មេរៀនដែលឪពុកម្តាយតែងតែបង្រៀនដល់កូនៗតាំងពីនៅតូចៗមក គឺការនិយាយពាក្យ «អរគុណ» ហើយមនុស្សតែងតែព្យាយាមរក្សាទម្លាប់នេះ រហូតដល់ធំពេញវ័យមិនថា ក្នុងជីវភាពរស់នៅប្រចាំថ្ងៃ ឬការទំនាក់ទំនងតាមអ៊ីមែល និងប្រព័ន្ធអេឡិចត្រូនិកដទៃឡើយ ។ មូលហេតុ គឺការធ្វើដូច្នេះមិនត្រឹមតែបង្ហាញថា អ្នកជាមនុស្សចេះគួរសម និងមានភាពថ្លៃថ្នូរទេ តែវាក៏ជាគុណសម្បត្តិល្អមួយសម្រាប់សហគ្រិន និងអ្នកធ្វើការដទៃដែរដែលត្រូវបានបកស្រាយដូចខាងក្រោមនេះ ៖
១. វាល្អសម្រាប់ខួរក្បាលរបស់អ្នក ៖ ការនិយាយថា «អរគុណ» អាចជួយធ្វើឲ្យអ្នកមានអារម្មណ៍ល្អ ហើយការស្រាវជ្រាវមួយចំនួនបានបង្ហាញថា ទម្លាប់និយាយអរគុណអាចជួយដល់សុខភាពផ្លូវចិត្តរបស់មនុស្សថែមទៀត ។
ក្នុងនាមជាអ្នកដឹកនាំ អ្នកអាចនិយាយអរគុណបានដោយច្រើនវិធី ។ ជាដំបូងអ្នកត្រូវយល់ថា អ្នកមិនអាចសម្រេចបានអ្វីដែលអ្នកមាននៅសព្វថ្ងៃនេះបានឡើយប្រសិនបើអ្នកនៅម្នាក់ឯង ។ ដូច្នេះពេលដែលភ្ញៀវ និងអតិថិជនរបស់អ្នកពេញចិត្តនឹងផលិតផល ឬសេវាកម្មដែលអ្នកផ្តល់ជូន អ្នកត្រូវតែធានាថាក្រុមការងាររបស់អ្នកបានដឹងដែរ ។ ការធ្វើដូច្នេះក៏អាចបង្កើតបរិស្ថានធ្វើការល្អមួយដែលបង្ហាញថាអ្នក និងក្រុមការងាររបស់អ្នកប្រឈមមុខនឹងបញ្ហារួមគ្នា និងដោះស្រាយបញ្ហារួមគ្នាដែរ ។
២. អតិថិជនក៏សប្បាយចិត្តពេលដែលបុគ្គលិកសប្បាយចិត្ត ៖ មនុស្សចូលចិត្តពេលដែលពួកគេមានអារម្មណ៍ថាត្រូវបានឲ្យតម្លៃនៅកន្លែងធ្វើការ ។ វាប្រៀបបានជាការលើកទឹកចិត្ត និងកត្តាជំរុញក្នុងការបំពេញការងារដោយមានប្រសិទ្ធិភាពផងដែរ ។ វាក៏កសាងជំនឿចិត្តនិងជំរុញឲ្យមានភាពសកម្មក្នុងកន្លែងធ្វើការ ។ ដូច្នេះអ្នកដឹកនាំគួរតែបង្ហាញថាអ្នកមើលឃើញនិងទទួលស្គាល់ការខិតខំរបស់បុគ្គលិកតាមវិធីផ្សេងៗដូចជារង្វាន់លើកទឹកចិត្តជាដើម ឬការជប់លៀងបន្ទាប់ពីសម្រេចបានគោលដៅណាមួយជាដើម ។
៣. អតិថិជនក៏គួរទទួលបានការអរគុណដែរ៖ ការសិក្សាមួយរបស់ Jornal of Retailing and Consumer Services បានប្រទះឃើញថា អាជីវកម្មដែលបង្ហាញពីអំណរគុណសម្រាប់ការគាំទ្ររបស់អតិថិជនមានឱកាសច្រើនក្នុងការទទួលបានភាពស្មោះត្រង់ពីអតិថិជន ។
ដូច្នេះអាជីវកម្មគួរតែមានភាពសកម្មក្នុងការបង្កើតជាកម្មវិធីផ្សេងៗសម្រាប់អតិថិជនដែលតែងតែគាំទ្រផលិតផលឬសេវារបស់អ្នក ឬផ្តោតស្មារតីបន្ថែមលើការទំនាក់ទំនង និងផ្តល់សេវាបានដិតដល់ពេលដែលពួកគេមករកអ្នក ៕ កែសម្រួលដោយ ៖ សុឃាក់
ចែករំលែកព័តមាននេះ