ដែងដូចពេកមុនៗទៀតហើយ។
លោកជំទាវខៀវ ស៊ីណា ជា ចាន់តូ បានមានប្រសាសន៍ថា ៖ ដើម្បីរក្សាការពារ និងទ្រទ្រង់ព្រះពុទ្ធសាសនាឲ្យបានគង់វង្ស និងកាន់តែទទួលបានការចូលរួមពីប្រជាពុទ្ធបរិស័ទព្រះសង្ឃគ្រប់អង្គត្រូវគោរពប្រតិបត្តិធម៌ន័យឲ្យបានខ្ជាប់ខ្ជួន និងត្រូវមានការប្រាស្រ័យទាក់ទងឲ្យបានល្អជាមួយប្រជាជនជាពុទ្ធបរិស័ទចំណុះជើងវត្ត ក៏ដូចពុទ្ធបរិស័ទជិតឆ្ងាយ។
លោកជំទាវនូវបានទូលប្រគេនផងដែរថា ៖ ក្រៅពីសិក្សារៀនសូត្រធម៌នោះ ព្រះសង្ឃត្រូវចូលរួមជាមួយប្រជាជនលើការងារសង្គម ដើម្បីបង្កើនភាពជិតស្និត ព្រោះព្រះសង្ឃក៏ត្រូវការប្រជាពុទ្ធបរិស័ទ ហើយប្រជាពុទ្ធបរិស័ទក៏ត្រូវការព្រះសសង្ឃដែរ មិនអាចខ្វះមួយណាបានឡើយ ។
ដើម្បីចូលរួមទ្រង់ទ្រងដល់ព្រះសង្ឃក្នុងអំឡុងរដូវវស្សា និងរដូវបុណ្យភ្ជុំ បិណ្ឌនេះនៅក្នុងឱកាសនោះ លោកជំទាវខៀវ ស៊ីណា ជា ចាន់តូ បានប្រគេនដល់វត្តវត្តគិរីធម្មរាជ មានបច្ច័យចំនួន៣ លានរៀល និង ទ័យវត្ថុ មានអង្ករ ១០បាវ ស្ករ២បាវ ទឹកសុទ្ធ១០កេស ទឹកក្រូច១០កេស ទឹកផ្លែឈើ១០កេស ទឹកដោះ១កេសគោ មី១០កេស ត្រីខ១ កេស ទឹកត្រី៥យួ ទឹកស៊ីអ៊ីវ៥យួរ បីចេង៣កញ្ចប់ អំបិល២០គីឡូក្រាម និងចង្ហាន់។ ដោយឡែកសម្រាប់វត្តសង្ឃមិត្តតារាម ហៅវត្តថ្លក់ត្របែក បានប្រគេន បច្ច័យកសាង១លាន បច្ច័យកាន់បិណ្ឌចំនួន៩៥ម៉ឺន៥ពាន់រៀលនងទ័យវត្ថុចំនួន១២មុខព្រមទាំងចង្ហាន់ផងដែរ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ