រាជធានីភ្នំពេញ ៖ ជារៀងរាល់ឆ្នាំឲ្យតែរដូវបុណ្យកាន់បិណ្ឌ រាជរដ្ឋាភិបាលកម្ពុជាតែងតែប្រារព្ធពិធីបង្សុកូលរាប់បាតព្រះសង្ឃ ដើម្បីឧទ្ទិសកុសលផលបុណ្យជូនដល់វិញ្ញាណក្ខន្ធអ្នកដែលនៅក្នុងរបបប្រល័យពូជសាសន៍ខ្មែរក្រហមនៅសារមន្ទីរទូលស្លែង ។
លោកស្រីកិត្ដិយសសង្គហបណ្ឌិតម៉ែន សំអន ឧបនាយរដ្ឋមន្ដ្រី រដ្ឋមន្ដ្រីទំនាក់ទំនងជាមួយរដ្ឋសភាព្រឹទ្ធសភា និងអធិការកិច្ចតំណាងដ៏ខ្ពង់ខ្ពស់របស់សម្តេចតេជោហ៊ុន សែន នាយករដ្ឋ មន្ត្រីនៃរាជរដ្ឋាភិបាលកម្ពុជាបានចូលរួមប្រារព្ធពិធីបុណ្យសូត្រមន្តកាន់បិណ្ឌ បង្សុកូលឧទ្ទិស កុសល្យផលបុណ្យដល់ព្រលឹងអ្នកស្លាប់រាប់ម៉ឺននាក់ នៅមជ្ឍមណ្ឌលប្រល័យពូជសាសន៍ទួលស្លែង កាលពីថ្ងៃទី១៧ កញ្ញា ឆ្នាំ២០១៩ ។ លុះនៅព្រឹកឡើងលោកស្រី ម៉ែន សំអន ព្រមទាំងមន្ត្រីរាជការនៃក្រសួងទំនាក់ទំនងជាមួយព្រឹទ្ធសភារដ្ឋសភា និងអធិការរកិច្ចបានប្រារព្ធពិធីរាប់បាត្រប្រគេនចង្ហាន់ និងទេយ្យទាន ភេសជ្ជៈ ព្រមទាំងសម្ភារៈចំនួនទៀតដល់ព្រះសង្ឃ ។
សូមជម្រាបថា តាមការកត់សម្គាល់ដូចអ្វីដែលបានធ្វើជារៀងរាល់ឆ្នាំអស់រយៈពេលជាង១២ឆ្នាំមក ហើយរាជរដ្ឋាភិបាលដែលដឹកនាំដោយសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃរាជរដ្ឋាភិបាលកម្ពុជាបានប្រារព្ធឡើងតាមសំណូមពរ និងការស្នើសុំរបស់ ប្រជាពលរដ្ឋទៅតាមគន្លងព្រះពុទ្ធសាសនា ដើម្បីឧទ្ទិសផល្លាមហាកុសលដែលកើតឡើងពី ការប្រគេនចង្ហាន់បិណ្ឌបាតដល់ព្រះសង្ឃឧទ្ទិសកុសលដល់អ្នកដែលបានរងគ្រោះស្លាប់ទាំង វេទនា នៅក្នុងការធ្វើទារុណកម្មយ៉ាងព្រៃផ្សៃក្នុងគុកទួលស្លែង កាលពីអំឡុងឆ្នាំ១៩៧៥ ដល់១៩៧៩ ។
តាមការស្រាវជ្រាវមនុស្សមិនតិចជាង៧ម៉ឺននាក់ទេ ដែលត្រូវយកមកធ្វើទារុណកម្ម និងសម្លាប់ក្នុងគុកទួលស្លែងនេះ ក្រោមការគ្រប់គ្រងរបស់កាំង ហ្គិចអ៊ីវហៅ ឌុចដែលបច្ចុប្បន្នត្រូវបានតុលាការសម្រេចកាត់ទោសជាប់គុកអស់មួយជីវិត ។ លោកស្រីឧបនាយករដ្ឋមន្ត្រីម៉ែន សំអនបានលើកឡើងថា ការធ្វើបុណ្យ កាន់បិណ្ឌនេះ ដើម្បីឧទ្ទិសដល់ដួងវិញ្ញាណក្ខន្ធរបស់ឥស្សរជនវីរជន យុទ្ធជន ដែលបានលះបង់ជីវិត ដើម្បីបុព្វហេតុរំដោះជាតិ និងប្រជាជនពីរបបអនានិគមចាស់ ថ្មី និងពីរបបប្រល័យពូជសាសន៍ ប៉ុលពតហើយជាពិសេសជាងនេះទៅទៀត គឺ ប្រជាជនស្លូតត្រង់ ដែលទទួលទុក្ខ ទារុណកម្ម យ៉ាងព្រៃផ្សៃ និងស្លាប់យ៉ាងអយុត្តិធម៌នៅក្នុង របបកម្ពុជាប្រជាធិបតេយ្យ ដោយសូមឲ្យដួងវិញ្ញាណក្ខន្ធ អ្នកទាំងអស់ឲ្យបានទៅកាន់សុគតិភពកុំបីឃ្លៀងឃ្លាតឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ