ម្ចាស់អាជីវកម្មតួចៗគួរចេះលះបង់៤ចំណុចនេះបើចង់រីកចម្រើន
លោក Joseph LaForte ដែលជានាយកផ្នែកលក់នៅ Par Funding បានឲ្យដឹងថា ក្រុមហ៊ុនដែលជោគជ័យមានអ្នកដឹកនាំដែលបន្តគ្រប់គ្រងអាជីវកម្ម ខណៈដែលផ្តល់ទំនួលខុសត្រូវដល់អ្នកដទៃ ។…
លោក Joseph LaForte ដែលជានាយកផ្នែកលក់នៅ Par Funding បានឲ្យដឹងថា ក្រុមហ៊ុនដែលជោគជ័យមានអ្នកដឹកនាំដែលបន្តគ្រប់គ្រងអាជីវកម្ម ខណៈដែលផ្តល់ទំនួលខុសត្រូវដល់អ្នកដទៃ ។ អាជីវករគួរតែដឹងពីកម្រិតធ្វើការរបស់ខ្លួនខណៈដែលបន្តការគ្រប់គ្រង និងដឹកនាំបុគ្គលិកឲ្យនាំក្រុមហ៊ុនដើរតាមទិសដែលត្រឹមត្រូវ ។
លោក LaForte បានបន្តថា អាជីវករដែលជោគជ័យអាចមានជំនាញក្នុងវិស័យដែលពួកគេប្រឡូកពិតមែន ប៉ុន្តែពួកគេមិនមានចំណេះដឹងគ្រប់គ្រាន់ក្នុងការដឹកនាំអាជីវកម្មឡើយ ។ ដោយហេតុដូចនេះ អាជីវករគួរយល់ថាពេលខ្លះវាចាំបាច់ក្នុងការធ្វើការលះបង់ខ្លះៗដើម្បីការរីកចម្រើនក្រុមហ៊ុន ។ ខាងក្រោមនេះគឺជាការលះបង់សំខាន់ៗដែលអាជីវកម្មតូចៗគួរតែពិចារណា៖
១. វត្តមានរបស់ខ្លួន៖ ប្រាកដណាស់ អ្នកជាអ្នកកំណត់ចក្ខុវិស័យសម្រាប់ក្រុមហ៊ុន ឬអាជីវកម្មរបស់អ្នក ដូច្នេះមិនមាននរណាអាចយល់ពីអ្វីដែលអ្នកចង់សម្រេចច្រើនជាងអ្នកទេ ។ ដូច្នេះការកំណត់ចក្ខុវិស័យគឺជាចំណុចដែលអ្នកត្រូវតែធ្វើដោយខ្លួនឯង ។
យ៉ាងណាក្តី មិនមាននរណាម្នាក់ដែលអាចជោគជ័យដោយពឹងផ្អែកតែលើខ្លួនបានឡើយ ដូច្នេះក្នុងផ្នែកផ្សេងៗដែលអ្នកមិនមានជំនាញទេ អ្នកគួរតែកាត់បន្ថយវត្តមានរបស់អ្នក និងបន្ថែមវត្តមានអ្នកដែលមានបទពិសោធន៍ និងសក្តានុពលក្នុងការជួយដល់អាជីវកម្មរបស់អ្នកវិញ ។
២. លះបង់ទំនួលខុសត្រូវ តែប្រកាន់ខ្ជាប់ការគ្រប់គ្រង៖ ក្នុងនាមជាអ្នកដឹកនាំ អ្នកគួរតែប្រគល់តួនាទីមួយចំនួនទៅកាន់បុគ្គលិកដទៃក្នុងការតាមដានកិច្ចការរបស់បុគ្គលិកដទៃទៀត ។ វាជួយឲ្យអ្នកមានពេលវេលាច្រើនជាងមុន ប៉ុន្តែអ្នកនៅតែគ្រប់គ្រងបុគ្គលិករបស់អ្នកដដែល ។
៣. ធ្វើការដើម្បីអាជីវកម្មអ្នក មិនមែនធ្វើការឲ្យអាជីវកម្មអ្នកទេ៖ ពេលចាប់ផ្តើមដំបូងអ្នកប្រហែលជាត្រូវរ៉ាប់រងតួនាទីច្រើនដើម្បីឲ្យក្រុមហ៊ុនដំណើរបានរលូនបាន ។ ប៉ុន្តែអ្វីដែលអ្នកត្រូវចងចាំគឺអ្នកត្រូវមានពេលដើម្បីធ្វើការដើម្បីអាជីវកម្មរបស់អ្នក មិនមែនធ្វើការឲ្យអាជីវកម្មអ្នកឡើយ ។ មានន័យថាអ្នកត្រូវបំពេញកិច្ចការដែលជួយឲ្យក្រុមហ៊ុនសម្រេចបានចក្ខុវិស័យដែលបានកំណត់ ។
៤. ពេលវេលាធ្វើការ៖ ជារៀងរាល់ថ្ងៃអ្នកគួរតែលះបង់ពេលវេលាធ្វើការដើម្បីទុកពេលសម្រាប់ការអាន និងរៀនអ្វីដែលថ្មីៗ ។ អ្នកគួរតែតាមដានរាល់ការវិវឌ្ឍន៍នានាដែលកើតមានឡើងជុំវិញពិភពលោក និងក្នុងវិស័យរបស់អ្នក ។
អ្នកត្រូវចងចាំថា ពេលវេលាមានកំណត់ ដូច្នេះអ្នកត្រូវធ្វើការសម្រេចចិត្តឲ្យបានម៉ត់ចត់ក្នុងការចំណាយវា ៕
ប្រភព ៖ forbes , កែសម្រួលដោយ ៖ សំណាង
ចែករំលែកព័តមាននេះ