កំពុងតែគិតគូរថា ថ្ងៃណាទើបអ្នកអាចប្តូរការងារមែនទេ ? ប្រាកដណាស់ មនុស្សយើងចំណាយពេលវេលាភាគច្រើនលើការងារ ដូច្នេះប្រសិនបើអ្នកស្អប់ការងាររបស់អ្នកនោះមានន័យថា អ្នកចំណាយពេលវេលាជាច្រើនធ្វើអ្វីដែលអ្នកមិនចូលចិត្តពីមួយថ្ងៃទៅមួយថ្ងៃ ។ ប៉ុន្តែអ្វីដែលអ្នកត្រូវសួរ គឺតើអ្នកគួរធ្វើដូចម្តេច ប្រសិនបើអ្នកស្អប់ការងាររបស់អ្នក ? លោក Timothy Sykes ដែលជាសហគ្រិន និងអ្នកជំនាញនៅ Penny Stock បានឲ្យដឹងថា អ្នកត្រូវតែសួរខ្លួនឯងពីសំណួរខាងក្រោមនេះ ៖
១. មូលហេតុអ្វីបានជាអ្នកស្អប់ការងាររបស់អ្នក ?
តើអ្នកស្អប់ការងារព្រោះតែចៅហ្វាយអ្នកមែនទេ ឬមកពីកន្លែងការងារនៅឆ្ងាយពីផ្ទះអ្នកពេក? អ្នកត្រូវដឹងច្បាស់លាស់ពីមូលហេតុដែលធ្វើឲ្យអ្នកបាត់បង់អារម្មណ៍ស្រលាញ់ការងារ រួចរកវិធីក្នុងការដោះស្រាយ ឬផ្លាស់ប្តូរអ្វីដែលធ្វើឲ្យអ្នកមិនពេញចិត្ត ។
២. តើអ្នកចូលចិត្តអ្វីក្នុងការងារអ្នក?
មិនថា អ្នកស្អប់ការងាររបស់អ្នកប៉ុណ្ណាទេ វាគួរតែមានចំណុចខ្លះៗដែលអ្នកពេញចិត្តដែរ ដូចជា មិត្តរួមការងារអ្នកជាដើម ។ ការស្វែងយល់ពីចំណុចដែលអ្នកចូលចិត្តនេះជួយឲ្យអ្នកដឹងពីទិសដៅច្បាស់លាស់ ពេលដែលអ្នកស្វែងរកការងារ និងជួយអ្នកក្នុងការសម្រេចចិត្តពីជំហានដែលអ្នកត្រូវដើរដើម្បីស្វែងរកការងារដែលអ្នកចូលចិត្តដែរ ។
៣. មានអ្វីដែលធ្វើឲ្យអ្នកស្រលាញ់ការងារអ្នក?
ពេលខ្លះកត្តាដែលធ្វើឲ្យអ្នកស្អប់ការងារអ្នកជាអ្វីដែលអ្នកអាចផ្លាស់ប្តូរបាន ។ ឧទាហរណ៍ដូចជា ប្រសិនបើអ្នកមិនចូលចិត្តប្រធានរបស់អ្នក អ្នកអាចស្នើសុំប្តូរទៅធ្វើការនៅផ្នែកដទៃ ឬសាខាដទៃ ។ ប្រសិនបើអ្នកគិតឃើញពីបញ្ហា និងដំណោះស្រាយហើយតែមិនទាន់ជឿជាក់ថា វាជាវិធីល្អ អ្នកអាចសាកសួរយោបល់ពីមិត្តរួមការងារ ឬមិត្តដទៃបាន ។
៤. តើអ្នកមានគម្រោងការច្បាស់លាស់ទេពេលសុំលាឈប់?
បើអ្នកគិតថា មិនមានដំណោះស្រាយអ្វីដែលជួយឲ្យអ្នកស្រលាញ់ការងារនេះទេ នោះអ្នកគួរតែចាប់ផ្តើមគិតពីការចាកចេញ ។ ប្រាកដណាស់ អ្នកមិនគួរដើរចេញភ្លាមៗបន្ទាប់ពីសម្រេចចិត្តហើយទេ និងគួរទុកពេលឲ្យបានសមរម្យ បន្ទាប់ពីប្រាប់ពីការលាឈប់ទៅក្រុមហ៊ុន ។ ជាមួយគ្នានេះទៀត អ្នកគួរតែចាប់ផ្តើមគិតគូរពីការស្វែងរកការងារថ្មី មុនពេលស្នើសុំលាឈប់ផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ