រាជធានីភ្នំពេញ ៖ តារាភាពយន្តជើងចាស់ដែលនៅតែទទួលបានការគាំទ្រពីមហាជនគ្រប់ស្រទាប់វណ្ណៈ និងត្រូវគេចាត់ទុកថា ជាតារាដែលរះចែងចាំងមិនរីងស្ងួតគ្រប់រដូវ លោកទេព រិន្ទដារ៉ូ នៅតែបង្ហាញវត្តមានជាអ្នកសិល្បៈដដែល មិនទាន់បោះបង់ទៅណាដូចមិត្តរួមជំនាន់របស់លោកឡើយ។ ដោយសារតែនៅមានអ្នកគាំទ្រច្រើនទាំងក្នុង និងក្រៅសិល្បៈលោកទេព រិន្ទដារ៉ូ បានយល់ព្រមលើកយកជីវិតផ្ទាល់ខ្លួន កាលពីឈានជើងចូលសិល្បៈដំបូងជូនមហាជន បើទោះជារឿងរ៉ាវរបស់លោកធ្លាប់លាតត្រដាងកន្លងមកខ្លះៗទៅហើយមែន។
កំពូលតារាសម្តែងផ្នែកបុរសដែលឈានដល់វ័យជ្រេបន្តិចមែន តែនៅតែទទួលការងារសម្តែងគ្រប់ជ្រកលោកទេព រិន្ទដារ៉ូ នៅតែមិនដាច់ចិត្តដើរចេញពីទីលានសិល្បៈដែលធ្លាប់សម្តែងមានគ្រប់រសជាតិចោលកេរ្តិ៍ឈ្មោះឡើយ ។ លោកនៅតែទទួលការងារសម្តែងតាមការចង់បានរបស់អ្នកដឹកនាំរឿង និងម្ចាស់ក្រុមហ៊ុនផលិតផលនានា ទោះជាសម្តែងជាតួអង្គបែបណា ក៏លោកមិនដែលប្រកាន់ខ្លួន ហើយតាំងចិត្តបំពេញការងារឲ្យគេទាំងអស់ នេះហើយដែលលោកទេព រិន្ទដារ៉ូ ត្រូវបានអ្នកសិល្បៈស្រករក្រោយចាត់ទុកថា ជារៀមច្បងគំរូគួរឲ្យគោរព។
កាលពីពេលថ្មីៗនេះ លោកទេព រិន្ទដារ៉ូ បានលើកយកដំណើរជីវិតសិល្បៈ កាលពីអតីតកាលបញ្ជាក់ជូនមហាជនដែលនៅតែស្រឡាញ់គាំទ្រកិច្ចការដែលលោកបំពេញក្នុងនាមជាអ្នកសម្តែងជាថ្មីម្តងទៀតថា កាលពីដំបូងលោកមានទឹកចិត្តស្រឡាញ់សិល្បៈយូរមកហើយ ឲ្យតែកុនខ្មែរយើងបញ្ចាំងតាមរោងកុន គឺលោកទៅមើលជាប្រចាំ។ លោកចាំបានថា កាលសម័យក្រោយឆ្នាំ៧៩ លោកធ្លាប់ទៅមើលកុនរឿង «ចិត្តចងចាំ» ដែលសម្តែងដោយលោកចៅ ចាន់ណារី អ្នកស្រីចាន់ តារាទី គឺលោកពេញចិត្ត និងស្រឡាញ់ការសម្តែងណាស់ ហើយគិតថា បើក្លាយជាអ្នកសម្តែងមិនដឹងជាសប្បាយចិត្តយ៉ាងណានោះទេ។សម័យកាលដំបូងដូចបងប្អូនជ្រាបហើយលោកជាអ្នកធ្វើការផ្នែកយន្តហោះដែលរៀនចប់ពីប្រទេសសូវៀតមិនទាន់ចូលសិល្បៈទេ។ លោកបានចូលសិល្បៈមិនបានប្រឡងស្នាដៃអីនោះទេ ជាសំណាងរបស់លោក គឺមានទម្រង់មុខត្រូវអ្នកដឹកនាំរឿងកត់សម្គាល់ ហើយពិសេសគឺសក់របស់លោកប្លែកពីតួប្រុសដទៃ ហើយលោកប្រឡូកសិល្បៈក្រោយលោកខៃ ប្រសិទ្ធ ចាន់តារាទី មួយឆ្នាំ ឬ២ឆ្នាំ
តាមលោកចាំមានថ្ងៃមួយលោកជិះកង់ចេញពីកន្លែងធ្វើការនៅព្រលានយន្តហោះមានអ្នកដឹកនាំរឿងម្នាក់គេជិះឡានតាមលោកពីក្រោយចុចស៊ីភ្លេរហូត ហើយមកសួរនាំលោកពីរឿងថតកុន តែលោកថា លោកថតមិនកើតទេ ព្រោះតែកន្លែងធ្វើការរបស់លោកមានច្បាប់តឹងតែង បើចង់ឲ្យលោកសម្តែងទាល់តែសុំច្បាប់ត្រឹមត្រូវមានលិខិតស្នាមឲ្យដល់ថ្នាក់លើមានស៊ីញ៉េត្រឹមត្រូវនោះ លោកនឹងថតមិនខានឡើយ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ