រាជធានីភ្នំពេញ ៖ តារាសម្តែងនាង សូដា នីតា បានជួបហេតុការណ៍ដ៏រន្ធត់មួយដោយសារមានរថយន្តដឹកទំនិញមួយគ្រឿង បានបើកមកកៀររថយន្តរបស់នាងដែលបានឈប់ចតស្ងៀម បណ្តាលឲ្យរថយន្តរបស់នាងខូចខាតយ៉ាងដំណំ ។ ហេតុការណ៍នេះបានធ្វើឲ្យនាងភ័យព្រលឹងចុងសក់…
រាជធានីភ្នំពេញ ៖ តារាសម្តែងនាង សូដា នីតា បានជួបហេតុការណ៍ដ៏រន្ធត់មួយដោយសារមានរថយន្តដឹកទំនិញមួយគ្រឿង បានបើកមកកៀររថយន្តរបស់នាងដែលបានឈប់ចតស្ងៀម បណ្តាលឲ្យរថយន្តរបស់នាងខូចខាតយ៉ាងដំណំ ។
ហេតុការណ៍នេះបានធ្វើឲ្យនាងភ័យព្រលឹងចុងសក់ ដោយសារតែនាងរៀបនឹងបើកទ្វារឡានចុះ ស្រាប់តែរថយន្តបង្កបានបើកមកកៀរចំហៀងដែលនាងអង្គុយ ខណៈពេលដែលនាងអះអាងថា ប្រសិនបើមិនមានការប្រុងប្រយ័ត្នទេនោះ នាងអាចនឹងមានគ្រោះថ្នាក់ដល់អាយុជីវិត ។
ហេតុការណ៍ខាងលើនេះបានកើតនៅឡើងនៅវេលាម៉ោងប្រមាណ១១យប់ ថ្ងៃទី១៦ ខែកញ្ញា ឆ្នាំ២០១៩ នៅចំណុចស្ថានីយប្រេងឥន្ធនៈ PTT មួយកន្លែង ។ បើយោងតាមវីដេអូឃ្លីបដែលបានបង្ហោះតាមហ្វេសប៊ុកតារាសម្តែងនាង សូដា នីតា បានឲ្យដឹងថា មុនពេលកើតហេតុ នាងបានចតរថយន្តនៅចំណុចស្ថានីយចាក់សាំងខាងលើ ដោយចតនៅគន្លងខាងស្ដាំដៃ និងលើចិញ្ចើមផ្លូវ ។
ក្រោយមកស្រាប់តែមានរថយន្តដឹកទំនិញមួយគ្រឿងបើកបរដោយបុរសម្នាក់ និងអ្នករួមដំណើរម្នាក់ បានបើកវ៉ា និងបានមកកៀររថយន្តរបស់នាងដែលចតស្ងៀមនោះ បណ្ដាលឲ្យខូចខាតតែម្ដង ។
នាងបញ្ជាក់ថា ក្រោយពីកើតហេតុនេះ ម្ចាស់រថយន្តបង្កទាំងពីរមិនបានចុះរត់គេចខ្លួននោះឡើយ ដោយបានចេញមកដោះស្រាយជាមួយនាង ។ ជាដំណោះស្រាយម្ចាស់រថយន្តទាំងពីរនាក់បានសងនាងក្នុងតម្លៃប្រមាណ ២០០ដុល្លារ ដោយម្នាក់ឲ្យចិញ្ជៀនមួយវង់ និងម្ចាស់ទៀតឲ្យទូរស័ព្ទ IPHONE 5 មួយគ្រឿង ជាថ្នូរទៅនឹងការសងនៃការខូចខាតរថយន្តរបស់នាងនាពេលនេះ ។
យ៉ាងណាក៏ដោយ បើតាមនាង សូដា នីតា សំណងខាងលើនេះ នាងមិនទទួលយកឡើយ បើទោះបីជាតម្លៃនៃការខូចខាតរថយន្តម៉ាក Land Cruiser ស៊េរីខ្ពស់ដែលមានតម្លៃជាង ១០ម៉ឺនដុល្លារ ត្រូវការជួសជុលអស់រាប់ពាន់ដុល្លារក៏ដោយ ។ សូដា នីតា បន្ថែមទៀតថា នាងសម្រេចមិនទទួលយកសំណងពីអ្នកបើកបររថយន្តបង្កទាំងពីរនាក់នេះឡើយ ដោយសារតែនាងមានការអាណិតអាសូរ ព្រោះឃើញជួលឡានគេមកបើកប៉ុណ្ណោះ ខណៈពេលដែលនាងមិនអាចលើកដៃយកសំណងចំនួន ២០០ដុល្លារលើភាពលំបាករបស់អ្នកបើកបររថយន្តទាំងពីរនាក់ខាងលើនេះឡើយ ។
ទោះជាយ៉ាងណា បើទោះជាមិនទទួលយកនូវសំណងនេះក៏ដោយ សូដា នីតា បានធ្វើការណែនាំឲ្យអ្នកបើករថយន្តបង្កនោះឲ្យមានការប្រុងប្រយ័ត្នបានខ្ពស់ជាងនេះ នៅពេលបញ្ជាយានយន្ត ដើម្បីចៀសវាងការបង្កហេតុលើកក្រោយទៀត ៕ (កែសម្រួលដោយ ៖ បុប្ផា)
ចែករំលែកព័តមាននេះ