មនុស្សភាគច្រើននៅលើពិភពលោកតែងកើតជំងឺខ្សោយក្រពះតែពួកគេបែរជាយល់ថាជា ជំងឺរលាកក្រពះទៅវិញហើយទិញថ្នាំយកមកព្យាបាលដោយមិនមានវេជ្ជបញ្ជាធ្វើឱ្យជំងឺមានស្ថានភាពកាន់តែធ្ងន់ធ្ងរ ។ លោកវេជ្ជបណ្ឌិតអ៊ុង ចក្រាវុធ ប្រធានផ្នែកជំងឺថ្លើម ក្រពះ ពោះវៀន និងឫសដូងបាត នៃមន្ទីរពេទ្យកាល់ម៉ែត បានមានប្រសាសន៍ប្រាប់កោះសន្ដិភាពឱ្យដឹងថា មូលហេតុជាច្រើនដែលនាំឱ្យកើតមានជំងឺនេះដូចជា ៖
១-ស្ត្រេសនិងការងារៈ បច្ចុប្បន្នមនុស្សគ្រប់រូបខំប្រឹងធ្វើការរកប្រាក់ដើម្បីចិញ្ចឹមជីវិតរហូតមានអ្នកខ្លះធ្វើការងារច្រើនម៉ោងមានការហត់នឿយ និងមានភាពតានតឹងអារម្មណ៍បង្កឲ្យកើតជាស្ត្រេសហើយឈានទៅកើតជំងឺខ្សោយក្រពះ ។
២-ខ្សោយក្រពះអាចបណ្តាលមកពីមេរោគអេលីកូបាទែពីលូរី(Helicobacter Pylori ) ។
៣-ទទួលទានអាហារមិនទៀងទាត់ពេលវេលាក៏ជាកត្តានាំឲ្យកើតជំងឺខ្សោយក្រពះ ។
៤-អាចបណ្តាលមកពីការជក់បារី ឬទទួលទានស្រា ។
៥-ការប្រើប្រាស់ថ្នាំពេទ្យមួយចំនួនក៏អាចធ្វើឲ្យក្រពះខ្សោយ ។
រោគសញ្ញានៃជំងឺខ្សោយក្រពះមាន ៖
– ចុកពោះនៅបរិវេណចុងដង្ហើម
-ពេលទទួលទានអាហារមានអារម្មណ៍ថាឆាប់ឆ្អែត មិនងាយឃ្លានមានអារម្មណ៍តឹងពោះយូរមិនងាយស្រក ទោះបីជាទទួលទានតិចតួចក៏ដោយ ។
– ជួនកាលមានខ្យល់ច្រើនក្នុងពោះ ។
– មានអារម្មណ៍ចង់ក្អួតចង្អោរ ។
លោកវេជ្ជបណ្ឌិតបានបន្តថា ប្រសិនបើអ្នកជំងឺមិនបានធ្វើរោគវិនិច្ឆ័យនិងព្យាបាលឲ្យបានទាន់ពេលវេលាទេអាចប្រឈមនឹងផលវិបាកមួយចំនួនដូចជា៖
១- ខាតបង់ពេលវេលា ថវិកា ការងាររកប្រាក់កម្រៃ ដោយសារតែជំងឺនេះវាមានការរំខាន់ ។
២-នៅពេលមានរោគសញ្ញាទាំងនេះ ហើយ លោកអ្នកទៅទិញថ្នាំដោយមិនមានវេជ្ជបញ្ជាច្បាស់លាស់នោះវាមិនអាចជាសះស្បើយបានទេ ថែមទាំងធ្វើឲ្យខាតបង់ថវិកាថែមទៀតផង ។
៣-ជំងឺនេះអាចនឹងវិវឌ្ឍទៅរកសភាពធ្ងន់ធ្ងរដូចជាកើតមានបញ្ហារលាកក្រពះរុំារ៉ៃបង្កទៅជាជំងឺមហារីកក្រពះ ប៉ុន្តែបញ្ហានេះមានតិចតួចបំផុត ។
ការធ្វើរោគវិនិច្ឆ័យត្រូវពឹងផ្អែកលើការសួរនាំ និងការពិនិត្យលើអ្នកជំងឺ ។ ភាគច្រើនគ្រូពេទ្យមិនទាមទារឲ្យធ្វើការឆ្លុះក្រពះនោះទេ បើសិនជាអ្នកជំងឺក្រោមអាយុ៤០ឆ្នាំ ជាពិសេសអ្នកជំងឺមិនធ្លាប់មានបងប្អូនកើតមានជំងឺមហារីកក្រពះពីមុនមក ។ ជំងឺនេះគ្រូពេទ្យអាចព្យាបាលបានតែត្រូវទាមទារឱ្យធ្វើរោគវិនិច្ឆ័យឱ្យបានត្រឹមត្រូវ ។ ដើម្បីការពារកុំឲ្យកើតមានជំងឺខ្សោយក្រពះនេះមិនមែនជាការលំបាកទេ បើសិនជាលោកអ្នកបានដឹងអំពីមូលហេតុរបស់វាធ្វើយ៉ាងណាត្រូវចៀសវាងនូវបញ្ហាទាំងនោះដោយគ្រាន់តែលោកអ្នកត្រូវអនុវត្តតាមវិធីខាងក្រោមដូចជា ៖
គួរកំណត់ពេលវេលាមួយធ្វើលំហាត់ប្រាណឲ្យបានទៀងទាត់ដើម្បីឲ្យសុខភាពល្អបន្ធូរភាពតានតឹងក្នុងអារម្មណ៍ ។ គួរចងចាំថាស្ត្រេសមិនត្រឹមតែបណ្តាលឲ្យកើតមានជំងឺខ្សោយក្រពះប៉ុណ្ណោះទេ វាថែមទាំងបង្កឲ្យកើតមានជំងឺជាច្រើនមុខទៀត ។
– មានអនាម័យទាំងការរស់នៅ និងទទួលទានព្រោះមេរោគអេលីកូបាទែពីលូរីអាចឆ្លងតាមរយៈការទទួលទានបន្លែ និងទឹកដែលមិនស្អាត ហើយត្រូវទទួលទានឲ្យបានទៀងទាត់ ។
- ត្រូវចៀសវាងការទទួលទានបារី និងស្រា បើទទួលទានក៏ស្ថិតក្នុងកម្រិតតិចតួចបំផុត ។
– ពេលលោកអ្នកកើតជំងឺអ្វីមួយហើយសម្រេចចិត្តប្រើប្រាស់ថ្នាំត្រូវទៅពិភាក្សាជាមួយគ្រូ ពេទ្យជាមុនចៀសវាងប្រើទៅហើយនាំឲ្យកើតមានជំងឺខ្សោយក្រពះ ។
ត្រូវចងចាំថាជំងឺខ្សោយក្រពះមិនមែនជាប្រភេទជំងឺឆ្លងនោះទេ តែវាអាចឆ្លងតាមរយៈការទទួលទានចំណីអាហារដែលមិនមានអនាម័យ ៕
ចែករំលែកព័តមាននេះ