ការលេងលងបន្លាចឬសម្លុតគំរាមដោយប្រការផ្សេងៗធ្វើឱ្យភ័យរន្ធត់ស្លុតអារម្មណ៍បង្កឱ្យមានផលប៉ះពាល់ចំពោះសុខភាពផ្លូវចិត្តដល់មនុស្សគ្រប់វ័យពិសេសកុមារដែលកំពុងលូតលាស់ទាំងផ្នែកសុខភាពផ្លូវកាយ និងផ្លូវចិត្តធ្វើឱ្យផ្លូវចិត្តកុមារទន់ខ្សោយ ។ នេះគឺជាបញ្ហាមួយដែលត្រូវមានការយកចិត្តទុកដាក់ចំពោះសុខភាពផ្លូវចិត្តកុមារនៅថ្ងៃអនាគត ។
លោកវេជ្ជបណ្ឌិតយឹម សុបុត្រា ឯកទេសវិកលវិទ្យា នៃគ្លីនិកសាន់រ៉ាយ បានប្រាប់កោះសន្តិភាពឲ្យដឹងថា កុមារជាទំពាំងស្នងឫស្សីដែលត្រូវកសាងបុគ្គលិកលក្ខណៈសមត្ថភាព ដើម្បីបន្ដវេនកសាងគ្រួសារ សហគមន៍ និងសង្គមជាតិនាថ្ងៃអនាគត ។ ដើម្បីដឹងថា កុមារមានបញ្ហាសុខភាពផ្លូវចិត្ដ ឬអត់នោះលោកអ្នកចាំបាច់ត្រូវស្ដាប់នូវអ្វីដែលកុមារនិយាយ ឬជាអាកប្បកិរិយាដែលស្ដែងចេញ ត្រូវសង្កេតនូវរាល់ទង្វើរបស់កុមារដូចជា បើឃើញថាខុសប្លែកពីធម្មតា លោកអ្នកគប្បីទៅជួបពិគ្រោះជាមួយអ្នកជំនាញផ្នែកសុខភាពផ្លូវចិត្ដដើម្បីការពារ និងបញ្ចៀសកុមារពីបញ្ហាផ្លូវចិត្ដ ។
បញ្ហាសុខភាពផ្លូវចិត្ដរបស់កុមារអាចទទួលរងនូវឥទ្ធិពលមិនល្អគ្រប់ស្ថានភាព ប្រសិនបើកុមារមិនបានទទួលការថែទាំឱ្យបានដិតដល់ ។ ដូចនេះបើមានហេតុការណ៍ ឬបញ្ហាអ្វីមួយដែលធ្វើឱ្យប៉ះទង្គិចទៅដល់ផ្លូវអារម្មណ៍ និងផ្លូវចិត្ដរបស់កុមារងាយប្រឈមមុខនឹងបញ្ហាសុខភាពផ្លូវចិត្ដខ្លាំងណាស់ដូចជា ការវាយដំ សម្លុត គំរាម ឬការលងបន្លាចលេងជាដើម ។
ការលេងបន្លាចឬពញ្ញាក់ចំពោះកុមារគឺធ្វើឱ្យប៉ះពាល់ទៅដល់សុខភាពផ្លូវចិត្ដរបស់កុមារដូចខាងក្រោម៖
១- នៅពេលបច្ចុប្បន្ន កុមារមួយចំនួនបានទទួលរងឥទ្ធិពលនៃការគំរាមកំហែង ឬលេងបន្លាចធ្វើឱ្យកុមារឆាប់ភ័យខ្លាច តក់ស្លុត រន្ធត់នឹងសំឡេងខ្លាំងៗ ងាយចុះចាញ់នឹងបញ្ហាដែលកើតឡើងចំពោះមុខ ។ កត្ដាទាំងអស់នេះនឹងក្លាយទៅជាបញ្ហាកាន់តែធ្ងន់ធ្ងរបើសិនជាមិនមានការយកចិត្ដទកដាក់ថែទាំឱ្យបានល្អចំពោះផ្លូវចិត្ដកុមារទេនោះ ។ ព្រោះបើកុមារមានកត្ដាចិត្ដសាស្ដ្រមិនរឹងមាំតាំងពីតូចទៅនៅពេលធំឡើងកុមារនឹងក្លាយទៅជាបុគ្គលមួយដែលមានឥរិយាបទផ្លូវចិត្ដមិនរឹងមាំទន់ជ្រាយគិតគូរមិនបានវែងឆ្ងាយ និងងាយទទួលបញ្ហាចំពោះមុខ ។ ដូចនេះគឺទាមទារឱ្យមានការយកចិត្ដទុកដាក់អប់រំចំពោះកុមារឱ្យបានល្អទាំងផ្នែកចំណេះដឹងទូទៅ និងផ្នែកចិត្ដសាស្ដ្រ ។
២- នាពេលអនាគត មនុស្សធំដែលមានកត្ដាចិត្ដសាស្ដ្រមិនរឹងមាំគឺបណ្ដាលមកពីពេលនៅតូចធ្លាប់រងការភ័យខ្លាចមានការបន្លាចសម្លុតគំរាមជាច្រើន ។ ដូចនេះបុគ្គលដែលមិនសូវរឹងមាំផ្នែកសុខភាពផ្លូវចិត្ដភាគច្រើនគឺបណ្ដាលមកពីការជះឥទ្ធិពលទៅលើផ្លូវចិត្ដតាំងពីកុមារភាព ។ បើសិនជាការបញ្ញាក់លងបន្លាចមានភាពភ័យខ្លាំង ឬតក់ស្លុតខ្លាំងហើយកុមារមានកត្ដាចិត្ដសាស្ដ្រខ្សោយតាំងពីតូចមកស្រាប់ទៀតនោះ គឺកុមារងាយនឹងមានបញ្ហាផ្លូវចិត្ដ និងអាចវិវឌ្ឍន៍ជាជំងឺផ្លូវចិត្ដទៀតផង ។ បើធ្ងន់ធ្ងរជាងនេះទៅទៀតគឺអាចធ្វើឱ្យកុមារ ទៅជារោគវិកលចរិត ។ នេះជាលទ្ធផលដ៏អវិជ្ជមានសម្រាប់កុមារដែលរងការលេងបន្លាច សម្លុត ឬវាយដំ ។
ព្រោះហេតុនោះការអប់រំផ្នែកផ្លូវចិត្ដរបស់កុមារតាំងពីតូចមិនបានល្អងាយក្លាយជាមនុស្សដែលមិនមានភាពក្លាហានរឹងប៉ឹងជាពិសេសនឹងអាចក្លាយទៅជាអ្នកគិតខ្លីចង់បញ្ចប់ជីវិតនៅពេលដែលមានបញ្ហាលំបាកស្មុគស្មាញចំពោះមុខ ។
លោកវេជ្ជបណ្ឌិតបានបញ្ជាក់ថា ឪពុកម្ដាយឬអាណាព្យាបាលគ្រប់រូបគប្បីយកចិត្ដទុកដាក់ឱ្យបានល្អចំពោះសុខភាពផ្លូវចិត្ដរបស់កូន ។ លោកអ្នកមិនត្រូវលេងលងបន្លាចឬពញ្ជាក់កុមារដើម្បីការសប្បាយនោះទេ ព្រោះអាចធ្វើឱ្យមានផលប៉ះពាល់ទៅដល់ការលូតលាស់ផ្នែកចិត្ដសាស្ដ្ររបស់កេ្មង ។ បើសិនជាធ្វើឱ្យប៉ះពាល់ទៅដល់ផ្នែកផ្លូវចិត្ដកុមារធ្ងន់ធ្ងរគឺងាយប្រឈមមុខនឹងបញ្ហាផ្លូវចិត្ដហើយធ្វើឱ្យចិត្ដសាស្ដ្ររបស់គេទន់ខ្សោយ ។ មាតាបិតាទាំងឡាយគប្បីអប់រំកូនដោយក្ដីស្រឡាញ់ថ្នាក់ថ្នមប្រើពាក្យសម្ដីផ្អែមពីរោះចៀសវាងការវាយដំ សម្លុតគំរាម និងលេងបន្លាច ៕
ចែករំលែកព័តមាននេះ