រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា អាជីវករដូចគ្នាបានទាស់ពាក្យសំដីគ្នា រហូតឈានទៅដល់ឈ្លោះប្រកែកគ្នាផ្អើលពេញក្នុងផ្សាររាត្រី ហើយត្រូវបានសមត្ថកិច្ចជួយសម្របសម្រួលកុំឱ្យប្រើអំពើហិង្សាកើតឡើងបង្កឱ្យមានការភ្ញាក់ផ្អើលកាលពីម៉ោង12និង10នាទីរំលងអធ្រាត្រឈានចូលថ្ងៃទី17 ខែកញ្ញា ឆ្នាំ2019 តាមបណ្តោយផ្លូវព្រះស៊ីសុវត្ថិ នៅចំណុចផ្សាររាត្រី ស្ថិតក្នុងសង្កាត់វត្តភ្នំ ខណ្ឌដូនពេញ ។
បើសាក្សីឃើញហេតុការណ៍បានឱ្យដឹងថា មុនពេលកើតហេ គេបានឃើញភាគីម្ខាងដែលជាអាជីវករលក់ខោអាវនៅក្នុងផ្សាររាត្រី មានគ្នា៣នាក់ប្តីប្រពន្ធ និងកូនតូចម្នាក់ បានឈ្លោះប្រកែកគ្នាជាមួយភាគីម្ខាងទៀតដែលលក់ដូរចប់ រួចនាំគ្នាអង្គុយផឹកស៊ីមានគ្នា4ទៅ5នាក់។
ប្រភពដដែលបន្តថា ភាគីជម្លោះទាំងពីរខាងលើនេះ គឺសុទ្ធតែជាអាជីវករដូចគ្នាបានឌឺដងគ្នាទៅវិញទៅមក ទើបឈានទៅដល់ឈ្លោះប្រកែកគ្នាយ៉ាងតឹងសរសៃ.ក ហើយអ្នកលក់ខោអាវបានយករូបម៉ារ៉ាកាំងគប់ទៅលើអ្នកអង្គុយផឹកស្រា ចំណែកភាគីដែលអង្គុយផឹកស៊ីនោះបានយកកៅអីគប់ទៅវិញទៅមក បង្កឱ្យមានការភ្ញាក់ផ្អើលពេញក្នុងផ្សាររាត្រីតែម្តង ក្រោយមកត្រូវបានសន្តិសុខនិងសមត្ថកិច្ចខណ្ឌដូនពេញ ចុះមកអន្តរាគមន៍ឃាត់ភាគីទាំងសងខាង កុំឱ្យមានការឈ្លោះគ្នា និងកើតជាហិង្សាជាបន្តទៀត ។
បើតាមប្រភពពីស្ត្រីអ្នកលក់ខោអាវបានឲ្យដឹងថា ក្រុមអ្នកផឹកស៊ី និងគាត់ធ្លាប់មានទំនាស់ជាមួយគាត់ ហើយបានប្តឹងប្តល់គ្នាម្តងរួចមកហើយ លុះមុនពេលកើតហេតុនេះ ក្រុមអ្នកផឹកស៊ីនេះបានអង្គុយផឹកស៊ី ហើយបានជះទឹកមកលើគាត់មុន ទើបបង្កឲ្យមានការឈ្លោះប្រកែកគ្នាបែបនេះតែម្តង ។
ក្រោយពេលកើតហេតុខាងលើនេះ សមត្ថកិច្ចក៏បានឱ្យភាគីទាំងសងខាងបំបែកគ្នាទៅផ្ទះរៀងៗខ្លួន ដើម្បីបញ្ចប់រឿងនៅនឹងកន្លែងកើតហេតុផងដែរ។ (កែសម្រួលដោយ ៖ បុប្ផា)
ចែករំលែកព័តមាននេះ