រាជធានីភ្នំពេញ ៖ តារាសម្តែងវ័យក្មេងនាង សិទ្ធី នីកា បានបង្ហាញពីការពពោះជិតសម្រាលជាសាធារណៈនៅចំថ្ងៃខួបកំណើតរបស់ខ្លួន ដោយមិនមានការលាក់លៀម ក្នុងពេលដែលដំណឹងរៀបការជាមួយគូស្នេហ៍ដែលត្រូវបានគេដឹងថា ជាសែរាជវង្សនោះនៅមិនទាន់បានលេចឮនៅឡើយ ។
តារាសម្តែងរូបនេះបានបង្ហោះរូបភាពចំនួន២សន្លឹកនៅថ្ងៃទី ១១ ខែកញ្ញានេះ នៅលើបណ្តាញសង្គមហ្វេសប៊ុក នៅចំថ្ងៃកំណើតរបស់នាង ជាមួយនឹងសារទទួលស្គាល់ថា នាងទទួលបានកាដូដ៏មានតម្លៃ គឺកូនក្នុងផ្ទៃដែលនឹងចាប់កំណើតឃើញភពផែនដីនាពេលដ៏ខ្លីខាងមុខ ។
ការទម្លាយដំណឹងពីការពពោះជិតគ្រប់ខែរបស់ក្មួយស្រី អ្នកនាង ព្រំ រដ្ឋា នាង សិទ្ធី នីកា នាពេលនេះបានធ្វើឲ្យមហាជនសម្តែងការភ្ញាក់ផ្អើលយ៉ាងខ្លាំង ដោយសារតែគេមិនដែលដឹងដំណឹងពីការចូលរោងការនៅពេលណានៅឡើយ ដោយគ្រាន់តែដឹងថា នាងបានភ្ជាប់និស្ស័យស្នេហ៍ជាមួយបុរសដែលមានសែរាជវង្សយ៉ាងផ្អែមល្ហែម ។
ទោះជាយ៉ាងណាចំណងស្នេហ៍របស់នាងនាពេលនេះ គឺមិនមែនជាស្នេហាលាក់បាំង និងលេងសើចនោះឡើយ ដោយសារតែជារឿយៗអ្នកទាំងពីរតែងតែបង្ហាញនូវភាពផ្អែមល្ហែមទាំងសកម្មភាពខាងក្រៅ និងការបង្ហោះរូបភាពតាមហ្វេសប៊ុក ជាពិសេសស្នេហារបស់ពួកគេសុទ្ធតែទទួលការដឹងឮពីចាស់ទុំទាំងសងខាងនោះផងដែរ ។
អ្វីដែលសំខាន់ការពពោះទាំងមិនទាន់រៀបការនាពេលនេះទាំង សិទ្ធី នីកា និងគូស្នេហ៍របស់នាងបានសម្តែងនូវការសប្បាយរីករាយ នៅពេលដែលពួកគេទទួលបាននូវដំណក់ឈាមរួមគ្នា ដែលអាចរឹតចំណងស្នេហ៍កាន់តែផ្អែមល្ហែម បើទោះបីជាពន្លឺភ្លេងការនៅមិនបានលឺឡើងក៏ដោយ។
ជាការកត់សម្គាល់បើតាម សិទ្ធី នីកា បានបញ្ជាក់ប្រាប់មិត្តភក្តិ និងប្រិយមិត្តគាំទ្របានឲ្យដឹថា កូននៅក្នុងផ្ទៃរបស់នាងនាពេលនេះ គឺជាកូនប្រុស ដែលមានអាយុប្រមាណ ៣៣សប្តាហ៍ ខណៈពេលដែលនាងមានគម្រោងនឹងសម្រាលតាមធម្មជាតិ ។ នាងបានឱ្យដឹងថា កូននៅក្នុងផ្ទៃរបស់នាងនាពេលនេះ គឺជាគ្រាប់ពេជ្រដ៏មានតម្លៃសម្រាប់នាង ហើយដែលនាងបង្ហាញពីការពពោះនាពេលនេះ គឺចង់បញ្ជាក់ពីការទទួលកាដូដ៏ល្អបំផុតសម្រាប់ជីវិត ក្នុងថ្ងៃខួបកំណើតរបស់ខ្លួននៅថ្ងៃទី១១ ខែកញ្ញានេះ ដែលនាងមិនគួរលាក់បាំងនោះឡើយ ។
តារាសម្ដែង សិទ្ធី នីកា បានបើកបង្ហាញចំណងស្នេហាជាសាធារណៈជាមួយគូស្នេហ៍ ដែលត្រូវជាកូនប្រុសរបស់សម្ដេចនរោត្តម ចក្សពង្ស ជាសែលោហិតរាជវង្សខ្មែរ ខណៈទំនាក់ទំនងអ្នកទាំងពីរលែងលាក់លៀម រហូតដឹងឮដល់ចាស់ទុំទាំងសងខាង។ តារាវ័យក្មេងរូបនេះធ្លាប់អះអាងថា នាងមិនហ៊ានគិតលើរឿងរៀបការទេនៅពេលនេះ សូម្បីភ្ជាប់ពាក្យក៏ដូចគ្នា ។
មូលហេតុមិនមែនពួកគេមិនស្រលាញ់គ្នា ឬជាស្នេហាក្លែងក្លាយនោះទេ តែពេលនេះនាងចង់ផ្ដោតលើរបររកស៊ីលក់ផលិតផលតាមអនឡាញដែល ទើបដំណើរការសិន ។ ចំណងស្នេហ៍អ្នកទាំងពីរបានចាប់ផ្ដើមប្រមាណជាងមួយឆ្នាំប៉ុណ្ណោះ ដោយស្គាល់គ្នាចៃដន្យពេលទៅញ៉ាំអីជាមួយមិត្តភ័ក្តិ ។ រយៈពេលសេពគប់គ្នា នីកា ពិតជាពេញចិត្តអត្តចរិតមិត្តប្រុសរូបនេះខ្លាំងណាស់ ព្រោះលោកជាមនុស្សមានហេតុផល មើលថែទាំនាង ចេះនិយាយលេងសើច និងតាមចិត្តរបស់មិត្តស្រី ទើបធ្វើឲ្យ នីកា មានអារម្មណ៍កក់ក្ដៅពេលនៅក្បែរលោក ៕ (កែសម្រួលដោយ ៖ បុប្ផា)
ចែករំលែកព័តមាននេះ