រាជធានីភ្នំពេញ ៖ លោកនាយករដ្ឋមន្ត្រីឡាវបានអះអាងថា ចាប់ពីពេលនេះទៅដល់ឆ្នាំ ២០៣០ ប្រទេសឡាវលក់ថាមពលអគ្គិសនីឲ្យកម្ពុជាក្នុងទំហំប្រមាណ៦០០០មេហ្គាវ៉ាត់ ។ ការអះអាងរបស់លោកនាយករដ្ឋមន្ត្រីឡាវបែបនេះក្នុងជំនួបពិភាក្សាទ្វេភាគីជាមួយសម្តេច ហេងសំរិន ប្រធានរដ្ឋសភានារសៀល ថ្ងៃទី១២ ខែកញ្ញា នៅវិមានរដ្ឋសភា គឺបន្ទាប់ពីប្រមុខនាយករដ្ឋមន្ត្រីនៃប្រទេសកម្ពុជា និងឡាវបានជួបគ្នា និងឯកភាពធ្វើកិច្ចសហប្រតិបត្តិការទ្វេភាគីមក ។
លោក ថងលូន ស៊ីស៊ូលីត នាយករដ្ឋមន្ត្រីឡាវបានលើកឡើងថា នៅក្នុងជំនួបពិភាក្សាការងារជាមួយសម្តេចតេជោ ហ៊ុន សែន ព្រឹកមិញនេះលោក និងសម្តេចនាយករដ្ឋមន្ត្រីបានពិភាក្សាគ្នាយ៉ាងជិតស្និទ្ធក្នុងការពង្រឹងពង្រីកកិច្ចសហប្រតិបត្តិការទំនាក់ទំនងជាព្រពៃណីរវាងប្រទេសទាំងពីរឲ្យកាន់តែរឹងមាំឡើង ។
ប្រមុខដឹកនាំរដ្ឋាភិបាលឡាវបានលើកឡើងថា កម្ពុជា និងឡាវបានប្តេជ្ញាចិត្តយ៉ាងមុតមាំក្នុង ការពង្រឹងពង្រីកវិស័យពាណិជ្ជកម្មសេដ្ឋកិច្ចថាមពលអគ្គិសនី អប់រំ បរិស្ថាន ទេសចរណ៍ និងវប្បធម៌ជាដើម ។ លោកបានបន្តថា នាយករដ្ឋមន្ត្រីប្រទេសទាំងពីរបានចុះហត្ថលេខាលើសេចក្តីថ្លែងការណ៍រួមក្នុងការលើកកម្ពស់ចំណងមិត្តភាព និងកិច្ចសហប្រតិបត្តិការប្រទេសទាំងពីរ ឲ្យរឹងមាំឡើងក្នុងន័យ «ភាពជាដៃគូគ្រប់ជ្រុងជ្រោយ គង់វង្ស និងយូរអង្វែង» ។
នាយករដ្ឋមន្ត្រីឡាវ បានកោតសរសើរពីការរីកចម្រើនរបស់កម្ពុជាពីមួយថ្ងៃទៅមួយថ្ងៃដែលរីករាយចម្រើនខាងវិស័យឧស្សាហកម្ម និងសំណង់បានធ្វើឲ្យកម្ពុជាទិញថាមពលអគ្គិសនីពីប្រទេសឡាវ ។ លោកបញ្ជាក់ថា ៖«ចាប់ពីពេលនេះទៅដល់ឆ្នាំ២០៣០ប្រទេសឡាវលក់ថាមពលអគ្គិសនីឲ្យកម្ពុជាក្នុងទំហំប្រមាណ៦០០០មេហ្គាវ៉ាត់ ។
ឯកឧត្តមនាយករដ្ឋមន្ត្រី បានជម្រាបជូនសម្តេចថា នាយករដ្ឋមន្ត្រីកម្ពុជា និងឡាវបានប្តេជ្ញាចិត្តរួមគ្នាក្នុងការដោះស្រាយបញ្ហានៅសេសសល់ ពិសេសបញ្ហាព្រំដែន ហើយខិតខំជំរុញទំនាក់ទំនងរវាងប្រជាជន និងប្រជាជនប្រទេសទាំងពីរឲ្យកាន់តែរីកចម្រើនឡើង ។ សម្តេចហេង សំរិន ប្រធានរដ្ឋសភាសម្តែងនូវការគាំទ្រចំពោះលទ្ធផលនៃកិច្ចពិភាក្សាទ្វេភាគីរវាងប្រមុខរដ្ឋាភិបាលនៃប្រទេសទាំងពីរកម្ពុជា និងឡាវ នាព្រឹកថ្ងៃដដែលក្នុងការពង្រឹងពង្រីកបន្ថែមទៀតនូវកិច្ចសហប្រតិបត្តិការ ដើម្បីឧត្តមប្រយោជន៍ទាំងសងខាង ។
សម្តេចបានសម្តែងក្តីរីករាយយ៉ាងក្រៃលែងដោយបានឃើញវឌ្ឍនភាពនៃទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការគ្រប់ជ្រុងជ្រោយរវាងប្រទេសទាំងពីរកម្ពុជា-ឡាវ មានការរីកចម្រើនឥតឈប់ឈរដែលទាំងអស់នេះបាននាំមកនូវផលប្រយោជន៍ដ៏ឧត្តុង្គឧត្តមរវាងប្រជាជាតិប្រទេសទាំងពីរ ។ សម្តេចប្រធានបានកោតសរសើរ និងគាំទ្រចំពោះកិច្ចខិតខំប្រឹងប្រែងរបស់រដ្ឋាភិបាលនៃប្រទេសទាំងពីរកម្ពុជា-ឡាវ ក្នុងការបោះបង្គោលព្រំដែនកំណត់ ខ័ណ្ឌសីមាសម្រេចបានលទ្ធផល៨៦% ។
សម្តេចបញ្ជាក់ថា ៖«ខ្ញុំសូមលើកទឹកចិត្តរដ្ឋាភិបាលទាំងពីរបន្តពិភាក្សាដោះស្រាយបញ្ហា ដែលនៅសេសសល់ក្នុងស្មារតីមិត្តភាពស្មោះត្រង់ ជឿទុកចិត្តគ្នាទៅវិញទៅមក ដើម្បីប្រែក្លាយជាព្រំដែន សន្តិភាព មិត្តភាព កិច្ចសហប្រតិបត្តិការ និងការអភិវឌ្ឍទុកសម្រាប់ជាមរតកដល់កូនចៅជំនាន់ក្រោយ» ។ សម្តេច ហេង សំរិន ក៏បានជម្រាបលោកនាយករដ្ឋមន្ត្រីឡាវថា ពីទំនាក់ទំនង និងកិច្ចសហប្រតិបត្តិការដ៏ល្អរវាងរដ្ឋសភាប្រទេសទាំងពីរផងដែរ ។ រដ្ឋសភាកម្ពុជា និងឡាវបានផ្លាស់ប្តូរពិសោធន៍គ្នាជាបន្តបន្ទាប់នៅគ្រប់កម្រិត ។ ជាពិសេសរដ្ឋសភាប្រទេសទាំងពីរបានគាំទ្រគ្នាទៅវិញទៅមកលើលើឆាកអន្តរជាតិ តាមរយៈវេទិកាអន្តរសភានានា ៕ កែសម្រួលដោយ ៖សុឃាក់
ចែករំលែកព័តមាននេះ